Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 37: Ataya Utuak Ibuot

Mbụk 37: Ataya Utuak Ibuot

NTE AFO ọmọfiọk se ufọk emi edide? Enye edi akpan ataya utuak ibuot ọnọ Jehovah. Ẹkot enye n̄ko ‘tabernacle.’ Mmọ ẹkekụre ndibọp enye isua kiet ke ẹma ẹkekpọn̄ Egypt. Nte ọmọfiọk owo oro ọkọnọde ekikere ndibọp enye?

Tabernacle

Ekedi ekikere Jehovah. Ke Moses okodude ke Obot Si′nai, Jehovah ama asian enye ete ẹbọp enye. Enye ọkọdọhọ ẹnam enye nte ememde ndikpọk enye n̄kama. Ke usụn̄ emi ẹyekeme ndimen mbak oro n̄ka ebiet efen, ndien do ẹfiak ẹwụk enye. Ntre ke ini nditọ Israel ẹsan̄ade ke ebiet ke ebiet, ke wilderness, mmọ ẹma ẹmen ataya oro ẹsan̄a.

Ke afo esede esịt ekpri ubet oro odude ke mben ataya, afo eyekụt ekpri ekebe. Ẹkot emi ekebe ediomi. Enye enyene mme angel mme mme cherub o-gold iba, kiet ke mbuot kiet. Abasi ama afiak ewet Ibet Duop oro ke n̄kpakpana itiat iba efen, koro Moses ama obom akpa oro. Ndien ẹma ẹnịm mme itiat emi ke esịt ekebe ediomi oro. Ẹma ẹsịn n̄ko otu manna kiet ke esịt esie. Nte afo emeti se manna edide?

Aaron eyeneka Moses ekedi kiet oro Jehovah ekemekde nte akwa oku. Enye ada mme owo usụn̄ ke utuak ibuot Jehovah. Nditọ esie edi mme oku n̄ko.

Idahaemi se akamba ubet ataya oro. Enye okpon ikaba akan ekpri ubet oro. Nte omokụt ekebe oro nsụn̄ikan̄ ọwọrọde ọdọk? Emi edi itie uwa oro mme oku ẹsifọpde enem utebe n̄kpọ ẹkotde ‘incense.’ N̄ko udiọk utuenikan̄ ye utuenikan̄ itiaba ẹdu. Ọyọhọ n̄kpọ ita ke ubet oro edi okpokoro. Ẹdori eboho uyo 12 ke esịt.

Ke okụre ataya oro, akwa usan mme basin ọyọhọde ye mmọn̄ odu. Mme oku ẹda enye ẹyet n̄kpọ. Akamba itie uwa odu n̄ko. Mi ke ẹfọp mme okpo unam nte uwa ẹnọ Jehovah. Ataya emi odu ke ata ufọt nna, ndien nditọ Israel ẹdụn̄ ke mme ataya mmọ ẹkan enye ẹkụk.

Exodus 25:8-40; 26:1-37; 27:1-8; 28:1; 30:1-10, 17-21; 34:1, 2; Mme Hebrew 9:1-5.



Mme Mbụme

  • Ẹkot didie ufọk emi ke ndise emi, ndien nso ke ẹsinam do?
  • Ntak oro Jehovah ọkọdọhọde Moses ọbọp ataya emi ke usụn̄ oro ememde ndikpọk enye n̄kama?
  • Nso ekebe idi emi ke ekpri ubet oro odude ke mben ataya, ndien nso isịne ke ekebe emi?
  • Anie ke Jehovah emek nte akwa oku, ndien nso ke akwa oku esinam?
  • Siak n̄kpọ ita emi ẹdude ke akamba ubet ataya oro.
  • Nso n̄kpọ iba idu ke okụre ataya oro, ndien ẹsida mmọ ẹnam nso?

Mme mbụme efen