Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 16: Isaac Enyene Eti N̄wan

Mbụk 16: Isaac Enyene Eti N̄wan

NTE ỌMỌFIỌK enye oro n̄wan emi ke ndise edide? Enyịn̄ esie edi Re·bek′ah. N̄ko eren oro enye edide ndisobo edi Isaac. Enye eyekabade edi n̄wan esie. Didie ke emi okotịbe?

Ọfọn, Abraham, ete Isaac okoyom eti n̄wan ọnọ eyen esie. Enye ikoyomke Isaac ọdọ kiet ke otu iban Ca′naan, koro mbon oro ẹkekpono mme nsunsu Abasi. Ntre Abraham okokot eyenufọk esie ọdọhọ ete: ‘Nnyom fi afiak aka ebiet iman mi ẹdude ke Ha′ran onyụn̄ ada n̄wan ọsọk eyen mi Isaac.’

Iwiwa, eyenufọk Abraham akada camel duop aka anyan isan̄ oro. Ke enye ekperede ebiet oro iman Abraham ẹkedụn̄de, enye ekebet ke obube mmọn̄. Ekedi ufọt uwemeyo, ini oro iban ke obio oro ẹwọrọde ẹdibọ mmọn̄ ke obube mmọn̄ oro. Ntre eyenufọk Abraham ama ọbọn̄ akam ọnọ Jehovah: ‘N̄wan oro ọbọde mmọn̄ ọnọ mi ye mme camel akpakam edi enye oro afo emekde edi n̄wan Isaac.’

Rebekah osobo ye Isaac

Ibịghike Re·bek′ah ama edi ndibọ mmọn̄. Ke eyenufọk Abraham eben̄ede enye mmọn̄ ndin̄wọn̄, enye ama ọnọ enye. Ndien enye ama ọbọ mmọn̄ ọnọ kpukpru camel oro itọn̄ asatde. Oro ekedi akamba utom koro mme camel ẹsin̄wọn̄ ata ediwak mmọn̄.

Ke Re·bek′ah ama akanam emi ama, eyenufọk Abraham obụp enye enyịn̄ ete esie. Enye n̄ko ama obụp mme imọ imekeme ndidan̄ eyo esiere ke ufọk mmọ. Enye ama ọdọhọ: ‘Ete mi edi Be·thu′el n̄ko ufan̄ odu ọnọ fi ndidan̄ ye nnyịn. Eyenufọk Abraham ama ọdiọn̄ọ ete ke Be·thu′el ekedi eyen eyeneka Abraham, Nahor. Ntre enye ama ọtọn̄ edọn̄ ọkọm Jehovah ke ndida enye n̄kosịm iman Abraham.

Okoneyo oro eyenufọk Abraham akasian Be·thu′el ye eyeneka Re·bek′ah eren, Laban ntak enye ekedide. Mmọ mbiba ẹma ẹnyịme ete Re·bek′ah etiene ọkọdọ Isaac. Re·bek′ah eketịn̄ nso ke ini ẹbụpde enye? Enye ọkọdọhọ, ‘Ih,’ imọ ikoyom ndika. Ntre, ndan̄ nsiere oro, mmọ ẹkedọk camel, ẹtọn̄ọ anyan isan̄ oro ẹfiak ke Ca′naan.

Ke ini mmọ ẹkesịmde, ekedi mbubreyo. Re·bek′ah ama okụt owo asan̄ade ke an̄wa. Ekedi Isaac. Enye ama adara ndikụt Re·bek′ah. Eka esie Sarah ama akpa isua ita kpọt ebede, ndien enye ke ọkọfụhọ oro. Edi, ke emi, Isaac ama edima Re·bek′ah etieti, ndien enye ama afiak okop inemesịt.

Genesis 24:1-67.



Mme Mbụme

  • Eren ye n̄wan emi ke ndise ẹdi mmanie?
  • Didie ke Abraham okoyom n̄wan ọnọ eyen esie, ndien ntak-a?
  • Didie ke ẹkebọrọ akam eyenufọk Abraham?
  • Rebekah eketịn̄ nso ke ini ẹbụpde m̀mê enye ayama ndidọ Isaac?
  • Nso ikanam Isaac afiak okop inemesịt?

Mme mbụme efen

Kpep N̄kpọ En̄wen

Rebekah Edi Eti Eyenan̄wan

Sio ndise emi ke Intanet nyụn̄ da Bible fo se nte ekpekpebede Rebekah.

Rebekah Ama Enyịme Ndinam se Inemde Jehovah Esịt

Nso ke ikpanam man itie nte Rebekah? Kot mbụk emi nyụn̄ kpep n̄kpọ efen efen ban̄a enye.