Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 30: Ikọt oro Asakde Ikan̄

Mbụk 30: Ikọt oro Asakde Ikan̄

MOSES ama asan̄a ofụri anyan usụn̄ edisịm obot Horeb ndiyom mbiet nnọ mme erọn̄ esie. Mi, enye ama okụt ikọt asakde ikan̄, edi ikan̄ ikataha n̄kpọ!

Moses ke ikọt oro asakde ikan̄

Moses ama ekere, ‘Emi edi esen n̄kpọ. Nyesan̄a n̄kpere nnyụn̄ ntịm nse.’ Ke enye akade, uyo ọwọrọ ke ikọt oro, ete: ‘Kusan̄a ukpere ukan. Sion̄o ikpa ukot fo, koro afo adade ke edisana isọn̄.’ Edi Abasi eketịn̄ ikọ oto angel, ntre Moses ama ofụk iso esie.

Abasi ndien ama ọdọhọ: ‘Ami mmokụt ukut ikọt mi ke Egypt. Ntre mmọn̄ nnam mmọ ẹbọhọ, ndien afo edi owo oro ndọn̄de akada mmọ ọwọrọ ke Egypt.’ Jehovah okoyom ndida ikọt esie ndi ke ediye isọn̄ Ca′naan.

Edi Moses ete: ‘Ami ndịghe owo ndomokiet. Didie ke n̄keme ndinam emi? Edi ndusụk ami n̄ka. Mbon Israel eyedọhọ mi, “Anie ọkọdọn̄ fi?” ndien nso ke ndidọhọ?’

Abasi ama ọbọrọ, ‘Emi edi se afo editịn̄de, “JEHOVAH Abasi Abraham, Abasi Isaac ye Abasi Jacob ọdọn̄ mi mbịne mbufo.”’ Ndien Jehovah akadian ete: ‘Emi edi enyịn̄ mi ke nsinsi.’

Moses ama ọbọrọ, ‘Edi nso edieke mmọ minịmke ke ndọhọde mmọ nte afo ọdọn̄ mi.’

Abasi ama obup ete, ‘Afo akama nso ke ubọk?’

Moses ama ọbọrọ: ‘Esan̄.’

Abasi ama ọdọhọ, ‘Duọk enye ke isọn̄.’ Ndien ke Moses anamde oro, esan̄ akabade urụkikọt. Jehovah ndien okowụt Moses utịbe n̄kpọ efen. Enye ete: ‘Sịn ubọk fo ke esịt ọfọn̄ fo.’ Moses ama esịn, ndien ke enye osiode ubọk esie, enye akafia nte snow! Ubọk oro eketie nte enye ekenyene idiọk udọn̄ọ ẹkotde akpa mfia. Ekem, Jehovah ọkọnọ Moses odudu ndinam ọyọhọ utịbe n̄kpọ ita. Ndien enye ete: ‘Ke afo anamde mme utịbe n̄kpọ emi, nditọ Israel ẹyenịm ete ami n̄kọdọn̄ fi.’

Ke oro ebede, Moses ọnyọn̄ ọkọdọhọ Jeth′ro ete: ‘Mbọk yak mfiak mbịne iman mi ke Egypt n̄kese nte mmọ ẹtiede.’ Ntre Jeth′ro ọdọhọ Moses ete, San̄a sụn̄, ndien Moses ama ọtọn̄ọ isan̄ esie afiak ke Egypt.

Exodus 3:1-22; 4:1-20.



Mme Mbụme

  • Obot oro ke ndise emi ekere didie?
  • Tịn̄ ban̄a esen esen n̄kpọ oro Moses okokụtde ke ini enye akadade mme erọn̄ esie ọdọk obot oro.
  • Uyo oro eketịn̄de ikọ ke ikọt oro asakde ikan̄ ọkọdọhọ didie, ndien uyo anie ekedi oro?
  • Nso ke Moses ọkọbọrọ ke ini Abasi ọkọdọhọde ke enye edida ikọt Abasi ọwọrọ ke Egypt?
  • Abasi ọkọdọhọ Moses etịn̄ nso edieke nditọ Israel ẹbụpde m̀mê anie ọkọdọn̄ enye?
  • Didie ke Moses ediwụt ke Abasi ọkọdọn̄ imọ?

Mme mbụme efen