Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 34: Obufa Orụk Udia

Mbụk 34: Obufa Orụk Udia

NTE emekeme nditịn̄ se mme owo oro ẹtan̄de ke isọn̄? Enye ebiet ntụhube. Etie afia afia, onyụn̄ ekpri ndien etie mbara mbara. Edi idịghe ntụhube; edi n̄kpọ ndidia.

Nditọ Israel ke ẹtan̄ manna

Edi n̄kpọ nte ọfiọn̄ kiet kpọt nte nditọ Israel ẹkekpọn̄ Egypt. Mmọ ẹdu ke Wilderness. Esisịt udia ọkọri mi, ntre mme owo ẹseme, ẹte: ‘Jehovah akpakam owotde nnyịn ke Egypt. Ke ọdiọkde akaha, ima isinyene kpukpru udia iyomde.’

Ntre Jehovah ọdọhọ ete: ‘Mmọn̄ nnam udia edep oto ikpaenyọn̄.’ Ndien emi ke Jehovah anam. Ke usenubọk etienede ke nditọ Israel ẹkụtde mfia n̄kpọ emi ẹdepde, mmọ ẹbụp kiet eken: ‘Nso idi oro?’

Moses ete: ‘Emi edi udia oro Jehovah ọnọde mbufo ẹdia.’ Mme owo ẹkot enye MANNA. Enye etie nte mfefere uyo emi ẹnamde ye aran ọkwọk.

Moses ọdọhọ mme owo: ‘Mbufo ẹditan̄ kpa nte ekemde owo kiet kiet ndidia.’ Ntre kpukpru usenubọk, emi ke mmọ ẹnam. Edi ke utịn ofiopde, manna oro ọsụhọde ke isọn̄ eyemede.

Moses ọdọhọ n̄ko ete: ‘Owo ndomokiet okusụhọ manna oro ọnọ usen efen.’ Edi ndusụk owo ikpan̄ke utọn̄. Nte ọmọfiọk se itịbede? Ndan̄nsiere, manna mmọ ẹkesụhọde ọyọhọ ye ndọn̄ onyụn̄ ọtọn̄ọ nditebe!

Nte ededi, usen urua kiet odu oro Jehovah ọdọhọde mme owo ẹtan̄ manna awak utịm ikaba. Emi edi ọyọhọ usen itiokiet. Ndien Jehovah ete ẹsụhọ ndusụk ẹnọ udiana usen koro imọ idinamke baba kiet ọduọhọ ke ọyọhọ usen itiaba. Ke ini mmọ ẹsụhọde manna oro enọ ọyọhọ usen itiaba, ndọn̄ idụkke, enye inyụn̄ itebeke! Emi edi utịbe n̄kpọ efen!

Kpukpru isua oro nditọ Israel ẹdude ke Wilderness, Jehovah ọbọk mmọ ke manna.

Exodus 16:1-36; Numbers 11:7-9; Joshua 5:10-12.



Mme Mbụme

  • Ke ndise emi, nso ke mme owo emi ẹtan̄ ke isọn̄, ndien ẹkot enye didie?
  • Nso item ke Moses ọnọ mme owo ke nte ẹkpetan̄de manna oro?
  • Nso ke Jehovah ọdọhọ mmọ ẹnam ke ọyọhọ usen itiokiet, ndien ntak-a?
  • Nso utịben̄kpọ ke Jehovah anam ke ini ẹsụhọde manna oro ẹnọ ọyọhọ usen itiaba?
  • Isua ifan̄ ke Jehovah ada manna ọbọk mmọ?

Mme mbụme efen