Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 31: Moses ye Aaron Ẹkụt Pharaoh

Mbụk 31: Moses ye Aaron Ẹkụt Pharaoh

KE INI Moses afiakde osịm Egypt, enye obụk kpukpru utịbe n̄kpọ oro ọnọ Aaron eyeneka esie. Ndien ke ini Moses ye Aaron ẹkewụtde nditọ Israel mme utịbe n̄kpọ emi, mmọ kpukpru ẹnịm nte Jehovah ama odu ye mmọ.

Ekem, Moses ye Aaron ẹma ẹka ndikụt Phar′aoh. Mmọ ẹma ẹdọhọ enye: ‘Jehovah Abasi Israel ọdọhọ, “Yak ikọt mi ẹka ke usen ita, man ẹkpekpono mi ke wilderness.”’ Edi Phar′aoh ọbọrọ: ‘Ami nnịmke Jehovah ke akpanikọ. Ndien ndiyakke Israel ẹka.’

Phar′aoh ama ayat esịt koro mme owo ẹkeyom ini ndikpọn̄ utom n̄kokpono Jehovah. Ntre enye enyịk mmọ ẹnam utom ẹkan. Mbon Israel ẹma ẹduọhọ Moses ke ẹnamde ọdiọk ye mmọ, ndien Moses ọfụhọ. Edi Jehovah ọdọhọ enye okukere. Jehovah ọkọdọhọ: ‘Nnyenam Phar′aoh ayak ikọt mi ẹnyọn̄.’

Moses ye Aaron ke iso Pharaoh

Moses ye Aaron ẹfiak ẹka ndikụt Phar′aoh. Isan̄ emi mmọ ẹnam utịbe n̄kpọ. Aaron ọduọk esan̄ esie ke isọn̄ ndien enye akabade akamba urụkikọt. Edi mbon ifiọk Phar′aoh ẹnyụn̄ ẹduọk esan̄ mmọ ndien urụkikọt ẹwọrọ. Edi, sese! urụkikọt Aaron ke ata mme urụkikọt mbon ifiọk oro. Kpa ye oro Phar′aoh iyakke nditọ Israel ẹnyọn̄.

Ntre ini ama edi ọnọ Jehovah nditụnọ Phar′aoh. Nte ọmọfiọk nte enye akanamde? Ke ndida mme ufen 10, mme ikpọ afanikọn̄ nsọk Egypt.

Ke ediwak ufen oro ẹbede, Phar′aoh ọdọn̄ ẹkot Moses edi, ete: ‘Tre ufen oro, ndien nyeyak Israel ẹnyọn̄.’ Edi ke ufen oro etrede, Phar′aoh eyekpụhọde ekikere esie. Enye idiyakke mme owo ẹnyọn̄. Edi, ke akpatre, ke ọyọhọ ufen 10 ebede, Phar′aoh anam mbon Israel enyọn̄. Nte ọmọfiọk mme ufen 10 oro kiet kiet? Yak ikpep iban̄a mmọ.

Exodus 4:27-31; 5:1-23; 6:1-13, 26-30; 7:1-13.



Mme Mbụme

  • Didie ke mme utịben̄kpọ oro Moses ye Aaron ẹkenamde ẹketụk nditọ Israel?
  • Nso ke Moses ye Aaron ẹketịn̄ ẹnọ Pharaoh, ndien nso ke Pharaoh ọkọbọrọ?
  • Nte ẹwụtde ke ndise emi, nso iketịbe ke ini Aaron ọkọduọkde esan̄ esie ke isọn̄?
  • Didie ke Jehovah okotụnọ Pharaoh, ndien didie ke Pharaoh akanam n̄kpọ?
  • Nso iketịbe ke ọyọhọ ufen duop ama ekebe?

Mme mbụme efen