Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 56: Saul—Akpa Edidem Israel

Mbụk 56: Saul—Akpa Edidem Israel
Samuel ke eyet Saul aran nte edidem

SE SAMUEL ọtọhọde aran ke ibuot owo oro. Emi edi se mmọ ẹkesinamde owo ndiwụt nte ke ẹma ẹmek enye ndidi edidem. Jehovah ọdọhọ Samuel ọtọhọ Saul aran ke ibuot. Enye edi akpan enem utebe aran.

Saul ikekereke nte imọfọn ikem ndidi edidem. Enye asian Samuel, ‘Ami nto esien Benjamin, ata ekpri esien Israel.’ ‘Nsinam afo ọdọhọde ete ami nyedi edidem?’ Jehovah ama Saul koro enye ikoike inam nte imokpon inyụn̄ idi akpan owo. Ntak edi oro Enye emekde enye edi edidem.

Edi Saul idịghe ubuene mme ekpri owo. Enye oto ufọk imọ, ndien otịm eye, ọniọn̄. Enye ọniọn̄ akan kpukpru owo ke Israel ke n̄kpọ nte ikpat kiet. Saul n̄ko edi ata ọsọp itọk owo, ndien enye okop odudu etieti. Mme owo ẹnem esịt nte Jehovah emek Saul ndidi edidem. Mmọ kpukpru ẹtọn̄ọ ndifiori: ‘Itọn̄ uwem ọsọn̄ edidem!’

Mme asua Israel ke ẹsụk ẹsọn̄ ubọk. Mmọ ke ẹsụk ẹnọ Israel ekese afanikọn̄. Ndo ndo oro ẹnamde Saul edidem, mbon Am′mon edi ndin̄wana ye mmọ. Edi Saul obok akamba udịm ekọn̄ onyụn̄ akan mbon Am′mon. Emi anam mme owo ẹnem esịt nte ke ẹnam Saul edidem.

Nte ediwak isua ẹbede, Saul ada nditọ Israel usụn̄ ẹkan mme asua mmọ. Saul n̄ko enyene eyeneren okopde odudu ẹkotde Jon′a·than. Ndien Jon′a·than an̄wam Israel ẹkan ediwak ekọn̄. Mme Phi·lis′tine ke ẹsụk ẹdi mme ata idiọk asua Israel. Usen kiet, ediwak ediwak tọsịn mbon Phi·lis′tine edi en̄wan ye Israel.

Samuel ọdọhọ Saul ebet tutu imọ idinam uwa, mme enọ, inọ Jehovah. Edi Samuel ebịghi ndidi. Saul okop ndịk nte mme Phi·lis′tine ẹyetọn̄ọ ekọn̄, ntre enye akaiso anam uwa ke idemesie. Ke Samuel edide ndien, enye asian Saul ete enye otụt utọn̄. Samuel ete, ‘Jehovah eyemek owo efen edi edidem Israel.’

Ekem, Saul afiak otụt utọn̄. Ntre Samuel asian enye: ‘Ọfọn ndikop uyo Jehovah akan ndinọ ata eti erọn̄. Koro afo mukopke uyo Jehovah, Jehovah idinịmke fi edidem Israel.’

Nnyịn imekeme ndikpep eti ukpepn̄kpọ nto emi. Owụt nnyịn nte edide akpan n̄kpọ ndikop uyo Jehovah kpukpru ini. N̄ko, owụt nte eti owo nte oro Saul ekedide ekeme ndikpụhọde ndiọk. Nnyịn iyomke ndikabade ndiọk, nte imoyom?

1 Samuel mme ibuot 9 osim 11; 13:5-14; 14:47-52; 15:1-35; 2 Samuel 1:23.



Mme Mbụme

  • Nso ke Samuel anam ke ndise emi, ndien ntak-a?
  • Ntak emi Jehovah amade Saul, ndien nso orụk owo ke enye edi?
  • Eyen Saul ekere didie, ndien nso ke eyen oro anam?
  • Ntak emi Saul awade uwa utu ke ndibet Samuel ediwa?
  • Nso ke ikeme ndikpep nto mbụk Saul?

Mme mbụme efen