Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 5: Uwem Nsọn̄ọ N̄kpọ Ọtọn̄ọ

Mbụk 5: Uwem Nsọn̄ọ N̄kpọ Ọtọn̄ọ

KE ẸKPỌN̄DE in̄wan̄ Eden, Adam ye Eve ẹma enyene ediwak mfịna. Akana Mmọ ẹnam utom ọkpọsọn̄ ẹban̄a udia mmọ. Utu ke ndiye eto mfri, mmọ ẹkekụt ediwak akpap ye mbaraekpe ẹtịbede ẹkanade mmọ. Okotịbe ntem ke ini Adam ye Eve ẹketụtde utọn̄ ye Abasi, etrede ndidi ufan Esie.

Adam ye eyen esie ke ẹnam utom ọkpọsọn̄

Edi ke ọdiọkde akan oro, Adam ye Eve ẹketọn̄ọ ndikpa. Ti, Abasi ama ọtọt mmọ ete ke mmọ ẹyekpa n̄kpa ke mmọ ẹdiade mfri eto kiet. Ọfọn, ukem usen mmọ ẹkediade, mmọ ẹketọn̄ọ ndikpa. Mmọ ẹkesịme didie nditre ndikop uyo Abasi!

Nditọ Adam ye Eve kpukpru ẹkemana ke Abasi ama ekebịn ete ye eka mmọ ke in̄wan̄ Eden efep. Emi ọwọrọ ete, nditọ oro ẹna ẹkọri ẹsọn̄, ẹnyụn̄ ẹkpa.

Edieke Adam ye Eve ẹkpekopde uyo Jehovah, uwem ekpenem mmọ ye ndito mmọ. Mmọ kpukpru ẹkpedu nsinsi uwem ye inemesịt ke isọn̄. Baba owo ikpekọrike isọn̄, idọn̄ọ inyụn̄ ikpa.

Abasi oyom mme owo ẹdu nsinsi uwem ke inemesịt, ndien Enye ọn̄wọn̄ọ ke oro eyetịbe usen kiet. Idịghe ofụri isọn̄ ndikabade nye kpọt, edi kpukpru owo ẹyedu ke nsọn̄idem. N̄ko kpukpru owo ke isọn̄ ẹyedi eti ufan ẹnọ kiet eken ye Abasi.

Eve ye nditọ esie

Edi Eve ikedịghe aba ufan Abasi. Ntre ke ini enye akamande nditọ esie, ikememke inọ enye. Enye ama okop ubiak. Ndisọn̄ ibuot ye Jehovah ke akpan ama ada ekese mfụhọ ọnọ enye, nte afo unyịmeke?

Adam ye Eve ẹma ẹnyene ediwak nditọ iren ye iban. Akpa eyeneren mmọ ekekere Cain. Mmọ ẹkekot ọyọhọ eyeneren mmọ iba Abel. Nso ikotịbe inọ mmọ? Nte afo ọmọfiọk?

Genesis 3:16-23; 4:1, 2; Eriyarare 21:3, 4.



Mme Mbụme

  • Uwem eketie didie ye Adam ye Eve ke mmọ ẹma ẹkekpọn̄ in̄wan̄ Eden?
  • Nso ikọtọn̄ọ nditịbe nnọ Adam ye Eve, ndien ntak-a?
  • Ntak emi nditọ Adam ye Eve ẹkekọride ẹsọn̄ ẹnyụn̄ ẹkpade?
  • Edieke Adam ye Eve ẹkpekekopde uyo Jehovah, nso utọ uwem ke mmọ ye nditọ mmọ ẹkpenyene?
  • Nso ubiak ke Eve okokop ke ntak nsọn̄ibuot esie?
  • Akpan ye udọ Adam ye Eve ẹkekere didie?
  • Mmanie ẹdi nditọ eken ke ndise emi?

Mme mbụme efen

  • Kot Genesis 3:16-23 ye 4:1, 2.

    Didie ke isụn̄i oro ẹkesụn̄ide isọn̄ okotụk uwem Adam? (Gen. 3:17-19; Rome 8:20, 22)

    Ntak emi enyịn̄ oro Eve, emi ọwọrọde “Andidu Uwem,” okodotde? (Gen. 3:20)

    Didie ke Jehovah okowụt Adam ye Eve edikere mban̄a idem ke mmọ ẹma ẹkenam idiọkn̄kpọ? (Gen. 3:7, 21)

  • Kot Ediyarade 21:3, 4.

    “Mme akpa n̄kpọ” ewe ke afo odori enyịn ndikụt nte ẹbede ẹfep?