Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 33: Ndibe Ididuot Inyan̄

Mbụk 33: Ndibe Ididuot Inyan̄

SE se itịbede! Oro edi Moses ye esan̄ esie anyande ke Ididuot Inyan̄. Mmọ oro ẹbọhọde ẹdu ye enye ke edem eken ẹdi nditọ Israel. Edi Phar′aoh ye ofụri udim ekọn̄ esie eden̄i ke inyan̄ oro. Yak ise nte emi okotịbede.

Mmọn̄ ofụk udịm ekọn̄ mbon Egypt

Nte nnyịn ikokụtde, Phar′aoh ama ọdọhọ nditọ Israel ẹkpọn̄ Egypt ke Abasi ama akada ọyọhọ ufen duop amia mbon Egypt. N̄kpọ nte mbon Israel 600,000, iren ye ediwak iban ye nditọ ẹkekpọn̄. N̄ko, ata ediwak mbon efen, emi ẹma ẹkekabade ẹbuọt idem ye Jehovah ẹma ẹkpọn̄ ẹtiene nditọ Israel. Mmọ kpukpru ẹtan̄ erọn̄ ye ebot ye ufene mmọ.

Mbemiso mmọ ẹkpọn̄de, nditọ Israel ẹben̄e mbon Egypt ọfọn̄ ye mme n̄kpọ ẹdade gold ye silver ẹnam. Ndịk okotịm anam mbon Egypt ke ntak akpatre ufen oro okosịmde mmọ. Ntre mmọ ẹma ẹnọ nditọ Israel ofụri se mmọ ẹkeben̄ede.

Ke usen ifan̄ ẹbede, nditọ Israel ẹma ẹdisịm Ididuot Inyan̄. Do mmọ ẹkeduọk odudu. Kan̄a, Phar′aoh ye ikọt esie ẹtọn̄ọ nditua n̄kpọfiọk nte ikayakde nditọ Israel ẹnyọn̄. Mmọ ẹkẹdọhọ, ‘Nnyịn imayak ifụn nnyịn ẹnyọn̄!’

Ntre Phar′aoh afiak ọkpụhọde ekikere esie. Enye ọkọsọp otịm chariot ekọn̄ ye udịm ekọn̄ esie. Ndien enye ama ọtọn̄ọ ndibịne nditọ Israel ye akpan chariot 600 ye kpukpru chariot Egypt eken.

Ke nditọ Israel ẹkụtde Phar′aoh ye udịm ekọn̄ esie ẹbịnede mmọ, ndịk ama otịm anam mmọ. Baba usụn̄ ndifehe ikodụhe. Ididuot Inyan̄ okodu ke n̄kan̄ mmọ kiet ndien mi ke edem eken mbon Egypt ke ẹkebịne mmọ. Edi Jehovah ama esịn obubịt enyọn̄ ke ufọt ikọt esie ye mbon Egypt. Ntre mbon Egypt ikekemeke ndikụt nditọ Israel ndin̄wana ye mmọ.

Jehovah ndien ọdọhọ Moses anyan esan̄ esie ke Ididuot Inyan̄. Ke ini enye akanamde, Jehovah akanam ata ọkpọsọn̄ ofụm usiahautịn ofụme. Mmọn̄ inyan̄ oro ama abahade, ndien mmọn̄ oro ọsọn̄ọ ada edem mbiba.

Ndien nditọ Israel ẹketọn̄ọ ndisan̄a mbe inyan̄ oro ke nsat isọn̄. Ama ada ekese ini ọnọ utọ uwak owo oro ye kpukpru unam oro ndibe inyan̄ oro ke ifụre nsịm edem eken. Ke akpatre mbon Egypt ema ekeme ndifiak n̄kụt nditọ Israel. Ifụn mmọ ke ẹkenyọn̄! Ntre mmọ ẹfen̄e ẹdụk inyan̄ oro ẹbịne mmọ.

Ke mmọ ẹkenamde oro, Abasi anam mme wheel chariot mmọ ẹkịbe. Ndịk ama ọtọn̄ọ ndinam mbon Egypt etieti ndien mmọ ẹma ẹtọn̄ọ ndifiori: ‘Jehovah ke an̄wana ekọn̄ ye nnyịn ọnọ mbon Israel. Yak nnyịn iwọrọ mi!’ Edi ini ama ebe akaha.

Emi edi ini oro Jehovah ọkọdọhọde Moses anyan esan̄ esie ke Ididuot Inyan̄, nte afo okokụtde ke ndise oro. Ndien ke Moses ama akanam, ibibene mmọn̄ oro ẹkẹtọn̄ọ ndifiak ndifụk mbon Egypt ye mme chariot mmọ. Ofụri udịm ekọn̄ ẹma ẹtiene nditọ Israel ẹdụk inyan̄ oro. Ndien ndomokiet ke otu mbon Egypt oro ikọwọrọke ye uwem!

Esịt ekenem ikọt Abasi didie ntem ndibọhọ! Mme owo ẹkekwọ ikwọ itoro ẹnọ Jehovah ẹte: ‘Jehovah amakan ubọn̄ ubọn̄. Enye ekemen horse ye mme andiwat ọduọk ke inyan̄.’ Mir′i·am eyeneka Moses an̄wan ekemen ekọmọ esie, ndien ofụri iban eken ẹtan̄ ekọmọ mmọ n̄ko. Ndien nte mmọ ẹnekde ye inemesịt, mmọ ẹkwọ ukem ikwọ oro irenowo ẹkẹkwọde: ‘Jehovah amakan ubọn̄ ubọn̄. Enye ekemen horse ye mme andiwat ọduọk ke inyan̄.’

Exodus ibuot 12 osim 15.



Mme Mbụme

  • Iren nditọ Isreal ifan̄, ọkọrọ ye iban ye nditọwọn̄ ẹkekpọn̄ Egypt, ndien mmanie ẹketiene mmọ ẹkpọn̄?
  • Eketie Pharaoh didie ke idem ke enye ama akayak nditọ Israel ẹnyọn̄ọ, ndien nso ke enye akanam?
  • Nso ke Jehovah akanam man akpan mbon Egypt ndin̄wana ye ikọt esie?
  • Nso iketịbe ke ini Moses akanyande esan̄ esie ke Ididuot Inyan̄, ndien nso ke nditọ Israel ẹkenam?
  • Nso iketịbe ke ini mbon Egypt ẹkefen̄ede ẹdụk inyan̄ ẹbịne nditọ Israel?
  • Didie ke nditọ Israel ẹkewụt ke mmimọ imenem esịt inyụn̄ itoro Jehovah ke mmimọ ndibọhọ?

Mme mbụme efen