Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 62: Afanikọn̄ ke Ufọk David

Mbụk 62: Afanikọn̄ ke Ufọk David

KE DAVID ọtọn̄ode ndikara ke Jerusalem, Jehovah ọnọ udịm ekọn̄ esie uwak edikan mme asua mmọ. Jehovah ama ọn̄wọn̄ọ ndinọ nditọ Israel isọn̄ Ca′naan. Ndien ke emi, ye un̄wam Jehovah, ofụri isọn̄ oro ẹken̄wọn̄ọde ẹnọ akabade eke mmọ ndien.

David edi eti andikara. Enye ama Jehovah. Ntre kiet ke otu akpa n̄kpọ enye anamde ke ama akada Jerusalem edi ndida ekebe ediomi Jehovah ndi do. Ndien enye oyom ndibọp temple ndisịn enye.

Ke David ọsọn̄de akan, enye anam idiọk ndudue. David ọfiọk ke akwan̄a ndida n̄kpọ owo efen. Edi mbubreyo kiet, ke enye odude ke ọkọm ufọk ubọn̄ esie, enye ese isọn̄ okụt ata ediye an̄wan. Enyịn̄ esie edi Bath-she′ba, ndien ebe esie edi owo ekọn̄ kiet ẹkotde U·ri′ah.

David otịm oyom Bath-she′ba tutu anam ẹda enye ẹdi ufọk ubọn̄ esie. Ebe esie adaha ndin̄wana ekọn̄. Ọfọn, David anam ima ye enye ndien ekem enye okụt ete enye oyomo. Otịm afịna David tutu enye ọdọn̄ etop ọnọ Jo′ab etubom ẹkọn̄ ndinam ẹnịm U·ri′ah ke iso ekọn̄ emi ediwotde enye. Ke U·ri′ah akpade, David ọdọ Bath-she′ba.

Jehovah otịm ayat esịt ye David. Ntre enye ọdọn̄ Nathan asan̄autom esie asian enye aban̄a mme idiọkn̄kpọ esie. Afo emekeme ndikụt Nathan do etịn̄de ikọ ọnọ David. David otịm ọfụhọ aban̄a se akanamde, ntre Jehovah iwotke enye. Edi Jehovah ete: ‘Koro afo akanamde mme idiọkn̄kpọ emi, afo eyenyene uwak afanikọn̄ ke ufọk fo.’ Ndien nso afanikọn̄ ke David enyene ntem!

Nathan ọnọ David item

Ke mbemiso, eyen Bath-she′ba akpa. Ekem, akpan David, Am′non ada eyenete esie Ta′mar okodu ikpọn̄ ndien anam ima ye enye ke ufịk. Ab′sa·lom eyen David otịm ayat esịt ke emi tutu enye owot Am′non. Ekem, Ab′sa·lom ọbọ uma ediwak owo, ndien anam idemesie edidem. Ke akpatre, David akan ke ekọn̄ ye Ab′sa·lom, emi ẹwotde. Ih, David enyene ekese afanikọn̄.

Ke ufọt kpukpru n̄kpọ ntịbe emi, Bath-she′ba aman eyeneren ẹkotde Solomon. Ke David ọsọn̄de onyụn̄ ọdọn̄ọde, eyeneren esie Ad·o·ni′jah odomo ndinam idemesie edidem. Ke oro, David anam oku ẹkotde Zadok ọtọhọ Solomon aran ke ibuot ndiwụt nte Solomon edidi edidem. Ibịghike, David akpa ke osimde isua 70. Enye akakara ke isua 40, edi ke emi, Solomon edi edidem Israel.

2 Samuel 11:1-27; 12:1-18; 1 Ndidem 1:1-48.



Mme Mbụme

  • Ye un̄wam Jehovah, nso itịbe inọ isọn̄ Canaan ke akpatre?
  • Nso itịbe mbubịteyo usen kiet ke ini David odude ke ọkọm ufọk ubọn̄ esie?
  • Ntak emi Jehovah otịmde ayat esịt ye David?
  • Ke ndise emi, anie ke Jehovah ọdọn̄ akasian David mme idiọkn̄kpọ esie, ndien owo oro ọdọhọ ke nso iditịbe inọ David?
  • Nso afanikọn̄ ke David enyene?
  • Anie akabade edi edidem Israel ke David ama akakpa?

Mme mbụme efen