Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 52: Gideon ye Mme Owo 300 Esie

Mbụk 52: Gideon ye Mme Owo 300 Esie

NTE AFO omokụt se itịbede mi? Mmọ emi edi mbon ekọn̄ Israel. Mme owo ẹnuhọde do ẹn̄wọn̄ mmọn̄. Gid′e·on ebiereikpe edi owo oro adade ekpere mmọ. Enye ke ese nte mmọ ẹn̄wọn̄de mmọn̄.

Tịm se nsio nsio usụn̄ oro mme owo ẹn̄wọn̄de mmọn̄. Ndusụk ẹkịbi iso mmọ kpukpru ke mmọn̄. Edi kiet ke okoi mmọn̄ ke ubọk esie, man enye ese se itịbede ikanade enye. Emi edi akpan n̄kpọ koro Jehovah ọkọdọhọ Gid′e·on emek kpa mmọ oro ẹkekpemede ke mmọ ẹn̄wọn̄de mmọn̄. Abasi ama ọdọhọ, ẹbịn mmọ eken ẹnyọn̄. Yak ikụt ntak.

Nditọ Israel ẹfiak ẹdụk ekese afanikọn̄. Ntak edi koro mmọ ikopke uyo Jehovah. Mbon Mid′i·an ẹkara mmọ ke ẹnyụn̄ ẹnọmọ mmọ. Ntre nditọ Israel ẹseme ẹnọ Jehovah ẹyom un̄wam, Jehovah okop eseme mmọ.

Jehovah ọdọhọ Gid′e·on ada udịm ekọn̄, ntre Gid′e·on atan̄ mbon en̄wan 32,000 obon ọtọkiet. Edi udịm ekọn̄ owo 135,000 ẹdu ndin̄wana ye Israel. Edi Jehovah osụk ọdọhọ Gid′e·on: ‘Afo emenyene owo awak akaha.’ Nsinam Jehovah ọkọdọhọ oro?

Edi koro ke Israel akande ke ekọn̄ oro, mmọ ẹkpekere ete ikakan ke idem mmimọ. Mmọ ẹkpekere ete mmimọ ikoyomke un̄wam Jehovah ndikan. Ntre Jehovah ọdọhọ Gid′e·on: ‘Dọhọ kpukpru owo ẹkopde ndịk ẹfiak ẹnyọn̄.’ Ke Gid′e·on anamde emi, mbon ekọn̄ esie 22,000 ẹnyọn̄ ufọk. Oro ayak mme owo 10,000 kpọt ndin̄wana ye kpukpru mbon ekọn̄ 135,000 oro.

Gideon ke odomo mme owo esie

Edi, kpan̄ utọn̄! Jehovah ọdọhọ: ‘Afo ke osụk enyene owo awak akaha.’ Ntre enye ọdọhọ Gid′e·on anam mme owo ẹn̄wọn̄ mmọn̄ ke idịm emi ndien ọnọ kpukpru owo emi ẹkịbide iso ẹn̄wọn̄ mmọn̄ ẹnyọn̄. Jehovah ọn̄wọn̄ọ, ‘Nyenọ fi edikan ye mme owo 300 emi ẹkekpemede nte ẹn̄wọn̄de mmọn̄.’

Ini en̄wan edikem. Gid′e·on esịn mme owo 300 esie ke ikpehe ita. Enye ọnọ owo kiet kiet obukpon̄, aban̄ ye nsadan̄ ikan̄ ke esịt. Ke ekperede ufọt okoneyo mmọ ẹsobo ẹkanade nna mbon ekọn̄ asua. Do ke ukem ini, mmọ kpukpru ẹfụri mme obukpon̄ ẹnyụn̄ ẹnuak mme aban̄ mmọ, ẹfiori: ‘Ofụt Jehovah ye eke Gid′e·on!’ Ke mbon ekọn̄ asua ẹdemerede, esịt otịmede mmọ ye ndịk. Mmọ kpukpru ẹtọn̄ọ ndifehe, ndien nditọ Israel ẹkan ke ekọn̄.

Judges ibuot 6 osịm 8.



Mme Mbụme

  • Didie, ndien ntak emi nditọ Israel ẹdụkde ekese afanikọn̄?
  • Ntak emi Jehovah ọdọhọde Gideon ke enye enyene mme owo awak akaha ke udịmekọn̄ esie?
  • Owo ifan̄ isụhọ ke Gideon ama ọkọdọhọ mbon ndịk ẹnyọn̄ọ ufọk?
  • Da ndise emi nam an̄wan̄a nte Jehovah osụhọrede ibat udịmekọn̄ Gideon ekesịm owo 300 kpọt.
  • Didie ke Gideon etịm owo 300 esie, ndien didie ke Israel ẹkan ke ekọn̄ oro?

Mme mbụme efen