Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 24: Joseph Odomo Nditọ Ete Esie

Mbụk 24: Joseph Odomo Nditọ Ete Esie

JOSEPH oyom ndifiọk mme ikpọ nditọ ete esie 10 ke ẹsụk ẹdiọk ẹnyụn̄ ẹnana ima. Ntre enye ete: ‘Mbufo ẹdi mbon uyep. Mbufo ẹdi ndiyom ebiet obio nnyịn ememde.’

Mmọ ẹbọrọ, ‘Baba, nnyịn idịghe. Nnyịn idi mbon akpanikọ. Nnyịn kpukpru idi nditọ ete. Nnyịn ikedi 12. Edi eyenete nnyịn kiet idụhe aba, n̄ko asan̄aedem odu ye ete nnyịn ke ufọk.’

Joseph okoi anam nte inịmke ikọ mmọ. Enye esịn eyenete oro ẹkotde Sim′e·on ke ufọk n̄kpọkọbi onyụn̄ anam mmọ eken ẹbọ udia ẹnyọn̄. Edi enye ọdọhọ mmọ: ‘Ke ẹfiakde ẹdi, ana ẹda asan̄aedem eyenete mbufo ẹdi. Ke mmọ ẹfiakde ke Ca′naan, nditọ ete emi ẹtịn̄ kpukpru se ikotịbede ẹnọ Jacob ete mmọ. Jacob otịm ọfụhọ. Enye ofiori, ‘Joseph idụhe aba, ndien ke emi, Sim′e·on idụhe aba. Ndiyakke mbufo ẹda asan̄aedem eyen mi Benjamin.’ Edi ke udia mmọ ọtọn̄ọde ndikụre, ana Jacob ayak mmọ ẹda Benjamin ẹka Egypt man ẹnyene udia efen.

Idahaemi Joseph okụt nditọ ete esie edide. Esịt otịm enem enye ndikụt ekpri eyeneka esie Benjamin. Ke akpanikọ mmọ baba kiet ifiọkke ite akpan owo emi edi Joseph. Joseph ndien anam n̄kpọ ndidomo nditọ ete esie 10.

Enye anam ifụn esie ẹdọn̄ udia ẹyọhọ kpukpru ekpat mmọ. Edi ke miyakke mmọ ẹdiọn̄ọ, enye n̄ko anam ẹsịn eti cup silver esie ke ẹkpat Benjamin. Ke mmọ kpukpru ẹnyọn̄de, ẹsan̄ade esịt ke usụn̄, Joseph anam ifụn esie ẹbịne mmọ. Ke ini mmọ ẹsịmde mmọ, ifụn oro ẹte: ‘Ntak mbufo ẹyịpde cup silver etufọk nnyịn-e?’

Kpukpru nditọ ete oro ẹdọhọ, ‘Nnyịn iyịpke cup esie. Ke mbufo ẹkụtde cup oro ye owo nnyịn kiet, yak ẹwot owo oro.’

Ntre ifụn oro ẹse kpukpru ekpat mmọ, ndien ẹkụt cup oro ke ekpat Benjamin, kpa nte afo okụtde mi. Ifụn oro ẹte: ‘Mbufo eken ẹmekeme ndinyọn̄, edi Benjamin ana etiene nnyịn.’ Nso ke nditọ ete 10 oro ẹdinam idahaemi?

Mmọ kpukpru ẹfiak ye Benjamịn ẹka ufọk Joseph. Joseph ọdọhọ nditọ ete esie: ‘Mbufo ẹmekeme ndinyọn̄, edi Benjamin enyene ndidu mi nte ofụn mi.’

Judah ndien ẹtịn̄ ikọ ete: ‘Edieke mfiakde nsịm ufọk ke eyen emi midụhe, ete mi eyekpa koro amade enye etieti. Ntre mbọk, nịm mi nte ofụn fo, edi yak eyen emi ọnyọn̄.’

Joseph ekeme ndikụt ke nditọ ete esie ẹkpụhọde. Mmọ idiọkke aba inyụn̄ inana mfọnido. Yak ise se Joseph anamde ke emi.

Genesis 42:9-38; 43:1-34; 44:1-34.

Ẹdori nditọ ete Joseph ikọ


Mme Mbụme

  • Ntak emi Joseph ọdọhọde ke nditọ ete esie ẹdi mbon uyep?
  • Ntak emi Jacob ayakde Benjamin, asan̄aedem eyen esie, aka Egypt?
  • Cup silver Joseph asan̄a didie odụk ekpat Benjamin?
  • Nso ke Judah enyịme ndinam man ẹsana Benjamin ẹyak?
  • Didie ke nditọ ete Joseph ẹkpụhọde?

Mme mbụme efen