Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 14: Abasi Odomo Mbuọtidem Abraham

Mbụk 14: Abasi Odomo Mbuọtidem Abraham

NTE afo emekeme ndikụt se Abraham anamde mi? Enye akama ikwa, ndien etie nte enye oyom ndiwot eyen esie. Ntak enye akpanamde oro? Ke mbemiso yak ise nte Abraham ye Sarah ẹkenyenede eyen mmọ.

Abraham oyom ndiwa Isaac

Ti, Abasi ama ọn̄wọn̄ọ ete mmọ ẹyenyene eyeneren. Edi oro eketie nte ikemeke nditịbe, koro Abraham ye Sarah ẹma ẹsọn̄ ẹkaha. Nte ededi, Abraham ama onịm ete Abasi ekeme ndinam se itiede nte ikemeke nditịbe. Ntre nso iketịbe?

Ke Abasi ama akanam un̄wọn̄ọ esie, ofụri isua kiet ama ebe. Ekem ke Abraham ama okosịm isua 100 n̄ko Sarah osịm isua 90, mmọ ẹma ẹnyene eyeneren, Isaac. Abasi ama onịm un̄wọn̄ọ esie!

Edi ke Isaac ama ọkọkọri, Jehovah ama odomo mbuọtidem Abraham ete, ‘Abraham!’ Ndien Abraham ọkọbọrọ: ‘Se ami mi!’ Ndien Abasi ama ọdọhọ: ‘Da eyen fo, eyen fo kierakiet, Isaac, ka obot eke ndiwụtde fi. Do, wot eyen fo nyụn̄ nọ enye ke uwa.’

Abraham ọkọfụhọ didie ke mme ikọ oro koro Abraham ama ama eyen esie etieti. N̄ko ti, Abasi ama ọn̄wọn̄ọ ete, nditọ Abraham ẹyedụn̄ ke isọn̄ Canaan. Edi oro okpotịbe didie ke Isaac akpakpade? Ikan̄wan̄ake Abraham, kpa ye oro enye ama okop uyo Abasi.

Ke ini enye ama okosịm obot oro, Abraham ọkọbọp Isaac odori ke itie uwa oro enye ọkọbọpde. Do, enye okosio ikwa ndiwot eyen esie. Edi kpa ke ini oro, angel Abasi ama okot: ‘Abraham, Abraham!’ Ndien Abraham ama ọbọrọ: ‘Se ami mi!’

Abasi ama ọdọhọ, ‘Kunọ eyen oro unan, kunyụn̄ unam enye n̄kpọ ndomokiet. Ke emi mmọfiọk ke afo ọmọbuọt idem ye ami, koro afo ukesịnke mi eyen fo, eyen fo kierakiet.’

Nso mbuọtidem ke Abraham ekenyene ntem ke Abasi! Enye ama onịm ete n̄kpọ ndomokiet isọn̄ke ikan Jehovah, n̄ko ke Jehovah ekeme ndidemede Isaac ke n̄kpa. Edi ikenen̄ekede idi uduak Abasi nte Abraham owot Isaac. Ntre Abasi akanam erọn̄ ọkọmọ ke n̄kpet n̄kpet ikọt, onyụn̄ ọdọhọ Abraham awa enye ke ibuot eyen esie.

Genesis 21:1-7; 22:1-18.



Mme Mbụme

  • Nso ke Abasi ọkọn̄wọn̄ọ ndinam nnọ Abraham, ndien didie ke Abasi okosu un̄wọn̄ọ esie?
  • Nte ẹwụtde ke ndise emi, didie ke Abasi okodomo mbuọtidem Abraham?
  • Nso ke Abraham akanam okposụkedi enye mîkọfiọkke ntak emi Abasi okowụkde enye ndinam ntre?
  • Nso iketịbe ke ini Abraham okosiode ikwa ndiwot eyen esie?
  • Mbuọtidem oro Abraham ekenyenede ke Abasi okokpon didie?
  • Nso ke Abasi ọkọnọ Abraham ada anam uwa, ndien didie?

Mme mbụme efen