Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 10: Akwa Ukwọ

Mbụk 10: Akwa Ukwọ

KE AN̄WA ubom, mme owo ẹma ẹkaiso ke uwem mmọ ukem nte ẹsinamde. Mmọ ikosụk inịmke nte ke ukwọ eyedi. Etie nte mmọ ẹma ẹtịm ẹsak ẹkan. Edi ibịghike, mmọ ẹma etre imam.

Ndịk anam mme owo ye mme unam nte mmọn̄ ukwọ oyomde ndifụk mmọ

Usọp usọp edịm ama ọtọn̄ọ ndidep. Enye ọkọduọhọ oto enyọn̄ nte afo ọkpọduọkde mmọn̄ ke bọkịt. Noah ama enen! Edi ini ama ebe akaha ọnọ owo efen ekededi ndidụk ubom. Jehovah ama eberi itịm ọsọn̄.

Ibịghike, mmọn̄ ama ofụk ofụri unaisọn̄. Mmọn̄ oro akabade ebiet ikpọ akpa. Enye ekeberi ikpọ eto ọduọk, onyụn̄ oyụt ikpọ itiat, ndien anam akamba uyom. Ndịk ama anam mme owo. Mmọ ẹma ẹdọk mme obot. Oh, ọdọn̄ mmọ didie ndikakpan̄ utọn̄ nnọ Noah nnyụn̄ ndụk ubom ke ini itịm akanade in̄wan̄ ọnọ mmọ! Edi idahaemi, ini ama ebe akaha.

Mmọn̄ oro akaiso okon̄ akan. Mmọn̄ ama ọduọhọ oto enyọn̄ uwemeyo 40 ye okoneyo 40. Enye ọkọdọk mben ikpọ obot, ibịghike enye ama ofụk idem ata n̄kon̄ n̄kan ikpọ obot. Ntre kpa nte Abasi eketịn̄de kpukpru owo ye unam ke an̄wa ubom ẹma ẹkpa. Edi kpukpru owo ke esịt ẹma ẹbọhọ.

Noah ye nditọ esie ẹma ẹnam eti utom ndibọp ubom oro. Mmọn̄ ẹkemenede enye, ndien enye ọkọfiọrọ kpa ke enyọn̄ mmọn̄. Ekem usen kiet, ke edịm ama eketre ndidep, utịn ọtọn̄ọ ndisiaha. Nso utịbe ndise! Akamba inyan̄ kiet kpọt okodu akanade. Ndien n̄kukụre se ẹkekụtde ekedi ubom ọfiọrọde ke enyọn̄ esie.

Ubom ke ọfiọrọ ke enyọn̄ mmọn̄

Ata ikpọ owo oro ẹma ẹbe ẹfep. Mmọ ididụhe aba ndinọmọ ubonowo. Kpukpru mmọ ẹma ẹkpa nte mme eka mmọ ye kpukpru mme idiọk owo eken. Edi nso iketịbe inọ mme ete mmọ?

Mme ete ikpọ owo oro ikedịghe ata owo nte nnyịn. Mmọ ẹkedi mme angel oro ẹkedide isọn̄ edidụn̄ nte mme owo. Ntre, ke ini ukwọ ekedide, mmọ ikakpaha ye mme owo eken. Mmọ ẹma ẹtre ndisịne ikpọkidem owo mmọ ẹkenamde, n̄ko ẹkefiak ẹka heaven nte mme angel. Edi ikayakke mmọ ẹfiak ẹdi ubak ubon angel Abasi. Ntre, mmọ ẹkabade edi mme angel Satan. Ke Bible ẹkot mmọ mme demon.

Abasi ndien akanam ofụm ofịme, mmọn̄ ukwọ oro ama ọtọn̄ọ ndisuhọde. Ke ọfiọn̄ ition ẹma ẹkebe, ubom okodoro ke enyọn̄ obot kiet. Ediwak usen ema ẹbe, ndien mme andidu ke ubom ekekeme ndise an̄wa nnyụn̄ n̄kụt enyọn̄ ikpọ obot. Mmọn̄ ama akaiso ọsuhọde akan.

Ndien Noah ama ayak obubịt inuen ekotde raven ọwọrọ ke ubom. Enye ekenyene ndife n̄ka, ekem afiak edi sia mikekwe eti itie ndisọrọ. Enye ama akaiso anam emi, ndien nte enye afafiak edi, enye eyedoro ke ubom.

Ibiom

Noah okoyom ndise mme mmọn̄ ama asat ọkpọn̄ isọn̄, ntre enye afiak ọdọn̄ ibiom ọwọrọ ke ubom. Edi ibiom akafiak n̄ko edi koro enye ikekwe itie ndisọrọ. Noah ama afiak ọdọn̄ enye ọwọrọ ọyọhọ ikaba, ndien enye ada ikọn̄ olive ke inua edi. Ntre Noah ọkọfiọk ete ke mmọn̄ ama etek. Noah ama ọdọn̄ ibiom oro ọyọhọ ikata, ke akpatre enye okụt nsat isọn̄ ndidu.

Abasi ndien ama etịn̄ ikọ ọnọ Noah. Enye ọkọdọhọ: ‘Wọrọ ke ubom. Da ofụri ubon fo ye mme unam wọrọ.’ Mmọ ẹma ẹdu ke esịt ubom ẹkan isua kiet. Ntre nnyịn imekeme ndikụt nte ekenemde mmọ ndifiak n̄wọrọ an̄wa nnyụn̄ ndu uwem!

Genesis 7:10-24; 8:1-17; 1 Peter 3:19, 20.



Mme Mbụme

  • Ntak emi owo ndomokiet mîkekemeke ndidụk ubom oro ndondo oro edịm ọtọn̄ọde ndidep?
  • Uwemeyo ye okoneyo ifan̄ ke Jehovah akanam edịm edep, ndien mmọn̄ oro okokpon adan̄a didie?
  • Nso iketịbe inọ ubom oro ke ini mmọn̄ ọtọn̄ọde ndifụk isọn̄?
  • Ndi ata ikpọ owo oro ẹma ẹbọhọ Ukwọ oro, ndien nso iketịbe inọ mme ete mmọ?
  • Nso iketịbe inọ ubom oro ke ọfiọn̄ ition ẹma ẹkebe?
  • Ntak emi Noah akayakde raven ọwọrọ ke ubom?
  • Noah akasan̄a didie ọfiọk ke mmọn̄ ama etek ke isọn̄?
  • Nso ke Abasi eketịn̄ ye Noah ke enye ye ubon esie ẹma ẹkedu ke esịt ubom ke se ikande isua kiet?

Mme mbụme efen

  • Kot Genesis 7:10-24.

    Nsobo mme odu uwem n̄kpọ ke isọn̄ okokpon adan̄a didie? (Gen. 7:23)

    Ekebịghi adan̄a didie mbemiso mmọn̄ Ukwọ oro asatde? (Gen. 7:24)

  • Kot Genesis 8:1-17.

    Didie ke Genesis 8:17 owụt ke akpa uduak Abasi kaban̄a isọn̄ ikokpụhọkede? (Gen. 1:22)

  • Kot 1 Peter 3:19, 20.

    Ke ini mme ọsọn̄ibuot angel oro ẹkefiakde ẹka heaven, nso ubiomikpe ke mmọ ẹkenyene? (Jude 6)

    Didie ke mbụk aban̄ade Noah ye ubon esie ọsọn̄ọ mbuọtidem nnyịn nte ke Jehovah ekeme ndinyan̄a ikọt esie? (2 Pet. 2:9)