Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 50: Iban Uko Iba

Mbụk 50: Iban Uko Iba

KE NDITỌ Israel ẹdụkde afanikọn̄, mmọ ẹseme ẹnọ Jehovah. Jehovah ọbọrọ mmọ ke ndinọ mbon uko mme adaiso ndin̄wam mmọ. Bible okot mme adaiso emi mme ebiereikpe. Joshua ekedi akpa ebiereikpe, ndien ndusụk mme ebiereikpe ẹtienede enye ẹkedi Oth′ni·el, E′hud ye Sham′gar. Edi iba ke otu mbon oro ẹken̄wamde Israel ẹkedi iban ẹkotde Deb′o·rah ye Ja′el.

Deborah ke etịn̄ ikọ ọnọ Barak

Deb′o·rah edi prọfet an̄wan. Jehovah ọnọ enye ntọt aban̄a ini iso, ndien enye asian mme owo se Jehovah ọdọhọde. Deb′o·rah edi n̄ko ebiereikpe. Enye etie ke idak eyop ke obio obot, ndien mme owo edi ẹtiene enye ndibọ un̄wam ke mme mfịna mmọ.

Ke ini emi, Ja′bin edi edidem Ca′naan. Enye enyene chariot 900. Udịm ekọn̄ esie otịm ọsọn̄ tutu ẹnyịk ediwak nditọ Israel ẹkabade ifụn Jabin. Etubom ekọn̄ Edidem Ja′bin edi Sis′e·ra.

Usen kiet, Deb′o·rah ọdọn̄ ẹkot Ba′rak Ebiereikpe, onyụn̄ ọdọhọ enye: ‘Jehovah ọdọhọ: “Da owo 10,000 ka Obot Ta′bor. Nyeda Sis′e·ra nsọk fi do. Ndien nyenam fi akan enye ye udịm ekọn̄ esie.”’

Ba′rak asian Deb′o·rah, ete: ‘Nyeka ke afo editienede mi aka.’ Deb′o·rah etiene aka, edi enye ọdọhọ Ba′rak: ‘Afo ududaha ukpono ke erikan, koro Jehovah eyeda Sis′e·ra esịn n̄wan ke ubọk.’ Ndien emi edi se itịbede.

Ba′rak ọsụhọde ke Obot Ta′bor ndisobo ye udịm ekọn̄ Sis′e·ra. Iwiwa, Jehovah anam ukwọ odu, ndien ata ediwak mme asua ẹden̄i. Edi Sis′e·ra ọsụhọde ke chariot esie ndien efehe.

Barak, Jael, ye Sisera

Ibịghike, Sis′e·ra edi ke tent Ja′el. Enye okot enye odụk edi, ndien ọnọ enye mmon̄eba. Emi anam enye idap, ndien ibịghike enye otịm ede. Ekem Ja′el ada ọkpọhọ tent ọkọn̄ esịn idiọk owo emi ke ibuot. Ekem, ke Ba′rak edide, enye owụt enye Sis′e·ra oro akpade. Ntre afo omokụt, se Deb′o·rah eketịn̄de ama osu.

Ke akpatre, ẹwot Edidem Ja′bin n̄ko, ndien nditọ Israel ẹfiak ẹnyene emem ke ndusụk ini.

Judges 2:14-22; 4:1-24; 5:1-31.



Mme Mbụme

  • Mmanie ẹdi mme ebiereikpe, ndien ndusụk mmọ ẹkere didie?
  • Nso akpan ifetutom ke Deborah enyene, ndien nso ke emi abuana?
  • Ke ini Edidem Jabin ye etubom ekọn̄ esie, Sisera, ẹdịghede Israel, nso etop emi otode Jehovah ke Deborah ọnọ Barak Ebiereikpe, ndien anie ke enye ọdọhọ ke edida ukpono?
  • Didie ke Jael owụt ke imọ idi n̄wan uko?
  • Nso itịbe ke Edidem Jabin akpade?

Mme mbụme efen