Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

Tanzania: Mme owo ẹdibọ n̄wed ke itie emi ẹdọn̄de n̄wed ke ukpatn̄kpọ ẹda ẹkwọrọ ikọ ke Dar es Salaam

 SE ẸKENAMDE ISUA OKO

Ẹkụt Mbon Emi Owo Mîsikwe

Ẹkụt Mbon Emi Owo Mîsikwe

AKPAN usụn̄ emi Mme Ntiense Jehovah ẹsikwọrọde ikọ Abasi edi ke ufọk ke ufọk, edi mmọ ndibon n̄wed ke okpokoro m̀mê ndidọn̄ ke ukpatn̄kpọ nda n̄kwọrọ ikọ anam mme owo ẹkop eti mbụk Obio Ubọn̄ Abasi n̄ko. (Matt. 24:14) Mme asuanetop ẹsibon n̄wed ke okpokoro ẹnyụn̄ ẹdọn̄ ke ukpatn̄kpọ ẹkwọrọ ikọ ke ebiet emi mme owo ẹsiwakde. Ndusụk ẹsida ke n̄kpri efe ẹnam emi. Ẹnọ n̄kpọ nte ukpatn̄kpọ 250,000 ẹsọk ediwak esop ke ofụri ererimbot. Nso idi ufọn utọ ukwọrọikọ emi?

Tọn̄ọ ke 2014 emi ẹketọn̄ọde ndikwọrọ ikọ ke ebiet emi mme owo ẹsiwakde ke Dar es Salaam ke Tanzania, n̄kpọ nte owo 700 ẹdọhọ ẹdikpep mmimọ Bible. Ediwak  mbon emi ẹmade ikọ Abasi ẹsidụk mbono esop ẹnyụn̄ ẹtọn̄ọ ndikpere Abasi. Ke ufan̄ isua kiet, mme owo emi ẹtode nsio nsio idụt ke Africa ye mbon mbakara ẹma ẹsion̄o se ibede n̄wed 250,000 ke mme ukpatn̄kpọ emi ẹkedọn̄de n̄wed ẹbon.

Mme Ntiense Jehovah emi ẹkwọrọde ikọ ke nsio nsio isuo emi ẹbede 300 ke Solomon Islands iyọhọke 2,000. Edi ndikwọrọ ikọ ke ebiet emi mme owo ẹsiwakde an̄wam ata ediwak owo do ẹtọn̄ọ ndidiọn̄ọ akpanikọ. Ke ibuot obio mmọ emi ẹkotde Honiara, magazine emi nditọete ẹkenọde mme owo ama ebe 104,000, ndien ndiye n̄kpri n̄wed ama ebe 23,600. Ediwak mbon emi ẹkebọde mme n̄wed oro ẹketo mme isuo ye obio emi Ntiense ndomokiet mîdụhe. Uwemeyo kiet, mme owo ẹma ẹbọ n̄wed Nso ke Bible Enen̄ede Ekpep? 400, owo 60 ẹnyụn̄ ẹdọhọ ẹdikpep mmimọ Bible.

Usenubọk kiet, ke ini Michael ye Linda n̄wan esie emi ẹdide mme asiakusụn̄ ẹkesụk ẹdọn̄de n̄wed ke ukpatn̄kpọ ke esụk kiet ke Margarita Island ke Venezuela, ete kiet emi ekerede Aníbal ama edibọ n̄wed Bible Ekpep. Enye ama ọdọhọ mmọ ke ete imọ akakpa ke esụk oro isua itiaba emi ebede, ke eka imọ ọdọn̄ọ etieti ke ntak ọkpọsọn̄ mfụhọ tọn̄ọ enye akakpa. Urua oro eketienede enye ama afiak edidọhọ Michael ye Linda ke ukem usen oro ke ete imọ akakpa. Enye ama osio fon okot eka esie onyụn̄ ọdọhọ Michael ọdọn̄ enye esịt. Michael ama anam oro, ndien tọn̄ọ usen oro eka esie esikot Michael ye Linda, ndien mmọ ẹsida Bible ẹdọn̄ enye esịt. Enye ama ọnọ mme Michael etop usen kiet ete: “Esịt enem  mi idahaemi sia mbufo ẹmedọn̄ mi esịt ẹnyụn̄ ẹnam nnen̄ede mbuọt idem ke Abasi.”

Ke ikpọ obio 14 ke United States, imesidọn̄ n̄wed ke ukpatn̄kpọ ida ikwọrọ ikọ ke nsio nsio itie 127 emi mme owo ẹsiwakde. Ke ufan̄ ọfiọn̄ itiaba tọn̄ọ ẹkedụk isua utom 2015, owo 8,445 ẹma ẹnyịme ẹdikpep mmimọ Bible. Ukwọrọikọ emi anam n̄ko mbon emi ẹkesidide Ntiense ẹfiak ẹtọn̄ọ ndidụk mbono esop. Ke uwụtn̄kpọ, Ntiense iba, n̄wan ye ebe, ẹma ẹkụt ke ete kiet emi ekerede Terry ke ese ukpatn̄kpọ kiet emi ẹkedọn̄de n̄wed ẹnịm ke Los Angeles ke California. Ntre mmọ ẹma ẹbụp enye m̀mê enye okot n̄wed nnyịn akpa. Enye ama ọdọhọ ke idi Ntiense, edi ke ima itre ndidụk mbono esop isua inan̄ ko ke edem. Mmọ ẹma ẹwụt enye Ezekiel 34:11, emi Jehovah ọdọhọde ete: “Ami nyoyom mme erọn̄ mi nnyụn̄ nse mban̄a mmọ”; ẹnyụn̄ ẹdọhọ enye ke imenyene ikpehe Intanet ye Edinam TV Mme Ntiense Jehovah. Edem usen, Terry ama ọnọ mmọ e-mail ete ke mbemiso ikokụtde mmọ, ke ikosụk ibọn̄ akam ite Abasi efen ọnọ imọ ke nditre ndisidụk mbono esop. Enye ama eben̄e Abasi ete an̄wam imọ ikpere enye. Terry ọdọhọ ete: “Ekem ibịghike mbufo ẹma ẹkọm mi imam imam, ẹkot itie Bible ẹsọn̄ọ mi idem, ẹnyụn̄ ẹtịn̄ se n̄kpanamde man nnyọn̄ ndi esop Jehovah. Ibọrọ akam mi ekedi oro.”

Enyene itie inan̄ ke Addis Ababa ke Ethiopia, emi nditọete ẹsidọn̄de n̄wed ke ukpatn̄kpọ ẹda ẹkwọrọ ikọ. Ke ọfiọn̄ ita kpọt nditọete ẹma ẹnọ mme owo n̄wed 37,275, owo 629 ẹma ẹnyụn̄ ẹdọhọ ẹdikpep mmimọ Bible. Akamba ete kiet ama etiene ọbọ n̄wed Bible Ekpep onyụn̄ ọsọsọp ọtọn̄ọ ndikot. Enye ama akaka ufọkn̄wed mme oku, edi ama enyene ediwak n̄kpọ emi aban̄ade  Obio Ubọn̄ Abasi ye Jesus emi akafịnade enye etieti. Enye ama afiak edi edem usen man ẹnam mme n̄kpọ oro an̄wan̄a enye. Ke ọyọhọ usen ita, enye ama ọdọhọ ẹdikpep imọ Bible onyụn̄ ọtọn̄ọ ndidụk mbono esop ke utịturua oro. Ete oro esidụk kpukpru ini idahaemi, ke onyụn̄ esịn idem ekpep ikọ Abasi.

Ethiopia: N̄wed usem Amharic ọdọn̄ọ emi ke ukpatn̄kpọ ke Addis Ababa

 Ete kiet emi edide Jew ama aka itie emi nditọete ẹdọn̄de n̄wed ke ukpatn̄kpọ ẹda ẹkwọrọ ikọ ke Mexico okobụp m̀mê mmọ ẹnyene n̄wed emi etịn̄de n̄kpọ aban̄a n̄kpa. Ẹma ẹdọhọ enye ke magazine emi etịn̄de n̄kpọ aban̄a n̄kpa okụre ẹnyụn̄ ẹnọ enye enye emi etịn̄de aban̄a ini iso. Enye ama omụm eyenete emi ọkọnọde enye n̄wed oro ubọk onyụn̄ ọdọhọ ete: “Idịghe ini iso edi mfịna mi. Ọdọn̄ mi ndiwot idem,” onyụn̄ ọtọn̄ọ eyet. Eyenete oro ama obụp enye ntak emi n̄kpa ọdọn̄de enye. Enye ama ọbọrọ ke uyo eyet ete ke eyen imọ akpa. Mmọ ẹma ẹwụt enye ibuot 7 ke n̄wed Bible Ekpep, ẹkot akpa ye udiana ikpehe ke idak ekpri ibuotikọ emi “Ke Ini Owo Ima Nnyịn Akpade” ẹnọ enye, ẹnyụn̄ ẹwụt enye itie ke utịt ibuot oro emi ọdọhọde ke Jehovah ayanam mme owo ẹset. N̄kpọ emi ama otụk enye tutu enye afiak omụm eyenete oro onyụn̄ ọdọhọ ete, “Ndi etịn̄ ata ofụri akpanikọ?” Nditọete oro ẹma ẹdọhọ enye ke Jehovah iditreke ndinam se enye ọn̄wọn̄ọde emi. Enye ama obụp m̀mê nso ke ikpanam man ifiak ikụt eyen imọ. Mmọ ẹma ẹdiomi ndika mbịne enye ke ufọk. Ke ini mmọ ẹkesịmde do, mmọ ẹma ẹkụt ke enye ama eben̄e idem ebet onyụn̄ oyom ẹtọn̄ọ ẹkpep imọ Bible.

Esenyịn circuit kiet emi akan̄wamde ẹtọn̄ọ ukwọrọikọ ke ebiet emi mme owo ẹsiwakde ke New York ọkọdọhọ ete: “Jehovah ọdiọn̄ utọ ukwọrọikọ emi tutu! Ukwọrọikọ emi anam ikọ esie esịm tọsịn tọsịn mme owo onyụn̄ anam ikụt ‘mme erọn̄ emi ẹkesopde,’ m̀mê mbon emi idem ama ekemem ye mbon emi ẹkesiode ke esop, inyụn̄ in̄wam mmọ ẹnyọn̄ ẹdi.”—Ezekiel 34:15, 16.