Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 28: Nte Ẹkenyan̄ade Nsek Moses

Mbụk 28: Nte Ẹkenyan̄ade Nsek Moses

SESE ekpri nsek eyen atuade, onyụn̄ omụmde nuenubọk n̄wan oro. Emi edi Moses. Nte ọmọfiok owo oro ediye n̄wan oro edide? Enye edi eyen edidem Egypt, eyenan̄wan Phar′aoh.

Eyenan̄wan Pharaoh okụt Moses

Eka Moses ama odịp nsek eyen esie tutu enye osịm ọfiọn̄ ita, koro enye ikoyomke mbon Egypt ẹwot enye. Edi enye ama ọfiọk ke ẹkeme ndikụt Moses, ntre, ntem ke enye akanam ndinyan̄a enye.

Enye ama ada akpasa kiet esịri enye nte mmọn̄ mikemeke ndidụk. Ndien enye emen Moses esịn, onyụn̄ onịm akpasa oro ke nnyan mbiet ke Akpa Nile. Ekedọhọ Mir′i·am, eyeneka Moses an̄wan ada ekpeme ndikụt se iditịbede.

Ibịghike eyenan̄wan Phar′aoh ama edi Akpa Nile ndiyere mmọn̄. Enye ọsọp okụt akpasa oro ke otu mbiet. Enye okot kiet ke otu ifụn iban esie ete: ‘Ka kemen akpasa oko sọk mi.’ Ke eyen edidem ọkụbọrede akpasa oro, nso ediye nsek eyen ke enye okokụt ntem! Ekpri Moses ke akatua, ndien eyen edidem emi ama atua enye mbọm. Enye ikoyomke ẹwot enye.

Ndien Mir′i·am ama edi, oro afo okụtde ke ndise emi. Mir′i·am ama obụp eyen Phar′aoh an̄wan: ‘Nte mmekeme ndikot n̄wan Israel edikama nsek eyen emi ọnọ fi?’

Eyen edidem oro ama ọdọhọ, ‘Mbọk kot.’

Ntre Mir′i·am ọkọsọp efehe ndisian eka esie. Ke ini eka Moses osịmde, eyen edidem oro ete: ‘Men nsek eyen emi bọk nọ mi, ndien nyekpe fi.’

Ntre, eka Moses ekekpeme eyen esie. Ekem, ke Moses ama okokpon ekem, enye ama ada enye ọsọk eyenan̄wan Phar′aoh emi akadade enye nte eyen esie. Ntre ke Moses ekedikọri ke ufọk Phar′aoh.

Exodus 2:1-10.



Mme Mbụme

  • Ewe nsekeyen idi emi ke ndise, ndien nnuenubọk anie ke enye omụm oro?
  • Nso ke eka Moses akanam man anyan̄a eyen esie?
  • Anie edi ekpri eyenan̄wan emi ke ndise, ndien nso ke enye akanam?
  • Ke ini eyenan̄wan Pharaoh okokụtde nsekeyen oro, nso ekikere ke Miriam ọkọnọ?
  • Nso ke eyen edidem ọkọdọhọ eka Moses?

Mme mbụme efen