Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 23: Mme Ndap Pharaoh

Mbụk 23: Mme Ndap Pharaoh

ISUA iba ẹbe, edi Joseph ke odu ke n̄kpọkọbi. Akama cup oro itịghi enye. Ekem, okoneyo kiet, Phar′aoh adaba ata akpan ndap iba onyụn̄ eyịk se mmọ ẹwọrọde. Nte omokụt enye edede idap do? Ke ndan̄ nsiere, Phar′aoh okot mme ọfiọkn̄kpọ owo esie, etịn̄ kpukpru ndap esie ọnọ mmọ. Edi mmọ ikemeke nditịn̄ se mmọ ẹwọrọde.

Idahaemi, akama cup editi Joseph ndien. Enye ọdọhọ Phar′aoh ete: ‘Ke ini n̄kodude ke n̄kpọkọbi, owo kiet ama odu do ekemede ndisiak mme ndap.’ Phar′aoh anam esio Joseph ke ufọk n̄kpọkọbi edi iwiwa.

Phar′aoh asian Joseph mme ndap esie: ‘Mma n̄kụt ndiye enan̄ ubom itiaba. Ndien n̄kokụt ata nsasat ye ọkpọ ọkpọ enan̄ itiaba. Edi nsasat oro ẹta mme enan̄ ubom oro.

Pharaoh ke adaba ndap

‘Ke udiana ndap mi, n̄kokụt mbuot n̄kpasịp itiaba, eke ẹyọhọde, ẹnyụn̄ ẹdatde, ẹsiahade ke eto kiet. Ndien n̄kụt mbuot itiaba eke ẹkpride, ẹnyụn̄ ẹsatde. Ndien mbuot n̄kpasịp oro ẹkpride ẹmen mbuot itiaba oro ẹfọnde ẹmen.’

Joseph ọbọrọ Phar′aoh ete: ‘Mme ndap iba oro ẹwọrọ ukem n̄kpọ. Ikpọ enan̄ ubom itiaba oro ye mbuot ibokpot itiaba ẹyọhọde, ẹwọrọ isua itiaba, n̄ko ọkpọ ọkpọ enan̄ ye mbuot ibokpot itiaba oro ẹkpride ẹwọrọ isua itiaba efen. Isua itiaba ẹyedu oro ediwak udia ẹdikọride ke Egypt. Ndien isua itiaba ẹyenyụn̄ ẹdu oro udia midiwakke.’

Ntre Joseph ọdọhọ Phar′aoh: ‘Mek ọfiọkn̄kpọ owo kiet nịm ese n̄kpọ aban̄a ndikọ udia ke ofụri nti isua itiaba oro. Ndien mme owo idikpaha biọn̄ ke mme idiọk isua itiaba oro ẹditienede, oro udia midiwakke.’

Phar′aoh ama ekikere oro. Ndien enye emek Joseph ọkọ udia onyụn̄ otịm enye onịm. Ke etienede Phar′aoh, Joseph akabade udiana akpan owo ke Egypt.

Ke isua itiaita ẹbede, ke akan̄ oro, Joseph okụt irenowo ẹdide. Nte afo ọmọfiọk owo emi mmọ ẹdide? Sese, mmọ ẹdi ikpọ nditọ ete esie 10! Ete mmọ Jacob ọdọn̄ mmọ ẹka Egypt koro udia mmọ ke ufọk ke Ca’naan ọtọn̄ọ ndikụre. Joseph ọdiọn̄ọ nditọ ete esie, edi mmọ idiọn̄ọke enye. Nte afo ọmọfiọk ntak? Edi koro Joseph ọkọri okpon akan, enye onyụn̄ esịne isio isio ọfọn̄.

Joseph eti ete ke ini imọ ikedide ekpri eyen, imọ ima idaba nte nditọ ete imọ edituakde ibuot ẹnọ imọ. Nte afo emeti okotde aban̄a oro? Ntre Joseph ekeme ndikụt nte Abasi ọkọnọ imọ idi Egypt, ye eti ntak. Afo ekere ete Joseph anam nso? Yak ise.

Genesis 41:1-57; 42:1-8; 50:20.



Mme Mbụme

  • Nso itịbe inọ Pharaoh ke okoneyo kiet?
  • Ntak emi akama cup oro etide Joseph ke akpatre?
  • Nte ẹwụtde ke ndise emi, ewe ndap iba ke Pharaoh adaba?
  • Joseph ọdọhọ ke mme ndap emi ẹwọrọ nso?
  • Joseph asan̄a didie akabade ata akpan owo ke Egypt ye udiana Pharaoh?
  • Ntak emi nditọ ete Joseph ẹdide Egypt, ndien ntak emi mmọ mîdiọn̄ọke enye?
  • Ewe ndap ke Joseph eti, ndien nso ke emi an̄wam enye ndifiọk?

Mme mbụme efen