Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 3: Akpa Eren ye N̄wan

Mbụk 3: Akpa Eren ye N̄wan

NSO edi isio ke ndise emi? Ih, edi mme owo ẹdude ke esịt. Mmọ ẹdi akpa eren ye n̄wan. Anie akanam mmọ? Ekedi Abasi. Nte ọmọfiọk enyịn̄ esie? Edi Jehovah. Ndien ẹkedikot eren ye n̄wan oro Adam ye Eve.

Adam ye Eve ke in̄wan̄ Eden

Ntem ke Jehovah Abasi akanam Adam. Enye akada ntan ke isọn̄, ada oro anam idem ọfọnde ama, ikpọkidem eren. Ekem enye ofri ibifịk esịn ke ibuo owo oro, ndien Adam odu uwem.

Jehovah Abasi ama enyene utom ọnọ Adam. Enye ọkọdọhọ Adam osio kpukpru nsio nsio unam enyịn̄. Ndusụk Adam ama ekpeme mme unam oro ebịghi man enye okposio ofụri mmọ enyịn̄ ọfọnde akan. Nte Adam okosiode mme unam enyịn̄, enye ama ọtọn̄ọ ndikụt n̄kpọ. Nte ọmọfiọk se oro ekedide?

Kpukpru unam ẹma ẹnyene nsan̄a. Mme ete enịn ye eka enịn ẹma ẹdu, n̄ko mme ete lion ye eka lion ẹma ẹdu. Edi Adam ikenyeneke baba owo ke nsan̄a esie. Ntre Jehovah akanam Adam ede ọkpọsọn̄ idap, ndien enye ama osio ọkpọ n̄kan̄ esie kiet. Jehovah akada ọkpọ oro anam n̄wan ọnọ Adam, ndien enye akabade n̄wan ndọ esie.

Esịt ekenem Adam didie ke emi! N̄ko kere nte Eve ekenemde esịt ke ndisịn enye ke utọ ediye in̄wan̄ oro ndidu. Ke emi, mmọ ẹkpekeme ndinyene nditọ ndụn̄ ọtọkiet ke inemesịt.

Jehovah okoyom Adam ye Eve ẹdu uwem nsinsi. Enye okoyom mmọ ẹnam ofụri isọn̄ eye nte in̄wan̄ Eden oro. Esịt ekenem Adam ye Eve didie ke ekerede nte idinamde emi! Nte afo akpakama ndibuana ke ndinam isọn̄ edi ediye in̄wan̄? Edi inemesịt Adam ye Eve ikebịghike. Yak iyom ntak.

Psalm 83:18; Genesis 1:26-31; 2:7-25.



Mme Mbụme

  • Nso ukpụhọde idu ke ndise oro odude ke Mbụk 3 ye enye oro odude ke Mbụk 2?
  • Anie akanam akpa owo, ndien owo oro ekekere didie?
  • Nso utom ke Abasi ọkọnọ Adam?
  • Ntak emi Abasi akanamde Adam ede ọkpọsọn̄ idap?
  • Adam ye Eve ẹkpekedu uwem ebịghi adan̄a didie, ndien nso utom ke Abasi okoyom mmọ ẹnam?

Mme mbụme efen

  • Kot Psalm 83:18.

    Abasi ekere didie, ndien nso n̄wọrọnda idaha ke enye enyene ke ofụri isọn̄? (Jer. 16:21; Dan. 4:17)

  • Kot Genesis 1:26-31.

    Nso ikedi akpatre n̄kpọ oro Abasi okobotde ke ọyọhọ usen itiokiet, ndien didie ke edibotn̄kpọ emi okokpụhọde ye mme unam? (Gen. 1:26)

    Nso ndutịm ke Abasi akanam ọnọ mme owo ye unam? (Gen. 1:30)

  • Kot Genesis 2:7-25.

    Nso ikabuana ke utom oro ẹkenọde Adam ẹte osion̄o mme unam enyịn̄? (Gen. 2:19)

    Didie ke Genesis 2:24 an̄wam nnyịn ndifiọk nte Jehovah esede ndọ, edidian̄ade ntie, ye usiondọ? (Matt. 19:4-6, 9)