Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 59: Ntak Anade David Efehe

Mbụk 59: Ntak Anade David Efehe

KE DAVID ama okowot Go·li′ath, Ab′ner etubom ekọn̄ Israel ada enye ọsọk Saul. Saul otịm enem esịt ye David. Enye anam enye etubom ekọn̄ esie onyụn̄ ada enye okodụn̄ ke ufọk edidem.

Ekem, ke mbon ekọn̄ ẹnyọn̄de ẹto ndin̄wana ye mbon Phi·lis′tine, iban ẹkwọ: ‘Saul owot mme tọsịn, edi David owot mme tọsịn duop,’ Emi anam Saul ofụbe ufụp, koro ẹnọde David ukpono ẹkan Saul. Edi Jon′a·than eyen Saul ifụbeke ufụp. Enye otịm ama David, ndien David ama Jon′a·than n̄ko. Ntre mmọ mbiba ẹn̄wọn̄ọ ẹnọ kiet eken nte mmimọ iyedi ufan kpukpru ini.

Edidem Saul otop eduat

David edi eti ebre harp, ndien Saul ama ikwọ oro enye ebrede. Edi usen kiet ufụp Saul esịn enye anam enyene ndịk n̄kpọ. Ke David ebrede harp, Saul emen eduat esie otop ete: ‘Nyekịm David ndian ke ibibene!’ Edi David efep, ndien eduat oro edue nditọ. Ekem Saul afiak okpu nditọ David ke eduat esie. Ntre David ọfiọk ke emi nte ke ana imọ itịm ikpeme.

Nte emeti un̄wọn̄ọ oro Saul akanamde? Enye ọkọdọhọ ete imọ iyenọ adiaha esie edi n̄wan owo emi owotde Go·li′ath. Ke akpatre, Saul ọdọhọ David ete enye ekeme ndidọ udun̄wan esie Mi′chal, edi kan̄a, ana enye owot mme Phi·lis′tine 100. Kere ban̄a oro! Saul otịm ekere ete mme Phi·lis′tine ẹyewot David. Edi mmọ iwotke, ntre Saul ọnọ udun̄wan esie ndidi n̄wan David.

Usen kiet, Saul asian Jon′a·than ye kpukpru ifụn esie ete iyom ndiwot David. Edi Jon′a·than ọdọhọ ete esie: ‘Kunam David idiọk. Enye akanam iduehe fi. Utu ke oro, kpukpru se enye anamde an̄wam fi ekese. Enye ekedịghe uwem esie ke ini okowotde Go·li′ath, ndien afo ekenem esịt ke okokụtde oro.’

David efep eduat

Saul okop ọnọ eyen esie, ndien ọn̄wọn̄ọ ete idinamke David idiọk. Ẹfiak ẹda David ẹdi, ndien enye anam n̄kpọ Saul ke ufọk esie nte akanamde akpa. Nte ededi, usen kiet, ke David ebrede ikwọ, Saul otop eduat esie nditọ David. David efep, ndien eduat oro ọtọ ibibene. Ọyọhọ utịm ikata edi emi! David ọfiọk ke emi ete ke ana imọ ifehe!

Okoneyo oro, David ọnyọn̄ ufọk esie. Edi Saul ọdọn̄ mme owo ẹkewot enye. Mi′chal ọfiọk se ete esie odiomide. Ntre enye asian ebe esie: ‘Ke mufeheke okoneyo emi, n̄kpọn̄ afo eyekpa.’ Okoneyo oro, Mi′chal an̄wam David efehe ọwọrọ ke window. Ke n̄kpọ nte isua itiaba, ana David edịbe ke nsio nsio itie man Saul okukụt enye.

1 Samuel 18:1-30; 19:1-18.



Mme Mbụme

  • Ntak emi Saul efịbede David, edi didie ke Jonathan eyen Saul okpụhọde?
  • Nso itịbe usen kiet ke ini David ebrede harp ọnọ Saul?
  • Nso ke Saul ọdọhọ David anam mbemiso ọdọde Michal eyen esie, ndien ntak Saul etịn̄de emi?
  • Ke ini David ebrede harp ọnọ Saul, nso itịbe ọyọhọ utịm ikata nte ndise emi owụtde?
  • Didie ke Michal anyan̄a David, ndien ọtọn̄ọde ke ini oro nso ke ana David anam ke isua itiaba?

Mme mbụme efen