Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 40: Moses Amia Itiat

Mbụk 40: Moses Amia Itiat

ISUA ke isua ẹbe—isua 10, isua 20, isua 30, isua 39! Edi nditọ Israel ẹsụk ẹdu ke wilderness. Edi ke ofụri mme isua ẹmi, Jehovah ese aban̄a ikọt esie. Enye ọbọk mmọ ye manna. Enye ada mmọ usụn̄ ke uwemeyo ye adaha obubịt enyọn̄ ndien ye adaha ikan̄ ke okoneyo. Ndien ke kpukpru isua ẹmi, ọfọn̄ mmọ itahake, ukot mmọ inyụn̄ ibiakke.

Idahaemi edi akpa ọfiọn̄ ọyọhọ isua 40 tọn̄ọ nte ẹkekpọn̄ Egypt. Nditọ Israel ẹfiak ẹnam nna ke Ka′desh. Emi edi itie mmọ ẹkedude ke ini ẹkedọn̄de mbon uyep 12 ẹkeyep isọn̄ Ca′naan n̄kpọ nte isua 40 ẹbede. Eyeneka Moses an̄wan, Mir′i·am akpa ke Ka′desh. Ndien, nte ke mbemiso, ntịme odu mi.

Mme owo ikwe mmọn̄ ndomokiet. Ntre mmọ ẹseme ẹnọ Moses: ‘Ọkpọfọn akan nnyịn ndikpa. Ntak afo okosion̄ode nnyịn ke Egypt edisịn ke utọ idiọk itie emi n̄kpọ midikọrike? Ibokpot idụhe, fig idụhe, mme grape idụhe, ‘pomegranate’ idụhe. Ukpọk mmọn̄ idụhe ndin̄wọn̄.’

Moses amia itiat

Ke ini Moses ye Aaron ẹkade ataya ndibọn̄ akam, Jehovah ọdọhọ Moses: ‘Bon mme owo ọtọkiet. Ndien ke iso mmọ kpukpru, tịn̄ ikọ ye itiat oko. Ediwak mmọn̄ eyewọrọ do ọnọ mme owo ye mme unam mmọ.’

Ntre Moses obon mme owo, onyụn̄ ọdọhọ: ‘Ẹkpan̄ utọn̄, mbufo emi mibuọtke idem ye Abasi! Nte ami ye Aaron inyene ndida mmọn̄ ke itiat emi nnọ mbufo?’ Ndien Moses amia itiat oro ikaba ye esan̄, ndien ata ediwak mmọn̄ ọbun̄ọ ọwọrọ ke itiat oro. Mmọn̄ odu ekem se kpukpru owo ye mme ufene oro ẹn̄wọn̄de.

Edi Jehovah ayat esịt ye Moses ye Aaron. Nte ọmọfiọk ntak? Edi koro Moses ye Aaron ẹkedọhọ ete ke mmimọ iyesio mmọn̄ ito itiat oro. Edi ke akpanikọ, Jehovah akanam oro. Ndien koro Moses ye Aaron iketịn̄ke akpanikọ iban̄a se iketịbede, Jehovah ete ke imọ iyenọ mmọ ufen. Enye ọdọhọ, ‘Mbufo ididaha ikọt mi usụn̄ isịm Ca′naan.’

Ibịghike nditọ Israel ẹkpọn̄ Ka′desh. Ke esisịt ini ebede, mmọ ẹdisịm obot Hor. Mi ke enyọn̄ obot oro, Aaron akpa. Enye ekedi isua 123 ke ini n̄kpa esie. Nditọ Israel ẹfụhọ etieti, ntre ke usen 30, mmọ ẹtuan̄a Aaron. Eyen esie E·le·a′zar akabade edi akwa oku efen ọnọ idụt Israel.

Numbers 20:1-13, 22-29; Deuteronomy 29:5.



Mme Mbụme

  • Didie ke Jehovah ese aban̄a nditọ Israel ke ini mmọ ẹdude ke wilderness?
  • Nso ke nditọ Israel ẹseme ẹban̄a ke ini ẹnamde nna ke Kadesh?
  • Didie ke Jehovah ọnọ mme owo ye unam, mmọn̄?
  • Ke ndise emi, anie owụk ubọk ke esịt esie, ndien ntak emi enye anamde ntre?
  • Ntak emi Jehovah ayatde esịt ye Moses ye Aaron, ndien didie ke ẹnọ mmọ ufen?
  • Nso itịbe ke Obot Hor, ndien anie akabade edi akwa oku ke Israel?

Mme mbụme efen

Kpep N̄kpọ En̄wen

Kad Mbre Bible Aban̄ade Moses

Ndi ama ọfiọk ke Moses edi akpa owo ke Bible emi akanamde utịben̄kpọ? Sio kad mbre Bible emi da kpep ban̄a emi.

FEBRUARY 2013 Se Ikpepde Ito Moses

Se nti edu ita emi Moses ekenyenede ye se ikemede ndikpep nto enye.