Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 53: Un̄wọn̄ọ Jephthah

Mbụk 53: Un̄wọn̄ọ Jephthah
Adiaha Jephthah

NTE akanam afo amanam un̄wọn̄ọ ndien ọsọn̄ fi ndinịm enye ke akpatre? Owo oro odude ke ndise emi ama anam, ndien oro esịn enye otịm ọfụhọ. Owo oro edi owo uko ebiereikpe Israel ẹkotde Jeph′thah.

Jeph′thah odu ke ini nditọ Israel mikponoke Jehovah aba. Mmọ ẹfiak ẹnam idiọk. Ntre Jehovah ayak mbon Am′mon ẹtụk mmọ. Emi anam nditọ Israel ẹseme ẹnọ Jehovah: ‘Nnyịn imedue fi. Mbọk, nyan̄a nnyịn!’

Jephthah ye irenowo esie

Mme owo ẹseme ẹban̄a mme idiọkn̄kpọ emi mmọ ẹnamde. Mmọ ẹwụt ete imeseme ke ndifiak n̄kpono Jehovah. Ntre Jehovah afiak an̄wam mmọ.

Mme owo ẹmek Jeph′thah ndin̄wana ye idiọk mbon Am′mon. Jeph′thah otịm oyom Jehovah an̄wam enye ke ẹn̄wan oro. Ntre enye ọn̄wọn̄ọ ọnọ Jehovah: ‘Ke afo anamde mi n̄kan mbon Am′mon, nnyenọ fi akpa owo oro ọwọrọde ke ufọk mi edisobo mi ke nnyọn̄de ye edikan.’

Jehovah akpan̄ utọn̄ ke un̄wọn̄ọ Jeph′thah, ndien an̄wam enye akan ke ekọn̄. Ke Jeph′thah ọnyọn̄de, nte ọmọfiọk owo emi edide akpa ndisobo ye enye? Edi adiaha esie emi edide n̄kukụre eyen esie. ‘Oh, eyen mi!’ Jeph′thah ofiori. ‘Nso mfụhọ ke afo ada ọsọk mi ntem. Edi mma nnam un̄wọn̄ọ nnọ Jehovah, n̄kemeke ndikpụhọde.’

Ke adiaha Jeph′thah ọfiọkde aban̄a un̄wọn̄ọ esie, ke akpa, enye ọfụhọ n̄ko. Koro ọwọrọ ete enye eyenyene ndikpọn̄ ete esie ye mme ufan. Edi enye eyebiat nsụhọ uwem esie ndinam n̄kpọ Jehovah ke ataya esie ke Shi′loh. Ntre enye ọdọhọ ete esie: ‘Edieke afo akanamde un̄wọn̄ọ ọnọ Jehovah, ana afo onịm enye.’

Ntre, adiaha Jeph′thah aka Shi′loh, ndien enye abiat nsụhọ uwem esie anam n̄kpọ Jehovah ke ataya esie. Usen inan̄ kpukpru isua, iban Israel ẹkese enye do, ndien mmọ ẹnyene edinem ini ọtọkiet. Mme owo ẹma adiaha Jeph′thah koro enye edide ata eti asan̄autom Jehovah.

Judges 10:6-18; 11:1-40.



Mme Mbụme

  • Anie edi Jephthah, ndien enye okodu ke ini ewe?
  • Nso ke Jephthah ọn̄wọn̄ọ ndinam nnọ Jehovah?
  • Ntak emi Jephthah ofụhọde ke ini ọnyọn̄de ke ama akakan mbon Ammon?
  • Nso ke adiaha Jephthah etịn̄ ke ọfiọkde aban̄a se ete esie ọkọn̄wọn̄ọde?
  • Ntak emi mme owo ẹmade adiaha Jephthah?

Mme mbụme efen