Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 19: Jacob Enyene Akwa Ubon

Mbụk 19: Jacob Enyene Akwa Ubon
Jacob ye nditọ iren esie

KAM se akwa ubon emi. Emi edi nditọ Jacob 12. Enye n̄ko ama enyene nditọ iban. Nte afo ọmọdiọn̄ọ enyịn̄ nditọ oro ndomo kiet? Yak ifiọk usụk mmọ.

Le′ah akaman Reu′ben, Sim′e·on, Le′vi ye Judah. Ke Rachel okụtde ete imọ inyeneke eyen, enye ama ọfụhọ etieti. Ntre enye ama ọnọ Jacob eyenufọk esie Bil′hah, ndien Bil′hah ama enyene nditọ iren iba ẹkekotde Dan ye Naph′ta·li. N̄ko Le′ah ama ọnọ Jacob eyenufọk esie Zil′pah, ndien Zil′pah akaman Gad ye Ash′er. Le′ah ke akpatre ama enyene nditọ iren iba efen, Is′sa·char ye Zeb′u·lun.

Ke akpatre Rachel ama ekeme ndinyene eyen kiet. Enye okokot enye Joseph. Ama ekem, nnyịn iyekpep ekese iban̄a Joseph, koro enye ama akabade edi ata akpan owo. Emi ekedi nditọ iren 11 oro ẹkemanade enọ Jacob ke enye odụn̄de ye La′ban, ete Rachel.

Jacob ama enyene nditọ iban n̄ko, edi Bible ọnọ enyịn̄ kiet kpọt ke otu mmọ. Enyịn̄ esie ekedi Di′nah.

Ini ama ekem oro Jacob ekebierede ndikpọn̄ La′ban mfiak n̄ka Ca′naan. Ntre enye ama obon akwa ubon esie ye akamba otu erọn̄ esie ye uwak ufene eken ọtọkiet, onyụn̄ ọtọn̄ọ anyan isan̄ esie.

Ke Jacob ye ubon esie ẹma ẹkenyọn̄ ẹka Ca′naan esisịt, Rachel ama aman eyeneren efen. Okotịbe ke mmọ ẹkade isan̄. Rachel ama okụt mfịna, ke akpatre enye ama akpa ke ini uman. Edi ekpri eyeneren oro ama ọbọhọ. Jacob okokot enye Benjamin.

Nnyịn iyom nditi enyịn̄ nditọ Jacob 12 koro ofụri idụt Israel ẹketo mmọ. Ke akpanikọ, esien Israel 12 ẹda enyịn̄ mmọ ẹto nditọ iren Jacob 10 ye enyịn̄ nditọ iren Joseph iba. Isaac ama odu uwem ediwak isua ke kpukpru nditọ iren emi ẹmanade, n̄ko esịt ama enem enye etieti ndinyene ediwak nditọ eyen ntre. Edi yak ise se iketịbede inọ eyeyen esie, Dinah.

Genesis 29:32-35; 30:1-26; 35:16-19; 37:35.



Mme Mbụme

  • Nso ikedi enyịn̄ nditọ itiokiet emi Leah, akpa n̄wan Jacob akamande ọnọ enye?
  • Nditọ iba emi Jacob ekenyenede oto Zilpah, eyenufọk Leah, ẹkekere didie?
  • Nditọ iba emi Bilhah, eyenufọk Rachel, akamande ọnọ Jacob ẹkekere didie?
  • Nso ikedi enyịn̄ nditọ iba emi Rachel akamande, edi nso iketịbe ke ini ọyọhọ eyen iba amanade?
  • Nte ndise emi owụtde, Jacob ekenyene nditọ ifan̄, ndien mmọ ẹkekabade ẹdi nso?

Mme mbụme efen