Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 35: Jehovah Ọnọ Mme Ibet Esie

Mbụk 35: Jehovah Ọnọ Mme Ibet Esie

N̄KPỌ nte ọfiọn̄ iba ke ẹma ẹkekpọn̄ Egypt, nditọ Israel ẹdisịm obot Si′nai emi ẹkotde n̄ko Ho′reb. Emi edi ukem ebiet oro Jehovah ẹketịn̄de ikọ ọnọ Moses ke ikọt oro mitaha ikan̄. Mme owo ẹnam nna mi ẹnyụn̄ ẹdu ke ekpri ini.

Nte mme owo ẹbetde ke idak, Moses ọdọk obot. Do ke ẹnyọn̄ obot, Jehovah ọdọhọ Moses ete Imọ iyom nditọ Israel ẹkop item Imọ ẹnyụn̄ ẹkabade ẹdi asan̄a san̄a idụt imọ. Ke Moses ọsụhọrede edi, enye asian nditọ Israel se Jehovah ọdọhọde. Ndien mmọ ẹdọhọ ete iyekop item Jehovah, koro mme imọ iyom ndidi ikọt esie.

Jehovah ndien anam esen n̄kpọ. Enye anam nsụn̄ikan̄ ofụk enyọn̄ obot oro, onyụn̄ osion̄o ọkpọsọn̄ obuma. Enye n̄ko etịn̄ ikọ ọnọ mme owo oro: ‘Ami ndi Jehovah Abasi mbufo emi n̄kosion̄ode mbufo ke Egypt.’ Ndien enye owụk ete: ‘Kunyene Abasi efen ukọrọ ye ami.’

Itiatn̄wed iba

Abasi ọnọ nditọ Israel mme ewụhọ mme ibet usụkkiet efen. Mme owo oro ẹfehe ndịk etieti. Mmọ ẹdọhọ Moses: ‘Afo tịn̄ ye nnyịn koro ndịk anam nnyịn nte edieke Abasi etịn̄de ye nnyịn, nnyịn iyekpa.’

Ekem Jehovah ọdọhọ Moses: ‘Dọk bịne mi ke obot. Nnyenọ fi n̄kpakpana itiat iba emi n̄wetde mme ibet oro nyomde mme owo ẹnịm.’ Ntre Moses afiak ọdọk obot. Ke okoneyo ye uwemeyo 40 enye odu do.

Abasi enyene ata ediwak ibet ọnọ ikọt esie. Moses ekewet mme ibet emi. Abasi n̄ko ọnọ Moses n̄kpakpana itiat iba oro. Ke mmọ, Abasi ke idemesie ekewet mme ibet 10 oro enye eketịn̄de ọnọ kpukpru owo. Ẹkot mmọ mme Ibet Duop.

Moses ke Obot Sinai

Ibet Duop oro edi mme akpan ẹwụhọ. Edi ntre n̄ko ye ediwak ibet eken oro Abasi ọnọde nditọ Israel. Ibet emi kiet edi: ‘Ma Jehovah Abasi fo ke ofụri esịt fo, ye ofụri ekikere fo, ye ofụri ukpọn̄ fo ye ofụri odudu fo.’ Ndien efen edi: ‘Ma mbọhọidụn̄ fo nte idem fo.’ Eyen Abasi, Jesus Christ, ọkọdọhọ ke emi edi ata n̄kpon n̄kan ibet iba emi Jehovah ọkọnọde ikọt esie, Israel. Ama ekem, iyekpep ediwak n̄kpọ iban̄a Eyen Abasi ye mme ukpepn̄kpọ esie.

Exodus 19:1-25; 20:1-21; 24:12-18; 31:18; Deuteronomy 6:4-6; Leviticus 19:18; Matthew 22:36-40.



Mme Mbụme

  • M̀mọ̀n̄ ke nditọ Israel ẹnam nna n̄kpọ nte ọfiọn̄ iba ke mmọ ẹma ẹkekpọn̄ Egypt?
  • Nso ke Jehovah ọdọhọ mmọ ẹnam, ndien didie ke mmọ ẹbọrọ?
  • Ntak emi Jehovah ọnọde Moses n̄kpakpana itiat iba?
  • Ke adianade ye Ibet Duop oro, nso mme ibet efen ke Jehovah ọkọnọ nditọ Israel?
  • Mme ibet iba ewe ke Jesus Christ ọkọdọhọ ke ẹdi n̄kponn̄kan?

Mme mbụme efen