Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 63: Enyene Ọniọn̄ Edidem Solomon

Mbụk 63: Enyene Ọniọn̄ Edidem Solomon

SOLOMON isịmke isua edịp ke akabarede edi edidem. Enye ama Jehovah, ndien etiene eti item oro David ete esie ọkọnọde enye. Jehovah enem esịt ye Solomon, ntre, okoneyo kiet, enye ọdọhọ enye ke ndap: ‘Solomon, nso ke afo akpama mi nnọ fi?’

Ke emi, Solomon ọbọrọ: ‘Jehovah Abasi mi, Ami mekpri n̄kaha nnyun̄ mfiọkke ndikara. Ntre nnọ mi ọniọn̄ ndikara ikọt fo ke eti usụn̄.’

Jehovah enem esịt ke eben̄e Solomon. Ntre Enye ete: ‘Koro afo eben̄ede ọniọn̄ munyụn̄ uben̄eke anyan uwem mme inyene, Ami nyenọ fi ọniọn̄ n̄kan owo efen ekededi akanam odude uwem. Edi nnyenọ fi n̄ko se afo muben̄eke, inyene ye ubọn̄.’

Ibịghike, iban iba ẹtiene Solomon ye ọkpọsọn̄ mfịna. Kiet ke otu mmọ ọdọhọ, ‘N̄wan emi ye ami idụn̄ ufọk kiet.’ ‘Ami mma mman eyeneren, ndien usen iba ẹbe, enye n̄ko akaman eyeneren. Ekem okoneyo kiet, eyen esie akpa. Edi nte ndede, enye onịm obukpo eyen adian mi ndien emen eyen mi. Ke ndemerede nse obukpo eyen, mma n̄kụt nte idịghe okịm.’

Ke emi, n̄wan eken ete: ‘Baba! Edi oduuwem eyen edi okịm, ndien obukpo eyen edi esie!’ Akpa n̄wan ọbọrọ ete: ‘Baba! obukpo eyen edi okuo, ndien oduuwem edi okịm!’ Ntem ke iban oro ẹfan̄a. Nso ke Solomon edinam?

Enye ọdọn̄ ẹkeda ofụt ẹdi, ndien ke ẹdade ẹdi, enye ọdọhọ: ‘Sịbe oduuwem eyen ke mbak iba, ndien nọ n̄wan kiet kiet ubak.’

Ata eka ofiori, ‘Baba! ‘Mbọk kuwot nsekeyen. Yak nọ enye!’ Edi n̄wan eken ete: ‘Kunọ owo nnyịn ekededi; kaiso bahade enye iba.’

Edidem Solomon akan ọkpọsọn̄ mfịna

Ke akpatre Solomon etịn̄ ikọ: ‘Kuwot eyen oro! Kpọn̄ enye nọ akpa n̄wan. Enye edi ata eka.’ Solomon ọfiọk emi koro ata eka ama nsekeyen oro etieti tutu enye onyịme ndikpọn̄ enye nnọ n̄wan eken man ẹdiwot enye. Ke mme owo ẹkopde nte Solomon akakande mfịna oro, mmọ ẹnem esịt ndinyene utọ ọniọn̄ ọniọn̄ edidem oro.

Ke ini ukara Solomon, Abasi ọdiọn̄ mme owo ke ndinam isọn̄ ọkọri ediwak wheat ye barley, mme grape ye fig ye mme udia eken. Mbon obio ẹsịne ndiye ọfọn̄ enyụn̄ ẹdụn̄ ke nti ufọk. Ata uwak nti n̄kpọ ọyọhọde ọsụhọ odu ọnọ kpukpru owo.

1 Ndidem 3:3-28; 4:29-34.



Mme Mbụme

  • Nso ke Jehovah obụp Solomon, ndien nso ke enye ọbọrọ?
  • Sia Jehovah enemde esịt ye eben̄e Solomon, nso ke enye ọn̄wọn̄ọ ndinọ Solomon?
  • Nso ọkpọsọn̄ mfịna ke iban iba ẹnịm Solomon ke iso?
  • Nte ekemede ndikụt ke ndise emi, didie ke Solomon akakan mfịna emi?
  • Ukara Solomon etie didie, ndien ntak-a?

Mme mbụme efen

Kpep N̄kpọ En̄wen

NDISE ẸDADE ẸKPEP N̄KPỌ

Solomon Enyene Ọniọn̄

Nso mîdụhe ke ndise emi, dụri udịm ke nnennen itie man ndise oro ọwọrọ ada ekem sịn kọlọ.

KAD MBRE BIBLE

Kad Mbre Bible Aban̄ade Solomon

Sio kad mbre Bible emi da kpep n̄kpọ ban̄a Edidem Solomon.