Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 61: Ẹnam David Edidem

Mbụk 61: Ẹnam David Edidem

SAUL afiak odomo ndimụm David. Enye ada n̄kpọsọn̄ mbon ekọn̄ esie 3,000 adaha ndiyom enye. Ke David ọfiọkde emi, enye ọdọn̄ mbon uyep ẹkẹfiọk ebiet Saul ye ikọt esie ẹnamde nna ke okoneyo oro. Ekem David obụp ikọt esie iba: ‘Anie ke otu mbufo edika nna Saul ye ami?’

David ke ofiori okot Edidem Saul

‘A·bish′ai ọbọrọ, ‘Nyeka.’ A·bish′ai edi eyen eyeneka David an̄wan, Ze·ru′iah. Ke Saul ye ikọt esie ẹdede, David ye A·bish′ai ẹnyọni ndịbe ndịbe ẹdụk nna. Mmọ ẹmen eduat Saul ye otu mmọn̄ esie, emi anade ekpere ibuot Saul. Baba owo ikwe mme ndikop koro kpukpru ẹtịm ẹde.

Sese David ye A·bish′ai ke emi. Mmọ ẹdaha, ndien ẹdu ke enyọn̄ obot ke ifụre. David ofiori okot etubom ekọn̄ Israel: ‘Ab′ner, Nsinam afo mukpemeke ete fo, edidem? Sese! Enye eduat ye otu mmọn̄ esie?’

Saul edemede. Enye ọdiọn̄ọ uyo David, ndien obụp: ‘Nte afo edi oro, David?’ Nte emekeme ndikụt Saul ye Ab′ner do ke idak?

David ọbọrọ Saul ete, ‘Ih, ọbọn̄ mi edidem.’ Ndien David obụp: ‘Ntak afo oyomde ndimụm mi? Nso idiọkn̄kpọ ke n̄kanam? Se eduat fo mi, O edidem. Yak kiet ke otu mme owo edibọ enye.’ Saul onyịme ete, ‘Mmanam idiọk.’ ‘Mmanam ndisịme n̄kpọ.’ Ye oro, David ọnyọn̄ esie ndien Saul afiak ọnyọn̄. Edi David ọdọhọ idemesie ete: ‘Usen kiet, Saul oyowot mi. Akpana mfehe n̄ka idụt mme Phi·lis′tine.’ Ndien oro ke enye anam. David ekeme ndibian̄a mme Phi·lis′tine nnyụn̄ nnam mmọ ẹnịm ẹte imọ idu ke emi ye mmọ.

Edidem Saul ye Abner

Ekem ke ndusụk ini, mme Phi·lis′tine ẹdọk ndin̄wana ye Israel. Ke ekọn̄ oro, ẹwot Saul ye Jon′a·than. Emi anam David otịm ọfụhọ, ndien enye ewet edinem ikwọ, emi enye ọkwọde: ‘Mọfụhọ mban̄a fi eyenete mi Jon′a·than. Se nte afo akamade mi!’

Ke emi ebede, David afiak ke Israel aka obio He′bron. Ekọn̄ odu ke ufọt mme owo oro ẹmekde eyen Saul Ish-bo′sheth ndidi edidem ye mme owo efen ẹyomde David edi edidem. Edi ke akpatre, ikọt David ekan. David edi isua 30 ke ẹnamde edi edidem. Ke isua itiaba ye ubak, enye akara ke He′bron. Ndusụk nditọ oro ẹmanade ẹnọ enye do ẹkere, Am′non, Ab′sa·lom ye Ad·o·ni′jah.

Ini edi oro David ye ikọt esie ẹkade ndida ediye obio oro ẹkotde Jerusalem. Jo′ab, eyen Ze·ru′iah efen, eyeneka David an̄wan ada iso ke ẹn̄wan. Ntre David ọnọ Jo′ab utịp ke ndinam enye etubom ekọn̄ esie. Ke emi, David ọtọn̄ọ ndikara ke obio Jerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Chronicles 11:1-9.



Mme Mbụme

  • Nso ke David ye Abishai ẹkenam ke ini Saul edede ke nna esie?
  • Mme mbụme ewe ke David obụp Saul?
  • Ke ama ọkọkpọn̄ Saul, David akaka m̀mọ̀n̄?
  • Nso inam David otịm ofụhọ tutu enye ewet edinem ikwọ?
  • David edi isua ifan̄ ke ini ẹnamde enye edidem ke Hebron, ndien ndusụk nditọ iren esie ẹkere didie?
  • Nte ini akade, m̀mọ̀n̄ ke David akakara nte edidem?

Mme mbụme efen

Kpep N̄kpọ En̄wen

David Ikokopke Ndịk

Kot inem inem mbụk Bible emi man ọfiọk se ikanamde David enyene uko ntre.