Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 54: Owo emi Okopde Odudu Akan

Mbụk 54: Owo emi Okopde Odudu Akan

NTE AFO ọmọfiọk enyịn̄ owo emi okopde odudu akan owo ekededi akanam odude? Enye edi ebiereikpe ẹkotde Samson. Jehovah ọnọ Samson odudu esie. Idem mbemiso Samson amanade, Jehovah ọdọhọ eka esie: ‘Ibịghike afo eyenyene eyeneren. Enye eyeda iso anyan̄a Israel osio mme Phi·lis′tine ke ubọk.’

Samson ke an̄wana ye ekpe

Mme Phi·lis′tine ẹdi mme idiọk owo ẹdụn̄de ke Ca′naan. Mmọ ẹnyene uwak mbon ekọn̄, ndien mmọ ẹtịm ẹnọmọ Israel. Usen kiet ke Samson akade obio mme Phi·lis′tine, akwa lion ọwọrọ okụni edisobo enye. Edi Samson owot lion oro ke ikpikpu ubọk esie. Enye n̄ko owot ediwak ikie mme idiọk Phi·lis′tine.

Ekem Samson ama n̄wan emi ẹkotde De·li′lah. Mbọn̄ mme Phi·lis′tine ẹn̄wọn̄ọ ẹte ke mmimọ owo kiet kiet iyenọ De·li′lah mbak silver 1,100 ke enye asiande mmọ se inọde Samson odudu ntre. De·li′lah oyom ofụri okụk oro. Enye idịghe ata ufan Samson ye ikọt Abasi. Ntem enye eyịre obụp Samson se inọde enye odudu ntre.

Delilah ye Samson

Ke akpatre, De·li′lah anam Samson asian enye ndịbe odudu esie. Enye ete, ‘Akanam owo isịbeke mi idet.’ ‘Tọn̄ọ nte n̄kamana Abasi ekemek mi ndidi akpan asan̄autom esie ẹkotde Naz′i·rite. Ke ẹkpesịbede idet mi, odudu ọkpọbọhọ mi.’

Ọfọn, ke De·li′lah ọfiọkde emi, enye anam Samson ede ke ifụhi esie. Ndien enye okot owo edisịbe enye idet esie. Ke Samson edemerede, odudu ọbọhọ enye. Mme Phi·lis′tine ndien ẹdimụm enye. Mmọ ẹtịbi enyịn esie mbiba ẹnyụn̄ ẹnam enye ofụn mmọ.

Samson onụk mme adaha ufọk ọduọk

Usen kiet mme Phi·lis′tine ẹnịm akwa usọrọ ndikpono abasi Dagon mmọ, ndien mmọ ẹsio Samson ke n̄kpọkọbi ndisak enye. Ke ini oro, idet Samson afiak ọkọri. Samson ọdọhọ eyenọwọn̄ oro omụmde enye ubọk: ‘Yak mi ntụk mme adaha emi ufọk odorode ke esịt.’ Ndien Samson ọbọn̄ akam ọnọ Jehovah eben̄e odudu, onyụn̄ omụm mme adaha. Enye ofiori: ‘Yak mi n̄kpa ye mme Phi·lis′tine.’ Mme Phi·lis′tine 3,000 ẹdu ke usọrọ oro, ndien ke Samson onụkde idemesie ebere mme adaha, ufọk oro ọduọ owot kpukpru mme idiọk owo emi.

Judges, mme ibuot 13 osim 16.



Mme Mbụme

  • Owo emi okokopde odudu akan owo efen ekededi ekekere didie, ndien anie ọkọnọ enye odudu?
  • Nte ekemede ndikụt ke ndise emi, nso ke Samson anam akwa lion?
  • Nso ndịben̄kpọ ke Samson ayarade ọnọ Delilah ke ndise emi, ndien didie ke emi anam mme Philistine ẹmụm enye?
  • Didie ke Samson owot n̄kpọ nte mme Philistine 3,000 emi ẹdide mme asua ke usen n̄kpa esie?

Mme mbụme efen

Kpep N̄kpọ En̄wen

Kad Mbre Bible Aban̄ade Samson

Kot ban̄a se ikanamde Samson enen̄ede enyene odudu.