Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

Russia: Ke ẹkwọrọ ikọ ke Moscow

 SE ẸKENAMDE ISUA OKO

Mbụk Ikpe

Mbụk Ikpe

Ndisịn Enyịn̄ ke N̄wed Ukara

Ikpanaha Mme Ntiense Jehovah ẹsesịn enyịn̄ ke n̄wed ukara mbemiso ẹnamde n̄kpọ Abasi. Edi ndisịn enyịn̄ ke n̄wed ukara anam ẹyak nnyịn ibọp m̀mê ibọ itie isop idem ikpono Abasi inyụn̄ imen mme n̄wed ikọ Abasi idụk nsio nsio idụt.

  • Ke 2004, esop ke Russia ẹma ẹsio enyịn̄ n̄ka Mme Ntiense Jehovah ke Moscow ke n̄wed ukara, ndien oro ama anam ẹnen̄ede ẹkọbọ ikọt nnyịn. Mme bodisi ẹsimụm mmọ, mme owo ẹsisịn ntịme ye mmọ ke ini ẹkwọrọde ikọ, mbon emi ẹkenọde mmọ ufọk ẹda ẹnịm mbono esop ẹma ẹbọ ufọk mmọ. Ntre mmọ ikenyeneke aba itie inịm ikọ Abasi. Edi ke 2010, Esopikpe Europe Oro Ẹsede Ẹban̄a Unen Owo ẹma ẹdọhọ ke Russia ẹbiat unen Mme Ntiense Jehovah ke Moscow, yak mmọ ẹfiak ẹsịn enyịn̄ oro ke n̄wed. Enem nnyịn ndinam kpukpru owo  ẹdiọn̄ọ ke Itieutom Emi Ẹsede Ẹban̄a Ikpe ke Russia ẹma ẹsịn obufa n̄ka Mme Ntiense Jehovah ke Moscow enyịn̄ ke n̄wed ke May 27, 2015.

Tax

Ke ofụri ererimbot, ukara isidọhọke n̄ka Mme Ntiense Jehovah ẹkpe tax kpa nte mmọ mîsidọhọke ediwak ufọkabasi ye mme n̄ka emi owo mîdaha in̄wana okụk ẹkpe. Edi ndusụk ukara ẹsidọhọ ke ana nnyịn ikpe tax.

  • Ukara Sweden ẹdọhọ ke ẹsinam mbubehe ke Bethel, ke mbon Bethel inamke ke mfọn, ke ẹnam ke ukpeokụk. Mmọ ẹdọhọ ke ana Bethel ye mbon Bethel ẹkpe ediwak tọsịn euro ke okụk tax. Mme Ntiense ẹma ẹda n̄kpọ emi ẹka esop ke Sweden ẹnyụn̄ ẹwet leta itiokiet ẹnọ Esopikpe Europe Oro Ẹsede Ẹban̄a Unen Owo.

Ndida San̄asan̄a ye Ndisịn Ndidụk Ekọn̄

Mme Ntiense Jehovah ẹma ndinam se ẹtịn̄de ke Isaiah 2:4. Itie oro ọdọhọ yak mmọ ‘ẹda akan̄kan̄ mmọ ẹdom n̄kpọ ufụn̄isọn̄’ ẹkûnyụn̄ ‘ẹkpep aba ekọn̄.’ Mmọ isinyịmeke ndidụk ekọn̄ idem ekpededi ukara imaha ndinọ mmọ utom en̄wen ẹnam.

  • Ibet South Korea ọdọhọ ke ana kpukpru irenowo ẹdụk ekọn̄. Ndien ke n̄kpọ nte isua 60 emi ebede, Mme Ntiense emi ukara ẹkọbide ke ntak emi mmọ mîmaha ndidụk ekọn̄ ẹbe 18,000. Iwakke Ntiense ke idụt oro, emi owo esie m̀mê ufan esie mîdụhe ke ufọk-n̄kpọkọbi. Ke 2004 ye 2011, Akwa Esop Ibet Ukara ke idụt oro ẹma ẹdọhọ ke enen ndikọbi mmọ. Edi ke July 2015, mmọ ẹma ẹfiak ẹtọn̄ọ ndise m̀mê osụk enen̄ede enen ndisịn nditọete oro ke ufọk-n̄kpọkọbi, ndien Mme Ntiense Jehovah ke ofụri ererimbot ke ẹben̄e Jehovah ẹte anam ẹbiere n̄kpọ emi ndien man ẹtre ndikọbi n̄kparawa nnyịn ke South Korea ke ntak emi mmọ ẹkopde uyo esie.

  • Ọyọhọ isua 22 edi emi tọn̄ọ ẹkesịn Mme Ntiense Jehovah ita ke ufọk-n̄kpọkọbi ke Eritrea ke ntak emi mmọ mîmaha  ndidụk ekọn̄. Kiet ekere Paulos Eyassu, enye eken ekere Negede Teklemariam, ndien ọyọhọ ita ekere Isaac Mogos. Owo ikadaha mmọ ika esop, owo ikonyụn̄ inọhọ mmọ ufan̄ ẹtịn̄ se inamde mmọ ẹkûdụk ekọn̄. Mmọ ye Mme Ntiense Jehovah en̄wen, emi ẹbede 50, ke ẹsọn̄ọ ẹda ye Abasi kpa ye ofụri ufen emi ẹnọde mmọ ke ufọk-n̄kpọkọbi. Imenịm ke Jehovah ke okop “eseme” mbon emi ẹsịnde ke ufọk-n̄kpọkọbi ke ntak emi mmọ ẹkopde uyo esie, imonyụn̄ inịm ke enye ayan̄wam mmọ.—Ps. 79:11.

  • Ke ini ẹkeyomde mbufa mbonekọn̄ ke Ukraine ke August 2014, ẹma ẹkot Vitaliy Shalaiko ẹte edidụk ekọn̄. Sia enye mîmaha utom ekọn̄, enye ama ọdọhọ ẹnọ imọ utom en̄wen. Ẹma ẹkot enye ikpe ẹte ke esịn ndidụk ekọn̄; akpa esop ye ọyọhọ esop iba emi ẹkemende enye ẹka ẹma ẹdọhọ ke inyeneke se enye eduede. Ọyọhọ esop iba oro ẹma ẹdọhọ ke ndidọhọ mme owo ẹdụk ekọn̄ man ẹkpeme idụt mmọ iwọrọke ke ana ẹbọ owo unen esie, ke “owo ikemeke ndidọhọ ke ana mbon emi mîmaha utom ekọn̄ ẹdụk ekọn̄ man ẹkpeme idụt mmọ.” Mbon emi ẹkekotde enye ikpe ẹma ẹfiak esion̄o ikpe oro ẹka ata akamba esop. Ndien ke June 23, 2015, esop oro  ẹma ẹdọhọ ke se akpa esop iba oro ẹkebierede ama enen. Emi owụt ke mme owo ẹkeme nditre ndidụk ekọn̄ edieke esịt mmọ mîmaha utom ekọn̄, idem ke ini ẹnen̄erede ẹyom mbonekọn̄ ke idụt oro.

Ukraine: Vitaliy Shalaiko ke ọkwọrọ ikọ

Nte ẹkebierede ikpe oro anam Brọda Shalaiko ọdọhọ ete: “Se ẹtịn̄de ke Jeremiah 1:19 ọkọsọn̄ọ mi idem. Mma mben̄e idem nnọ se ededi emi editịbede, ndien se ikenen̄erede ibehe mi ekedi ndida nnọ Jehovah. Mmenịm ke enye idikpọn̄ke mi, ke enye ayan̄wam mi nsọn̄ọ nda nnam se enye amade. Edi ẹma ẹbiere ikpe oro ke usụn̄ emi akpade mi idem. Ẹma ẹbiere ikata ẹte ke nduehe. Nditọete ẹma ẹn̄wam mi tutu ke ofụri ini ikpe oro. Mmọ ikọkpọn̄ke mi.”

Ndida San̄asan̄a ye Ndifre Idụt

Nsio nsio usọrọ m̀mê n̄kpọ emi mme owo ẹsinamde man ẹwụt ke imama idụt mmimọ ẹsidi n̄kpọ idomo ọnọ mme Christian. Ẹsiwak ndidọhọ mme uyen ke ufọkn̄wed ẹkwọ ikwọ ufreidụt (national anthem) m̀mê ẹkọm ọfọn̄ etakubom (flag), kpa n̄kpọ emi Jehovah mîyomke mmọ ẹnam.

  • Ke Karongi ke Rwanda, ikpọ owo ufọkn̄wed ẹma ẹkot nditọ Mme Ntiense ikpe ẹte ke ikponoke ikwọ ufreidụt, sia nditọ oro ikamaha ndikwọ ikwọ oro. Ẹma ẹbịn mmọ ke ufọkn̄wed ẹnyụn̄ ẹnọ ndusụk ẹka n̄kpọkọbi. Edi ke November 28, 2014, esop kiet ke Karongi ẹma ẹbiere ke nditọ oro iduehe ẹnyụn̄ ẹdọhọ ke mmọ nditre ndikwọ ikwọ iwọrọke ke mmọ ikponoke ikwọ oro. Utọ n̄kpọ oro esiwak nditịbe ke nsio nsio idụt ke Africa, utọ nte Cameroon, Democratic Republic of Congo, Equatorial Guinea, ye Malawi; ndien ndusụk ini, ẹsibịn nditọ Mme Ntiense ke ufọkn̄wed. Nditọete nnyịn ke mme idụt emi ke ẹdomo ndinam ukara ye ikpọ owo ufọkn̄wed ẹdiọn̄ọ ntak emi nnyịn mîsitieneke inam mme n̄kpọ ntre.

  • Honduras: Mirna Paz ye Bessy Serrano ẹbọ n̄weditoro mmọ

    Ke December 2013, owo ikamaha ndinọ nditọ Mme Ntiense Jehovah iba n̄weditoro ke ufọkn̄wed kiet ke Lepaera ke Honduras, sia mmọ ikamaha ndikwọ ikwọ ufreidụt nnyụn̄  n̄kọm ọfọn̄ etakubom. Ntiense Jehovah iba emi ẹdide mme ekpeibet ẹma ẹkekụt akwaowo kiet ke itieutom emi ẹsisede ẹban̄a ufọkn̄wed ẹnyụn̄ ẹwụt enye se mme idụt en̄wen ẹkebierede ẹnọ nditọ Mme Ntiense. Akwaowo oro ama ọfọn uwem onyụn̄ ọdọhọ yak nditọ oro ye mme ete ye eka mmọ ẹwet mfịna mmọ ẹnọ owo emi esede aban̄a n̄kpọ ikpe ke Itieutom Emi Ẹsede Ẹban̄a Ufọkn̄wed ke Honduras. Ke enye ama ekese n̄kpọ oro, enye ama ọnọ uyo ke July 29, 2014, ete ẹyak kpukpru owo ẹka n̄wed, owo okûfịna owo ke usụn̄ ekededi ke ufọkn̄wed. Enye ama ọdọhọ ẹnọ nditọ Ntiense Jehovah oro n̄weditoro mmọ.

Ukara Ẹsịn Mfịna ye Mmọ

Nnyịn Mme Ntiense Jehovah imesikwọrọ Obio Ubọn̄ Abasi ke ofụri ererimbot nte Jesus ọkọdọhọde, isop idem man ikpono Abasi inyụn̄ ikpep Ikọ esie kpukpru ini. Imesikpep nditọ nnyịn ibet Jehovah inyụn̄ ‘ibet iyịp’ nte Bible ọdọhọde. (Utom 15:20; Deut. 6:5-7) Ndinam se Abasi ọdọhọde emi esinam idụk mfịna ye mbon ukara sia edinam nnyịn isin̄wan̄ake mmọ ndusụk ini.

  • Ke Florida ke U.S.A., esop kiet ẹma ẹkpe ikpe n̄wan ye ebe ẹnyụn̄ ẹbiere ke n̄wan esie emi mîdịghe Ntiense Jehovah  enyene unen ndikpep nditọ mmọ ita ikọ Abasi. Ẹma ẹdọhọ ebe okûdedei ekpep nditọ mmọ se Catholic mîsikpepke. Edi enye ama ada ikpe oro aka esop usion̄o ikpe, ndien ke August 18, 2014 esop oro ẹma ẹwọn̄ọde ubiereikpe oro. Esop oro ẹkeda se ẹma ẹkebebiere ke ini edem ẹbiere n̄kpọ emi ẹnyụn̄ ẹwet ẹte: “Owo isibiereke ite ke ete m̀mê eka emi eyen esie mîdụhe ye enye inyeneke unen ndikpep eyen esie mban̄a Abasi esie edieke ata akpan n̄kpọ ndomokiet mîdụhe emi owụtde ke se enye ekpepde eyen oro ekeme ndibiat eyen oro.”

    Se ẹkebierede emi anam nditọ oro ẹbọ ufọn nti item ye ndausụn̄ emi Jehovah Abasi ọnọde. Kpukpru mmọ ke ẹsịn idem ẹnam n̄kpọ Abasi ye Mme Ntiense Jehovah ke obio emi mmọ ẹdude. Ete mmọ ọkọdọhọ ete: “N̄kpọ emi enen̄ede ekpep mi n̄kpọ. Enyene ndusụk n̄kpọ emi odomode mbuọtidem mi usen ifan̄ emi, edi Jehovah ke an̄wam mi nsọn̄ọ nda. Mmọdiọn̄ọ ke ẹyekọbọ nnyịn sia imekde ndinam n̄kpọ Jehovah.”

  • Namibia: Efigenia Semente ye nditọ esie mbita

    Sista nnyịn kiet ke Namibia, emi ekerede Efigenia Semente onyụn̄ enyenede nditọ ita ama osobo ata akamba idomo. Enye ama enyene mfịna ke ini okoyomde ndiman ọyọhọ eyen ita, ndien mbon mmọ emi mîdịghe Mme Ntiense Jehovah ye ndusụk mbon ufọkibọk ẹma ẹka esop ẹkebọ n̄wed ẹte ẹsịn enye iyịp. Enye ama eyịre ete ẹkûsịn imọ iyịp onyụn̄ esịn ikpe ke esop man owụt ke imenyene unen nditre ndisịn iyịp. Ke June 24, 2015, N̄kponn̄kan Esopikpe ke Namibia ẹma ẹbiere ke enye enen, ẹnyụn̄ ẹdọhọ ke ‘owo kiet kiet enyene unen ndibiere se akpanade ẹnam imọ ke idem ye se owo mîkpanamke, m̀mê enye asan̄a ye idịbi m̀mê isan̄ake.’ Sista Semente ọkọdọhọ ete: “Ini emi ke ikenen̄ede ikụt ke Jehovah odu ye nnyịn. Enem mi tutu ndidu ke otu ikọt esie. Jehovah enen̄ede ese aban̄a nnyịn!”

  • Esinem Mme Ntiense Jehovah ke Switzerland ndikwọrọ ikọ ke nsio nsio itie emi mme owo ẹsiwakde ke ikpọ obio. Edi ke Geneva ẹma ẹnịm ibet ẹte “ẹkûnịm okpokoro m̀mê ukpatn̄kpọ emi ẹdọn̄de n̄kpọ ufọkabasi ke eferife.” Mme Ntiense  ẹma ẹsịn ikpe ke esop ẹte ke utọ ibet oro “enen̄ede abiat unen oro mme owo ẹnyenede ndinam n̄kpọ Abasi mmọ nnyụn̄ ntịn̄ ekikere mmọ nnọ mbon en̄wen.” Esop ẹma ẹdọhọ ke mmọ ẹnen, ndien mmọ ẹma ẹnam mbon ukara ke nsio nsio itie ẹdiọn̄ọ ini ye itie emi mmimọ iyomde ndinịm okpokoro m̀mê ukpatn̄kpọ emi ẹdọn̄de n̄wed nda n̄kwọrọ ikọ.

  • Ikpọ owo ukara ke Azerbaijan ke ẹsịn ikpafak man Mme Ntiense Jehovah ẹkûnyene ifụre ẹnam n̄kpọ Abasi. Itieutom emi ẹsisede n̄kpọ ẹban̄a ukpeme idụt ẹsima ndikot nsio nsio Ntiense mfak mbụme. Mmọ ẹsika ufọk Mme Ntiense Jehovah ẹkeyom n̄wed emi ukara ẹkedọhọde ẹkûmen ẹdụk idụt mmọ. Idem ama akpa nsio nsio idụt ke ini mmọ ẹkemụmde Ntiense Jehovah iba, Irina Zakharchenko ye Valida Jabrayilova, ẹsịn ke ufọk-n̄kpọkọbi ke February 2015 ẹte ke ẹkpep mme owo Bible. Kpa ye oro nnyịn mîmaha ofụri ufen emi ẹnọde Mme Ntiense, esịt enem nnyịn ke mmọ ke “ẹkwọrọ eti mbụk obio ubọn̄” uko uko inyụn̄ iyakke idem emem mmọ.—Matt. 24:14.

  • Ukara Russia ẹfịna Mme Ntiense Jehovah uwem ẹbịghi etieti, inyụn̄ iyakke mmọ ẹnam n̄kpọ Abasi. Idahaemi mmọ  ẹdọhọ ke n̄wed 80 ke otu n̄wed Mme Ntiense Jehovah ẹdi “ndiọi n̄wed.” Ndien ẹkpekụt owo ye ekededi ke otu n̄wed oro, utọ nte N̄wed Mi eke Mme Mbụk Bible, ọwọrọ enye abiat ibet edi oro. Ikụreke ke oro, ke December 2014, N̄kponn̄kan Esopikpe Russia ẹma ẹdọhọ ke jw.org edi “idiọk ikpehe” Intanet. Mme kọmpeni emi ẹsinamde mme owo ẹkeme ndidụk Intanet ke Russia iyakke mme owo ẹdụk jw.org aba, ndien nditetịn̄ n̄kpọ mban̄a enye edi idiọkn̄kpọ do. Tọn̄ọde ke March 2015, mbon emi ẹsimụmde n̄kpọmbet iyakke ẹmen n̄wed Mme Ntiense Jehovah ndomokiet ẹdụk Russia, esịnede Bible ye mme n̄wed eken emi esop ẹkedọhọde ke idịghe ndiọi n̄wed.

lkpe Mme Ntiense ke esesịne ke esop tutu emi ke Taganrog. Mbon ukara ẹkekot owo 16 ke otu mmọ ikpe ẹte ke ẹma ẹdiomi ẹnyụn̄ ẹtiene ẹdụk ikọ Abasi. Ke Samara, mbon ukara ẹma ẹkebọ esop odudu ẹda ẹsio enyịn̄ n̄ka Mme Ntiense ẹfep ke n̄wed ẹte edi “idiọk n̄ka.” Kpa ye emi ẹnamde nditọete nnyịn ke Russia ẹnyọn̄ ye isọn̄, mmọ ẹnen̄ede ẹbiere ndika iso nnọ “Abasi se inyenede Abasi,” iyakke idem emem mmọ.—Matt. 22:21.