Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 38: Mbon Uyep 12

Mbụk 38: Mbon Uyep 12
Mbon uyep Israel ẹkama mfri

SE MFRI emi mme owo emi ẹkamade. Sese nte etuek grape oro okponde. Ada owo iba ye eto ndikeme ndimen enye. N̄ko se mme fig ye mme ‘pomegranate’ oro. Mmọn̄ ke ndiye mfri emi ẹto? Ẹto isọn̄ Ca′naan. Ti, Ca′naan edi ebiet emi Abraham, Isaac ye Jacob ẹkedụn̄de. Edi ke ntak akan̄ do, Jacob ye ubon esie ẹkpọn̄ ẹka Egypt. Idahaemi ke n̄kpọ nte isua 216 ẹbede, Moses ke ada nditọ Israel usụn̄ afiak ke Ca′naan. Mmọ ẹdisịm ebiet emi ẹkotde Ka′desh ke Wilderness.

Mme idiọk owo ẹdụn̄ ke isọn̄ Ca′naan. Ntre Moses ọdọn̄ mbon uyep 12, onyụn̄ ọdọhọ mmọ: ‘Ẹkese mme owo ifan̄ ẹdụn̄ do, ye nte mmọ ẹsọn̄de odudu. Ẹfiọk mme isọn̄ oro ọfọn se etọde mme n̄kpọ. Ẹkụt ẹte imada ndusụk mfri idi.’

Ke mbon uyep ẹfiakde ẹdi Ka′desh, mmọ ẹdọhọ Moses ẹte: ‘Edi ata eti isọn̄ ke akpan.’ N̄ko man ẹsọn̄ọ oro, mmọ ẹwụt Moses ndusụk mfri. Edi 10 ke otu mbon uyep oro ẹte: ‘Mme owo ẹmi ẹdụn̄de do ẹkpon ẹnyụn̄ ẹkop odudu. Ẹyewot nnyịn ke nnyịn idomode ndida isọn̄ oro.’

Nditọ Israel ẹkop ndịk ke mmọ ẹkopde emi. Mmọ ẹte, ‘Ọkpọfọn akan ndikakpa ke Egypt mme ke idem wilderness emi. Ẹyẹwot nnyịn ke ẹkọn̄ ndien ẹtan̄ iban nnyịn ye nditọ. Yak imek obufa adausụn̄ utu ke Moses, inyụn̄ ifiak ke Egypt!’

Edi iba ke otu mbon uyep oro ebuọt idem ye Jehovah ẹnyụn̄ ẹdomo ndisụk mme owo esịt. Enyịn̄ mmọ edi Joshua ye Ca′leb. Mmọ ẹte: ‘Ẹkufehe ndịk. Jehovah odu ye nnyịn. Eyemem ndida isọn̄ oro.’ Edi mme owo ikpan̄ke utọn̄. Mmọ ẹkam ẹyom ndiwot idem Joshua ye Ca′leb.

Emi ayat Jehovah esịt etieti, ndien enye ọdọhọ Moses ete: ‘Tọn̄ọde ke owo isua 20 ke emana dọk, mmọ ndomokiet ididụkke isọn̄ Ca′naan. Mmọ ẹma ẹkụt utịbe n̄kpọ oro n̄kanamde ke Egypt ye ke wilderness, edi mmọ ibuọtke idem ye ami. Ntre mmọ ẹyeyo ke wilderness isua 40 tutu akpatre owo mmọ akpa. Kpasụk Joshua ye Ca′leb kpọt ẹdidụk isọn̄ Ca′naan.’

Numbers 13:1-33; 14:1-38.



Mme Mbụme

  • Nso ke afo okụt ke etuek grape oro odude ke ndise emi, ndien ẹkeda enye ẹto m̀mọ̀n̄?
  • Ntak emi Moses ọdọn̄de mbon uyep 12 ẹka isọn̄ Canaan?
  • Nso ke mbon uyep duop ẹtịn̄ ẹnọ Moses?
  • Didie ke mbon uyep iba ẹwụt mbuọtidem ke Jehovah, ndien mmọ ẹkere didie?
  • Ntak emi Jehovah ayatde esịt-e, ndien nso ke enye ọdọhọ Moses?

Mme mbụme efen

Kpep N̄kpọ En̄wen

KAD MBRE BIBLE

Kad Mbre Bible Aban̄ade Joshua

Didie ke Joshua ye mbonekọn̄ esie ẹkenam ibibene Jericho ọduọ? Mịn̄ kad mbre Bible emi, da kpep ban̄a owo uko emi ke Bible.