Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 45: Ndibe Akpa Jordan

Mbụk 45: Ndibe Akpa Jordan

SESE! nditọ Israel ke ẹbe Akpa Jordan! Edi mmọn̄ odu m̀mọ̀n̄? Koro ekese edịm edepde ini oro ke isua, akpa ama otịm ọyọhọ minit ifan̄ ebede. Edi kemi, mmọn̄ oro kpukpru idụhe! Ndien nditọ Israel ke ẹsan̄a ke nsat isọn̄ ẹbe kpa nte ẹkenamde ke Ididuot Inyan̄! Kpukpru mmọn̄ oro ẹkeka mmọn̄? Yak ise.

Nditọ Israel ke ẹbe Akpa Jordan

Ke ama edisịm ini nditọ Israel ndibe Akpa Jordan, Jehovah ọdọhọ Joshua asian mme owo ete: ‘Yak mme oku ẹmen ekebe ediomi ẹbe nnyịn iso. Ke ini mmọ ẹdebide ikpat ke mmọn̄ Akpa Jordan, do, mmọn̄ eyetuak ada.’

Ntre mme oku ẹmen ekebe ediomi, ẹnyụn̄ ẹbiom enye ẹbem mme owo iso. Ke mmọ ẹdisịmde Jordan, mme oku ẹdebi ikpat ke mmọn̄. Mmọn̄ ke efehe ata ọkpọsọn̄ ọkpọsọn̄ onyụn̄ ọtụn̄ọ. Edi ndo ndo oro ikpat mmọ otụkde mmọn̄, mmọn̄ ọtọn̄ọ ndituak nda! Edi utịbe n̄kpọ! Jehovah ekwe mmọn̄ abaha ke enyọn̄ enyọn̄. Ntre, ibịghike, mmọn̄ idụhe aba ke akpa!

Mme oku ẹmi ẹbiomde ekebe ediomi ẹsan̄a nnennen esịm ufọt nsat akpa. Nte omokụt mmọ ke ndise? Nte mmọ ẹdade do, kpukpru nditọ Israel ẹsan̄a ẹbe Akpa Jordan ke nsat isọn̄!

Ke kpukpru owo ẹma ẹkebe, Jehovah anam Joshua ọdọhọ n̄kpọsọn̄ irenowo 12: ‘Ẹdụk ke akpa ke ebiet mme oku ẹdade ye ekebe ediomi. Ẹmen itiat 12 ẹnyụn̄ ẹbok mmọ ke ebiet nna mbufo okoneyo emi. Do, ke ini iso, ke nditọ mbufo ẹbụpde se mme itiat ẹmi ẹwọrọde, mbufo ẹsian mmọ ẹte ke mmọn̄ ẹketuak ẹda ke ekebe ediomi Jehovah ebede Jordan. Mme itiat oro ẹyeti mbufo utịbe n̄kpọ emi!’ Joshua n̄ko ama obok mme itiat 12 ke ebiet mme oku ẹkedade ke isọn̄ akpa.

Joshua

Ke akpatre, Joshua asian mme oku ẹbiomde ekebe ediomi ete: ‘Ẹsan̄a ẹwọrọ ke Jordan.’ Ndien ndo ndo oro mmọ ẹnamde, akpa afiak ọtọn̄ọ nditọ mbe.

Joshua 3:1-17; 4:1-18.



Mme Mbụme

  • Nso utịben̄kpọ ke Jehovah anam man nditọ Israel ẹkeme ndibe Akpa Jordan?
  • Nso edinam mbuọtidem ke nditọ Israel ẹnyene ndinam man ẹbe Akpa Jordan?
  • Ntak emi Jehovah ọdọhọde Joshua atan̄ ikpọ itiat 12 ke isọn̄ akpa oro?
  • Nso itịbe ke ndondo oro mme oku ẹsan̄ade ẹwọrọ ke Jordan?

Mme mbụme efen