Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 29: Ntak Moses Ekefehede

Mbụk 29: Ntak Moses Ekefehede

SESE Moses efehede ọkpọn̄ Egypt. Nte afo omokụt mme owo oro ẹbịnede enye? Nte ọmọfiọk ntak ẹyomde ndiwot Moses? Yak ise, mme iyefiọk.

Moses efehe ọkpọn̄ Egypt

Moses ọkọkọri ke ufọk Phar′aoh, andikara Egypt. Enye akakabade edi ata ọniọn̄ ye owo uko. Moses ama ọfiọk ete imọ ikedịghe eyen Egypt edi ata ete ye eka imọ ẹkedi ifụn nditọ Israel.

Usen kiet, ke osịmde isua 40 ke emana, Moses ama ebiere ndikese nte ikọt esie ẹtiede. Ama otịm ọdiọk nte ẹkekamade mmọ. Enye ama okụt eyen Egypt amiade ofụn Israel. Moses ese akanade, edi ke enye mikwe baba owo esede, enye amia eyen Egypt oro, ndien eyen Egypt oro akpa. Ndien Moses odịp okpo esie ke ntan.

Ke ndan̄nsiere, Moses afiak aka ndise ikọt esie. Enye ekekere ete imọ imekeme ndin̄wam mmọ man mmọ ẹkudi ifụn aba. Edi enye ama okụt mbon Israel iba ẹn̄wanade, ntre Moses ama ọdọhọ andidue ete: ‘Ntak afo amiade eyenete fo?’

Owo oro ete: ‘Anie akanam fi ọbọn̄ ye ebiereikpe nnyịn? Afo oyom ndiwot mi nte okowotde eyen Egypt oro?’

Idahaemi, ndịk akanam Moses. Enye ama ọfiọk ete mme owo ẹma ẹdiọn̄ọ se imọ ikanamde eyen Egypt oro. Idem Phar′aoh ama okop, ndien ama ọdọn̄ mme owo ẹkewot Moses. Ntak edi oro Moses ekefehede ọkpọn̄ Egypt.

Ke Moses ama ọkọkpọn̄ Egypt, enye akaka anyan usụn̄ ke isọn̄ Mid′i·an. Do enye okokụt ubon Jeth′ro, onyụn̄ ọdọ eyen- an̄wan esie kiet ẹkekotde Zip·po′rah. Moses akakabade ekpemerọn̄ onyụn̄ ekpeme mme erọn̄ Jeth′ro. Enye okodụn̄ ke isọn̄ Mid′i·an ke isua 40. Idahaemi enye ekedi isua 80 ke emana. Ekem usen kiet, ke Moses ekpemede erọn̄ Jeth′ro, n̄kpo ndyọ ama otịbe oro ọkọkpụhọrede uwem Moses. Yak ise se n̄kpọ ndyọ emi edide.

Exodus 2:11-25; Utom 7:22-29.



Mme Mbụme

  • Moses ọkọkọri okpon ke m̀mọ̀n̄, edi nso ke enye ọkọfiọk aban̄a ete ye eka esie?
  • Nso ke Moses akanam ke ini enye ekedide isua 40?
  • Nso ke Moses eketịn̄ ye eyen Israel emi akan̄wanade, ndien nso ke owo oro ọkọbọrọ enye?
  • Ntak emi Moses ekefehede ọkpọn̄ Egypt?
  • Moses ekefehe aka m̀mọ̀n̄, ndien anie ke enye okokụt do?
  • Nso ke Moses akanam ke isua 40 ke enye ama ekefehe ọkpọn̄ Egypt?

Mme mbụme efen