Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 51: Ruth ye Naomi

Mbụk 51: Ruth ye Naomi

KE BIBLE, afo eyekụt n̄wed ẹkotde Ruth. Enye edi mbụk ubon oro okodude ke ini Israel ẹkenyenede mme ebiereikpe. Ruth edi n̄kaiferi idụt Moab; enye itoho idụt Israel Abasi. Edi ke Ruth ọfiọkde aban̄a Abasi akpanikọ, Jehovah, enye otịm edima enye. Na′o·mi edi n̄wan ọsọn̄de akan emi akan̄wamde Ruth ekpep aban̄a Jehovah.

Na′o·mi edi n̄wan Israel. Enye ye ebe esie ye nditọ iren iba ẹma ẹkedụn̄ ke idụt Mo′ab ke ini udia akananade ke Israel. Do usen kiet, ebe Na′o·mi akpa. Ekem nditọ iren Na′o·mi ẹdọ nditọ iban Mo′ab iba ẹkotde Ruth ye Or′pah. Edi ke ebede n̄kpọ nte isua 10, nditọ Na′o·mi iba ẹkpa. Na′o·mi ye nditọ iban iba ẹmi ẹkefụhọ didie ntem! Nso ke Na′o·mi edinam ke emi?

Usen kiet, Na′o·mi ebiere ndinam anyan isan̄ mfiak mbịne ikọt esie. Ruth ye Or′pah ẹyom nditie ye enye, ntre, mmọ ẹtiene ẹsan̄a. Edi ke mmọ ẹma ẹkesan̄a esisịt ke usụn̄, Na′o·mi ọwọn̄ọde ọdọhọ nditọ iban oro ete: ‘Ẹfiak ẹnyọn̄ ẹketie ye eka mbufo.’

Na′o·mi ọkọm nditọ iban oro unyọn̄. Ke oro, mmọ ẹtọn̄ọ nditua, koro mmọ ẹmade Na′o·mi etieti. Mmọ ẹte: ‘Ih-ih! Nnyịn iyedi itiene ikọt fo.’ Edi Na′o·mi ọbọrọ: ‘Ana mbufo ẹfiak ẹnyọn̄, nditọ mi. Eyefọn akan ọnọ mbufo ke ufọk.’ Ntre Or′pah adaha ọnyọn̄. Edi Ruth inyọn̄ke.

Na′o·mi ọwọn̄ọde ọdọhọ enye ete: ‘Or′pah ọmọnyọn̄. Afo n̄ko tiene enye nyọn̄.’ Edi Ruth ọbọrọ: ‘Kudomo ndinam mi n̄kpọn̄ fi! Yak mi ntiene fi. Nyeka ebiet afo akade, nyedụn̄ ke ebiet afo odụn̄de. Ikọt fo eyedi ikọt mi, Abasi fo eyenyụn̄ edi Abasi mi. Nyekpa ke ebiet afo akpade, nyenyụn̄ mbụhọ do.’ Ke Ruth ọdọhọde ntem, Na′o·mi idomoke aba ndinam enye ọnyọn̄.

Ke akpatre, iban iba ẹmi ẹsịm Israel. Mmọ ẹdụn̄ mi. Iwiwa, Ruth ọtọn̄ọ ndinam utom ke in̄wan̄, koro edi ini ukpen̄e barley. Eren emi ẹkotde Boaz ayak enye atan̄ barley ke in̄wan̄ esie. Nte ọmọfiọk owo emi eka Boaz ekedide? Ekedi Ra′hab obio Jer′i·cho.

Usen kiet, Boaz asian Ruth: ‘Mmokop kpukpru mban̄a fi, ye nte afo ọkọfọnde ido ye Na′o·mi. Mmọfiọk nte ọkọkpọn̄de usọ ye uka ye idụt fo ye nte ekedidụn̄de ye mbon emi afo mukọfiọkke. Jehovah osụk ọfọn ye afo!’

Ruth ọbọrọ ete: ‘Afo ọmọfọn ye ami akaha, ete. Enem mi nte afo etịn̄de eti ikọ ye ami.’ Bo′az ama Ruth etieti, ndien ibịghike mmọ ẹdọ ndọ. Emi otịm enem Na′o·mi didie! Edi esịt enem Na′o·mi akan ke Ruth ye Bo′az ẹnyenede akpa eyeneren mmọ, O′bed. Ekem O′bed akabade edi ete ete David, emi nnyịn idikpepde ekese iban̄a ke ukperedem.

Ruth ye Naomi

N̄wed Ruth eke Bible.



Mme Mbụme

  • Naomi asan̄a didie edidu ke idụt Moab?
  • Ruth ye Orpah ẹdi mmanie?
  • Didie ke Ruth ye Orpah ẹnam n̄kpọ ke ini Naomi ọdọhọde mmọ ẹfiak ẹnyọn̄ ẹbịne ikọt mmọ?
  • Anie edi Boaz, ndien didie ke enye an̄wam Ruth ye Naomi?
  • Eyen emi amanade ọnọ Boaz ye Ruth ekere didie, ndien ntak nnyịn ikpetide enye?

Mme mbụme efen

Kpep N̄kpọ En̄wen

Ruth Edi Ata Eti Ufan

Kpa ye oro Ruth mîkedịghe eyen Israel, Abasi ama ama onyụn̄ enen̄ede ọdiọn̄ enye.