Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 9: Noah Ọbọp Ubom

Mbụk 9: Noah Ọbọp Ubom
Mme owo ke ẹsak Noah

NOAH ama enyene n̄wan kiet ye nditọ iren ita. Enyịn̄ nditọ esie ẹkedi Shem, Ham ye Japheth. Eyeneren kiet kiet ama enyene n̄wan. Ntre owo itiaita ẹkedu ke ubon Noah.

Abasi ndien akanam Noah anam esen n̄kpọ. Enye ọkọdọhọ enye ọbọp akwa ubom. Ubom emi ama okpon nte nsụn̄ikan̄, edi okotịm ebiet akamba anyan ekebe. Abasi ọkọdọhọ, ‘Nam enye enyọn̄ ita, nyụn̄ dọn̄ mme ubet ke esịt.’ Mme ubet oro ẹkenyene Noah ye ubon esie, mme unam, ye udia mmọ ẹdidiade.

Abasi n̄ko ọkọdọhọ Noah ọbọp ubom oro nte baba mmọn̄ mikemeke ndidụk. Abasi ọkọdọhọ: ‘Mmọn̄ ndọn̄ akwa ukwọ mmọn̄ ke isọn̄ edisobo ofụri ererimbot. Kpukpru owo midụhe ke ubom ẹyekpa.’

Noah ye nditọ esie ẹma ẹkop uyo Jehovah ẹnyụn̄ ẹtọn̄ọ ndibọp. Edi mmọ eken ẹkesasak kpọt. Mmọ ẹkekaiso ke idiọk. Baba owo ikonịmke Noah ke akpanikọ ke asiande mmọ se Abasi okoyomde ndinam.

Ubon Noah ke ẹtan̄ mme unam ye udia ẹdọn̄ ke ubom

Ama ada anyan ini ndibọp ubom sia okotịmde okpon. Ke akpatre ke uwak isua ẹbede, ẹma ẹkure enye. Ke emi, Abasi ọkọdọhọ Noah ada ndusụk orụk unam iba iba edisịn ke ubom, ayara ye uman. Edi mme orụk eken, Abasi ọkọdọhọ Noah ada itiaba. Abasi n̄ko ọkọdọhọ Noah ada kpukpru nsio nsio orụk inuen esịn. Noah ama anam ukem se Abasi ọkọdọhọde.

Ke oro ebede, Noah ye ubon esie ẹkedụk ubom n̄ko. Ndien Abasi eberi itịm. Noah ye ubon esie ẹbet ke esịt. Kere nte afo okpodude ke esịt ubom ye mmọ, ke ebet. Nte ukwọ eyedi k’akpan nte Abasi ọkọdọhọde?

Genesis 6:9-22; 7:1-9.



Mme Mbụme

  • Owo ifan̄ ikodu ke ubon Noah, ndien nditọ esie iren ita ẹkekere didie?
  • Ewe esen esen utom ke Abasi ọkọdọn̄ Noah, ndien ntak-a?
  • Didie ke mbọhọidụn̄ Noah ẹkenam n̄kpọ ke ini Noah akasiande mmọ aban̄a ubom oro?
  • Nso ke Abasi ọkọdọhọ Noah anam ye mme unam?
  • Ke Abasi ama ekeberi itịm ubom oro, nso ke Noah ye ubon esie ẹkenyene ndinam?

Mme mbụme efen