Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 20: Dinah Odụk Afanikọn̄

Mbụk 20: Dinah Odụk Afanikọn̄

NTE OMOKỤT mmọ oro Di′nah akade ndise? Enye aka ndise ndusụk nditọ iban oro ẹdụn̄de ke isọn̄ Ca′naan. Nte ete esie Jacob eyenem esịt aban̄a emi? Ndin̄wam ẹbọrọ mbụme emi, domo nditi se Abraham ye Isaac ẹkekerede ẹban̄a iban Ca′naan.

Dinah aka ndise nditọ iban Canaan

Nte Abraham ama oyom eyen esie Isaac ọdọ n̄wan oto Ca′naan? Baba, enye ikoyomke. Nte Isaac ye Re·bek′ah ẹma ẹyom eyen mmọ Jacob ọdọ eyenan̄wan Ca′naan? Baba, mmọ ikoyomke. Nte ọmọfiọk ntak?

Ekedi koro mme owo emi ke Ca′naan ẹkekpono mme nsunsu abasi. Mmọ ikedịghe nti owo ndinyene nte ebe ye n̄wan, n̄ko mmọ ikedịghe nti owo ndinyene n̄kpere idem nte mme ufan. Ntre nnyịn imekeme nditịm mfiọk nte Jacob idinemke esịt eyen esie an̄wan ndinam ufan ye nditọ iban Ca′naan emi.

Ke ata akpanikọ, Di′nah ama odụk afanikọn̄. Nte emekeme ndikụt eren Ca′naan oro ke ndise esede Di′nah? Enye ekere She′chem. Usen kiet ke Di′nah edide esen, She′chem okomụm Di′nah onyụn̄ enyịk enye adan̄ ye enye. Emi ikọfọnke koro kpa mme ọdọ ndọ kpọt akpana nte ẹdan̄ ye kiet eken. Idiọkn̄kpọ emi She′chem akanamde ye Di′nah akada osịm uwak mfịna efen.

Ke nditọ eka iren Di′nah ẹkopde se ikotịbede, esịt ama ayat mmọ etieti. Iba ke otu mmọ, Sim′e·on ye Le′vi, ẹma ẹtịm ẹyat esịt tutu ẹmen ofụt ẹduk obio oro ẹnyụn̄ ẹsịm irenowo do ke ndueidem. Mmọ ye nditọ eka mmọ iren ẹwot She′chem ye kpukpru irenowo eken. Esịt ama ayat Jacob ye nditọ esie aban̄a idiọkn̄kpọ emi.

Kpukpru mfịna emi ẹketọn̄ọ didie? Edi koro Di′nah akanam ufan ye mmọ oro mikponoke mme ibet Abasi. Nnyịn idiyomke ndinam utọ mme ufan oro, nte iyeyom?

Genesis 34:1-31.



Mme Mbụme

  • Ntak emi Abraham ye Isaac mîkoyomke nditọ mmọ ẹdọ mbon Canaan?
  • Ndi Jacob ama enyịme eyen esie an̄wan anam ufan ye nditọ iban Canaan?
  • Anie eren ese Dinah ke ndise emi, ndien nso idiọkn̄kpọ ke enye akanam?
  • Nso ke nditọ eka Dinah, Simeon ye Levi, ẹkenam ke ini mmọ ẹkekopde se iketịbede?
  • Ndi Jacob ama ama se Simeon ye Levi ẹkenamde?
  • Didie ke kpukpru mfịna emi okodude ke ubon oro ọkọtọn̄ọ?

Mme mbụme efen

  • Kot Genesis 34:1-31.

    Nte mbon en̄wen ẹkeme ndidụk ndụk ukem nte Dinah okodụkde ye nditọ iban Canaan? Nam an̄wan̄a. (Gen. 34:1)

    Ntak emi ẹkeduọhọde Dinah n̄ko ke ndikọduọk edisana idaha esie? (Gal. 6:7)

    Didie ke mme uyen mfịn ẹkeme ndiwụt ke imekpep n̄kpọ ito se iketịbede inọ Dinah? (N̄ke 13:20; 1 Cor. 15:33; 1 John 5:19)