Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 48: Mbon Ọniọn̄ Nditọ Gibeon

Mbụk 48: Mbon Ọniọn̄ Nditọ Gibeon

EDIWAK obio ke Ca′naan eben̄e idem ke emi ndin̄wana ye Israel. Mmọ ẹkere ẹte imekeme ndikan. Edi mbon obio Gib′e·on ẹdude ẹkpere ikereke ntre. Mmọ ẹnịm ẹte Abasi ke an̄wam nditọ Israel, ndien mmọ iyomke ndin̄wana ye Abasi. Ntre nte ọmọfiọk se mbon Gib′e·on ẹnamde?

Mmọ ẹbiere ndinam etie nte n̄kpọ emi mmọ ẹdụn̄de ke ata anyan usụn̄. Ntre ndusụk owo oro ẹsịne ntaha ọfọn̄ ye ntaha ikpa ukot. Mmọ ẹtan̄ ntaha ekpat ẹnọ mme ass mmọ ẹbiom, ẹnyụn̄ ẹda ndusụk n̄kani nsasat uyo. Ndien mmọ ẹbịne Joshua ẹkedọhọ: ‘Nnyịn ito ata anyan idụt, koro nnyịn ikokopde iban̄a akwa Abasi mbufo, Jehovah. Nnyịn ima ikop kpukpru se enye akanamde ọnọ mbufo ke Egypt. Ntre mbon nnyịn ẹdọhọ nnyịn ida ndusụk udia idaha isan̄ ndien ididọhọ mbufo: “Nnyịn idi ifụn mbufo. Ẹn̄wọn̄ọ ẹte mbufo idin̄wanake ekọn̄ ye nnyịn.” Mbufo ẹmekeme ndikụt nte mme ọfọn̄ nnyịn ẹtahade oto anyan isan̄ nnyịn, n̄ko nte uyo nnyịn ẹkani ẹnyụn̄ ẹsat.’

Joshua ye mbon eken ẹnịm mbon Gib′e·on ke akpanikọ. Ntre mmọ ẹn̄wọn̄ọ ete idin̄wanake ye mmọ. Edi usen ita ẹbede, mmọ ẹfiọk ẹte, mbon Gib′e·on ẹnen̄ere ẹdụn̄ ẹkpere.

Joshua obụp mmọ, ‘Nsinam mbufo ẹkesiande nnyịn ẹte mbufo ẹto anyan idụt?’

Mbon Gib′e·on ẹbọrọ: ‘Nnyịn ikanam ntre sia ikokopde ite Jehovah Abasi mbufo ama ọn̄wọn̄ọ ndinọ mbufo ofụri isọn̄ Ca′naan emi. Ntre nnyịn ima ifehe ndịk nte mbufo ẹyewot nnyịn.’ Edi nditọ Israel ẹma ẹnịm un̄wọn̄ọ mmọ, ndien mmọ iwotke mbon Gib′e·on. Utu ke oro, mmọ ẹnam mmọ ẹdi ifụn mmọ.

Edidem Jerusalem ayat esịt koro mbon Gib′e·on ẹnam emem ye Israel. Ntre enye ọdọhọ ndidem inan̄ efen ete: ‘Ẹdin̄wam mi n̄wana ye Gib′e·on.’ Ndien oro ke ndidem ition emi ẹnam. Nte mbon Gib′e·on ẹma ẹnyene ọniọn̄ ndinam emem ye Israel, esịnde ndidem emi ke emi edi ndin̄wana ye mmọ? Nnyịn iyekụt.

Joshua 9:1-27; 10:1-5.

Joshua ye mbon Gibeon


Mme Mbụme

  • Didie ke mbon Gibeon ẹkpụhọde ye mbon Canaan emi ẹdude ke mme n̄kpet n̄kpet obio?
  • Nte ẹwụtde ke ndise emi, nso ke mbon Gibeon ẹnam, ndien ntak-a?
  • Nso ke Joshua ye mbọn̄ Israel ẹn̄wọn̄ọ ndinam nnọ mbon Gibeon, edi nso ke mmọ ẹdifiọk ke usen ita ẹbede?
  • Nso itịbe ke ini ndidem obio eken ẹkopde ke mbon Gibeon ẹnam emem ye Israel?

Mme mbụme efen