Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 55: Ekpri Eyeneren Anam N̄kpọ Abasi

Mbụk 55: Ekpri Eyeneren Anam N̄kpọ Abasi

NTE emi idịghe ekpri ediye eyeneren? Enye ekere Samuel. Ndien owo oro odoride Samuel ubọk ke ibuot edi akwa oku Israel, E′li. Ete Samuel, El·ka′nah ye Han′nah eka esie ẹdi oro ẹdade Samuel ẹsọk E′li.

Samuel osobo ye Eli akwa oku

Samuel edi isua inan̄ mme ition kpọt. Edi enye eyedụn̄ mi ke ataya Jehovah ye E′li ye mme oku eken. Ntak emi El·ka′nah ye Han′nah ẹkpenọde ekpri owo ntre nte Samuel ndinam n̄kpọ Jehovah ke ataya? Yak ise.

Isua ifan̄ kpọt ebede Han′nah ama ọfụhọ akaha. Ntak edi koro enye ikekemeke ndiman eyen, ndien enye ama oyom eyen etieti. Ntre usen kiet ke Han′nah akade ataya Jehovah, enye ọkọbọn̄ akam: ‘O Jehovah, kufre mi! Ke afo ọnọde mi eyeneren, mmọn̄wọn̄ọ nte nyenọ fi enye anam n̄kpọ fo ke ofụri uwem esie.’

Jehovah ama ọbọrọ akam Han′nah, ndien ke ediwak ọfiọn̄ ẹbede, enye ama aman Samuel. Han′nah ama ama ekpri eyeneren esie, ndien enye ọkọtọn̄ọ ndikpep enye mban̄a Jehovah ke enye osụk edide ekpri. Enye ama ọdọhọ ebe esie: ‘Ndo ndo oro Samuel okponde ọkpọn̄ eba, nyeda enye n̄ka ataya man anam n̄kpọ Jehovah do.’

Emi ke nnyịn ikụt Han′nah ye El·ka′nah ẹnamde ke ndise emi. N̄ko koro ete ye eka ẹkekpepde Samuel otịm ọfọn, enye enem esịt ndikeme ndinam n̄kpọ Jehovah mi ke akpan ataya Jehovah. Kpukpru isua, Han′nah ye El·ka′nah ẹdi ndituak ibuot ke akpan ataya emi, ndinyụn̄ nse ekpri eyen mmọ. Ndien kpukpru isua, Han′nah ada obufa anana ubọk coat oro enye anamde ọsọk Samuel.

Nte mme isua ẹbede, Samuel akaiso anam n̄kpọ ke ataya Jehovah, ndien Jehovah ye mme owo ẹma enye. Edi nditọ akwa oku Eli, Hoph′ni ye Phin′e·has ifọnke. Mmọ ẹnam ediwak idiọkn̄kpọ, ẹnyụn̄ ẹnam mbon efen ẹtụt utọn̄ ye Jehovah n̄ko. E′li okposio mmọ ẹfẹp ke ndidi mme oku, edi enye inamke oro.

Ekpri Samuel iyakke idiọk ekededi akade iso ke ataya anam enye etre ndinam n̄kpọ Jehovah. Edi koro ata esisịt ibat owo ẹma Jehovah, otịm ebịghi nte Jehovah eketịn̄ ikọ ọnọ owo ekededi. Ke Samuel ọkọride okpon esisịt, emi edi se itịbede:

Samuel ede ke ataya ndien uyo edemede enye. Enye ọbọrọ: ‘Se ami mi.’ Ndien enye adaha efehe etiene E′li, onyụn̄ ọdọhọ: ‘Afo okokot mi, se ami mi.’

Edi E′li ọbọrọ: ‘N̄kokotke fi; fiak ka kanana.’ Ntre Samuel afiak akanana.

Ekem ẹfiak ẹkot ọyọhọ ikaba: ‘Samuel!’ Ntre Samuel adaha afiak efehe etiene E′li. ‘Afo okot mi, se ami mi.’ Edi E′li ọbọrọ: ‘N̄kotke, eyen mi. Fiak kanana.’ Ntre Samuel afiak akanana.

Uyo afiak okot utịm ikata ‘Samuel!’ Ntre Samuel efehe etiene E′li. ‘Se ami mi, koro ana edi afo okot mi ini emi.’ E′li ọfiọk ke emi nte ke ana edi Jehovah okot. Ntre enye ọdọhọ Samuel: ‘Fiak kanana, ndien enye ama afiak okot, dọhọ: “Jehovah tịn̄, ke owo fo ke okop.”’

Emi ke Samuel ọdọhọ ke Jehovah afiakde okot. Jehovah ndien ọdọhọ Samuel ete imọ imọn̄ inọ E′li ye nditọ esie ufen. Ke ukperedem Hoph′ni ye Phin′e·has ẹkpa ke ẹkọn̄ ye mme Phi·lis′tine, ndien ke E′li okopde mbụk oro, enye ọwọrọ ọduọ obụn̄ itọn̄ esie ndien akpa. Ntre ikọ Jehovah edi akpanikọ.

Samuel ọkọri, ekem akabare akpatre ebiereikpe Israel. Ke enye ọsọn̄de, mbon obio ẹdọhọ enye: ‘Mek edidem akara nnyịn.’ Samuel iyomke ndinam emi, koro Jehovah ke akpan edi edidem mmọ. Edi Jehovah ọdọhọ enye okop uyo mme owo.

1 Samuel 1:1-28; 2:11-36; 4:16-18; 8:4-9.



Mme Mbụme

  • Ekpri eyeneren oro ke ndise emi ekere didie, ndien mbon eken ẹdi mmanie?
  • Nso akam ke Hannah ọbọn̄ usen kiet ke ini enye akade ataya Jehovah, ndien didie ke Jehovah ọbọrọ akam esie?
  • Samuel edi isua ifan̄ ke ini ẹdade enye edi man edinam utom ke ataya Jehovah, ndien nso ke eka esie esinam ọnọ enye kpukpru isua?
  • Nditọ Eli ẹkere didie, ndien nso orụk owo ke mmọ ẹdi?
  • Didie ke Jehovah okot Samuel, ndien nso etop ke Enye ọnọ enye?
  • Nso ke Samuel akabade edi ke ini enye ọkọride, ndien nso itịbe ke ini enye ọsọn̄de?

Mme mbụme efen

Kpep N̄kpọ En̄wen

NDISE ẸDADE ẸKPEP N̄KPỌ

Samuel ke Temple

Didie ke Jehovah ọdiọn̄ Samuel? Mịn̄ mbre ndise emi, dọn̄ mme ntọi ke nnennen itie, ekem kot mbụk emi ke Bible.

KPEP NDITO FO

Samuel Ama Aka Iso Anam Se Inende

Didie ke afo ekpekpebe Samuel onyụn̄ anam se inende ọkpọkọm mme owo ẹnam ndiọi n̄kpọ?

Kpebe Mbuọtidem Mmọ

Samuel “Continued Growing Up With Jehovah”

What was unusual about Samuel’s childhood? What helped his faith to grow when he was at the tabernacle?