Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 22: Ẹsịn Joseph ke Ufọk N̄kpọkọbi

Mbụk 22: Ẹsịn Joseph ke Ufọk N̄kpọkọbi

JOSEPH edi isua 17 kpọt ke ini ẹdade ẹka Egypt. Do ẹnyam enye ẹnọ owo ẹkotde Pot′i·phar. Pot′i·phar anam utom ọnọ Edidem Egypt ẹkotde Phar′aoh.

Joseph ke ufọk n̄kpọkọbi

Joseph anam utom ọkpọsọn̄ ọnọ Pot′i·phar etufọk esie. Ntre ke Joseph okponde, Pot′i·phar anam enye ese aban̄a ofụri ufọk esie. Ntak ndien, Joseph odude mi ke ufọk n̄kpọkọbi? Edi ke ntak n̄wan Pot′i·phar.

Joseph ọkọri akabade ata ediye eren, ndien n̄wan Pot′i·phar oyom enye adan̄ ye imọ. Edi Joseph ọfiọk nte ke ifọnke, ndien idinamke oro. Esịt ayat n̄wan Pot′i·phar etieti. Ntre ke ebe esie ọnyọn̄de edi, enye osu nsu ọnọ enye ete: ‘Idiọk Joseph oro ama odomo ndidan̄ ye ami!’ Pot′i·phar onịm n̄wan esie ke akpanikọ, ndien otịm ayat esịt ye Joseph. Ntre anam ẹsịn enye ke ufọk n̄kpọkọbi.

Andise ufọk n̄kpọkọbi ọsọp okụt ete Joseph edi eti owo. Ntre enye onịm enye ke ibuot kpukpru mbon n̄kpọkọbi eken. Ekem, Phar′aoh ayat esịt ye akama cup ye asan̄ uyo esie, onyụn̄ ọdọn̄ mmọ ke ufọk n̄kpọkọbi. Okoneyo kiet mmọ mbiba ẹdaba ata akpan ndap, edi ifiọkke se ndap mmọ ẹwọrọde. Ke ndan̄ nsiere, Joseph ete: ‘Ẹsian mi ndap mbufo.’ Ndien ke mmọ ẹtịn̄de, Joseph ye un̄wam Abasi, etịn̄ se ndap mmọ ẹwọrọde.

Joseph ọdọhọ akama cup ete: ‘Ke usen ita, ẹyesio fi ke n̄kpọkọbi, ndien afo ẹyefiak edi akama cup Phar′aoh.’ Ntre Joseph ọdọhọ: ‘Ke afo ọwọrọde, tịn̄ ye Phar′aoh ban̄a mi, nyụn̄ n̄wam mi n̄wọrọ ke ebiet emi.’ Edi Joseph ọdọhọ asan̄ uyo: ‘Ke usen ita kpọt, Phar′aoh eyesịbe fi ibuot.’

Ke usen ita, ama otịbe kpa nte Joseph eketịn̄de. Phar′aoh osịbe ibuot asan̄ uyo efep. Edi ẹsio akama cup ke n̄kpọkọbi ndien afiak ọtọn̄ọ ndinam n̄kpọ edidem. Edi akama cup oro efre kpukpru aban̄a Joseph! Enye itịn̄ke iban̄a enye inọ Phar′aoh, Joseph akana odu ke n̄kpọkọbi.

Genesis 39:1-23; 40:1-23.



Mme Mbụme

  • Joseph edi isua ifan̄ ke ini ẹdade enye ẹka Egypt, ndien nso itịbe ke ini enye odude do?
  • Joseph akasan̄a didie ekesịne ke ufọk n̄kpọkọbi?
  • Nso utom ke ẹnọ Joseph ke ufọk n̄kpọkọbi?
  • Nso ke Joseph anam ọnọ akama cup ye asan̄ uyo Pharaoh ke esịt ufọk n̄kpọkọbi?
  • Nso itịbe ke ẹma ẹkesio akama cup oro ke n̄kpọkọbi?

Mme mbụme efen

Kpep N̄kpọ En̄wen

Kad Mbre Bible, Potiphar

Sio kad mbre Bible emi da kpep n̄kpọ ban̄a Potiphar, owo Egypt emi ekedepde Joseph nte ofụn.