Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 58: David ye Goliath

Mbụk 58: David ye Goliath

MME Phi·lis′tine ẹfiak ẹdi ndin̄wana ye Israel. Ikpọ nditọ eka David ita ẹdu idahaemi ke udim ekọn̄ Saul. Ntre, usen kiet Jes′se asian David: ‘Da ndusụk ibokpot ye mme eboho uyo sọk nditọ ete fo. Se nte etiede ye mmọ.’

Goliath

Ke David osịmde nna ekọn̄, enye efehe aka udịm ekọn̄ ndiyom nditọ ete esie. Anyan owo Go·li′ath Phi·lis′tine ọwọrọ edi ndisak nditọ Israel. Enye ke akanam emi kpukpru usenubọk ye mbubreyo ke usen 40. Enye ofiori: ‘Ẹmek owo mbufo kiet an̄wana ye ami. Edieke enye akande owot mi, nnyịn iyedi ifụn mbufo. Edi ke ami n̄kande n̄wot enye, mbufo ẹyedi ifụn nnyịn. Ndori ata nte mbufo ẹmek owo an̄wana ye ami.’

David obụp ndusụk mbon ekọn̄: ‘Nso ke ẹdinọ owo oro owotde Phi·lis′tine emi onyụn̄ osiode Israel ke bụt emi?’

Owo ekọn̄ ọdọhọ, ‘Saul eyenọ owo oro ediwak inyene. Ndien eyenọ enye adiaha esie ọdọ.’

Edi kpukpru nditọ Israel ẹkop ndịk ẹban̄a Go·li·ath koro enye okponde etieti. Enye ọniọn̄ akan ikpat 9 (n̄kpọ nte meter 3), ndien enyene owo ekọn̄ efen akamade otu ekọn̄ ọnọ enye.

Ndusụk mbon ekọn̄ ẹkesian Saul ete David oyom ndin̄wana ye Go·li′ath. Edi Saul asian David: ‘Afo ukemeke ndin̄wana ye Phi·lis′tine emi. Afo edi eyenọwọn̄, ndien enye edi owo ekọn̄ ke ofụri uwem esie.’ David ọbọrọ: ‘N̄kowot bear ye lion oro okomụmde erọn̄ ete mi. Ndien Phi·lis′tine emi eyebiet mmọ. Jehovah eyen̄wam mi.’ Ntre Saul ọdọhọ: ‘Ka, n̄ko Jehovah osụk odu ye afo.’

David ọsụhọde ke idịm akada ndọnọ itiat ition esịn ke ekpat esie. Ekem enye ada utop itiat esie ọwọrọ ndisobo anyan owo oro. Ke Go·li′ath okụtde enye, enye ikemeke ndinịm ke akpanikọ. Enye ekere ke eyemem akaha ndiwot David.

David otop itiat

Go·li′ath ete, ‘San̄a di, nyeda okpo fo nnọ mme inuen ye mme unam ẹta.’ Edi David ete: ‘Afo ada ofụt ye eduat ye onyịm etiene mi, edi ami nda enyịn̄ Jehovah ntiene fi. Mfịn emi Jehovah eyeda fi esịn mi ke ubọk ndien nyewot fi.’

Ke oro, David efehe etiene Go·li′ath. Enye osio itiat ke ekpat esie, esịn ke utop itiat, onyụn̄ otop ke ofụri odudu esie. Itiat oro efe nnennen ọtọ ibuot Go·li′ath, enye ọduọ akpa! Ke mme Phi·lis′tine ẹkụtde ẹte ke owo uko mmọ ọduọ, mmọ kpukpru ẹwọn̄ọde ẹfen̄e. Nditọ Israel ẹbịne mmọ ndien ẹkan ke ekọn̄.

1 Samuel 17:1-54.



Mme Mbụme

  • Nso ata ke Goliath amia ye udịmekọn̄ Israel?
  • Goliath okpon didie, ndien nso ke Edidem Saul ọn̄wọn̄ọ ndinọ owo emi ediwotde Goliath?
  • Nso ke David etịn̄ ke ini Saul ọdọhọde ke enye ikemeke ndin̄wana ye Goliath sia enye edide eyenọwọn̄?
  • Ke ibọrọ emi David ọnọde Goliath, didie ke enye owụt ke imeberi edem ye Jehovah?
  • Nte afo ekemede ndikụt ke ndise emi, nso ke David ada owot Goliath, ndien nso itịbe inọ mme Philistine ke emi ebede?

Mme mbụme efen

Kpep N̄kpọ En̄wen

KPEP NDITO FO

David Ikokopke Ndịk

Kot inem inem mbụk Bible emi man ọfiọk se ikanamde David enyene uko ntre.