Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 36: Eyen Enan̄ O-Gold

Mbụk 36: Eyen Enan̄ O-Gold

OH, OH! Nso ke mme owo ẹnam idahaemi? Mmọ ẹbọn̄ akam ẹnọ eyenenan̄! Ntak mmọ ẹnamde emi-e?

Ke ini Moses ebịghide ke enyọn̄ obot, mme owo ẹte: ‘Nnyịn ifiọkke se itịbede ye Moses. Ntre yak inam abasi ndida nnyịn n̄wọrọ ke isọn̄ emi.’

Moses otop itiatn̄wed iba oro ọduọk

Aaron, eyeneka Moses ọbọrọ, ‘Ọfọn.’ ‘Ẹsio n̄kpanuen utọn̄ o-gold mbufo ẹda ẹsọk mi.’ Ke mme owo ẹnamde oro, Aaron atara mmọ anam eyenenan̄ o-gold. Ndien mme owo oro ẹdọhọ: ‘Emi edi Abasi nnyịn emi okosiode nnyịn ke Egypt.’ Ndien nditọ Israel ẹnịm akamba usọrọ, ẹnyụn̄ ẹtuak ibuot ẹnọ eyenenan̄ o-gold oro.

Ke Jehovah okụtde emi, esịt otịm ayat enye. Ntre enye ọdọhọ Moses: ‘Sọp sụhọde. Mme owo emi ke ẹnam se idiọkde etieti. Mmọ ẹmefre mme ibet mi, ke ẹnyụn̄ ẹtuak ibuot ẹnọ eyenenan̄ o-gold.’

Mme owo ke ẹtuak ibuot ẹnọ eyen enan̄ o-gold

Moses ọsọp ọsụhọde ke obot. Ndien ke enye asan̄ade ekpere, emi ke enye okụt. Mme owo ke ẹkwọ ẹnyụn̄ ẹnek ẹkanade eyenenan̄ o-gold! Moses ayat esịt etieti tutu enye otop mme n̄kpakpana itiat iba oro ye mme ibet ke esịt ọduọk, ndien mmọ ẹbomo ke uwak mbak. Enye ndien ẹmen eyenenan̄ oro atara ke ikan̄. Ekem, ọkọk enye akabade ntọn̄.

Mme owo emi ẹnam ata idiọkn̄kpọ. Ntre Moses ọdọhọ ndusụk owo ke otu mmọ ẹsion̄o ofụt mmọ. Moses ete, ‘Mme idiọk owo emi ẹketuakde ibuot ẹnọ eyenenan̄ o-gold ẹnyene ndikpa.’ Ntre irenowo oro ẹsịbe mme owo 3,000 ẹwot! Nte emi iwụtke nte inyene ndikpeme ndituak ibuot nnọ Jehovah ikpọn̄, inyụn̄ idịghe nsunsu mme abasi ẹkẹdedi?

Exodus 32:1-35.



Mme Mbụme

  • Nso ke mme owo ke ndise emi ẹnam, ndien ntak-a?
  • Ntak emi Jehovah ayatde esịt-e, ndien nso ke Moses anam ke ini enye okụtde se mme owo ẹnamde?
  • Nso ke Moses ọdọhọ ndusụk irenowo ẹnam?
  • Nso ke nnyịn ikpekpep ito mbụk emi?

Mme mbụme efen