Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

 SE ẸKENAMDE ISUA OKO

“Imama Edinam TV Mme Ntiense Jehovah Tutu!”

“Imama Edinam TV Mme Ntiense Jehovah Tutu!”

KE October 6, 2014 ẹma ẹtọn̄ọ Edinam TV Mme Ntiense Jehovah ke Ikọmbakara. * Tọn̄ọde ke August 2015, ẹkabade enye ke usem 70 man Mme Ntiense emi ẹsemde mme usem oro ẹtiene ẹbọ ufọn. Ediwak owo ke ofụri ererimbot ẹtịn̄ nte obufa edinam TV emi esinemde mmọ. Nso ye nso ke ẹkenam man ẹtọn̄ọ ndisio edinam emi?

Ẹma ẹmek itie emi edifọnde ke ọfis emi odude ke 30 Columbia Heights ke Brooklyn, New York, emi ibuot itieutom Mme Ntiense Jehovah odude. Ẹma ẹda urua  kiet kpọt ẹtan̄ n̄kpọ ẹwọrọ do, ndien mbon emi ẹsidiọn̄de n̄kpọ ke Bethel ẹma ẹdiọn̄ itie oro man edi se ẹdade ẹnam edinam TV emi. Mbon en̄wen ẹma ẹbot mme n̄kpọ emi ẹdinamde itie oro eye. Ediwak nditọete ke ofụri United States ẹma ẹdrọ nte itie oro editiede ẹnyụn̄ ẹdiomi nte ẹdinamde ibọp enye usọp usọp. Ẹma ẹda usen ifan̄ kpọt ẹnam mme n̄kpọ emi ẹsidade owo ediwak ọfiọn̄ ndinam, ndien nditọete emi ẹsidepde n̄kpọ ẹnọ n̄kọk itieutom ẹma ẹsọsọp ẹtobo ediwak n̄kpọ emi ẹyomde.

Ẹma ẹdọn̄ ata ediwak waya ke itie mmọ ẹnyụn̄ ẹkụt ẹte ke kpukpru n̄kpọ ada ọfọn. Mme ebreikwọ nnyịn ẹma ẹto nsio nsio idụt ẹdi Patterson ẹdibre ikwọ emi ẹsibrede ke ntọn̄ọ ye ke utịt edinam TV nnyịn. Nditọete ke Brooklyn, Patterson, Wallkill, ye ke nsio nsio idụt ẹma ẹtọn̄ọ ndisịn idem nnam mme vidio emi ẹdibrede. Ke ẹma ẹkenam itie oro ẹma, ẹma ẹtọn̄ọ nditịm mme edinam TV emi ẹdinamde ke akpa ọfiọn̄ ifan̄.

Ufọkutom Edinam TV Mme Ntiense Jehovah ke Brooklyn ke New York

Ke ini ẹkebụpde ete kiet emi esibọpde ufọkutom radio ye TV m̀mê akpada ọfiọn̄ ifan̄ ndibọp utọ itie oro, enye ọkọdọhọ ke akpada isua kiet ye ọfiọn̄ itiokiet. Edi nditọete nnyịn ẹma ẹnam itie oro ẹma ke ufan̄ ọfiọn̄ iba kpọt.

Edinam TV emi enem mme owo tutu! Ẹsiwak ndisịn edinam ọfiọn̄ kiet kiet ke akpa Monday, ndien mme owo ẹsise edinam emi ẹbe utịm ike miliọn iba ọfiọn̄ oro. Mme owo ẹsise edinam TV ọfiọn̄ kiet kiet ye mme vidio eken emi ẹdọn̄de ẹbe utịm ike miliọn duop ke ọfiọn̄.

“Edinam emi anam nnen̄ede mma esop Jehovah nnyụn̄ n̄kpere Otu Emi Ẹsede Ẹban̄a Utom Mme Ntiense Jehovah. Mmọdiọn̄ọ ke ntiene nsịne ke ubon emi mme owo ẹnen̄erede ẹma kiet eken.”—Kenya

Mme Ntiense Jehovah ẹda edinam TV emi didie? Kop ndusụk n̄kpọ emi nsio nsio owo ẹtịn̄de emi owụtde nte mme owo ẹmade edinam emi ke page 14-15.

  •  “Mbubreyo emi ama enem mi utọ oro idụhe! Esịt ama enem mi tutu ke ami ye n̄wan mi ima ikese edinam eke May 2015 ima. Ata eti n̄kpọ kiet emi Jehovah ọnọde nnyịn edi emi. Imọkọm Otu Emi Ẹsede Ẹban̄a Utom Mme Ntiense Jehovah ye kpukpru nditọete emi ẹnamde mme n̄kpọ emi ẹnọ nnyịn.”—Indonesia.

  • “Ini akpa, ediwak nditọete ikesikopke nte mbon Otu Emi Ẹsede Ẹban̄a Utom Mme Ntiense Jehovah ẹkwọrọde ikọ. Edi idahemi mmọ ẹsikop ẹnyụn̄ ẹkụt mmọ ẹkwọrọde ikọ. Etie nte idu kiet ye mmọ ye nditọete nnyịn ke ofụri ererimbot.”—Kenya.

  • “Sia ebe mi mîdịghe Ntiense Jehovah, esisọn̄ mi ndinịm utuakibuot ubon ye nditọ iba emi inyenede. Ntre, etie nte ẹkesio edinam TV emi ke ntak mi. Enye esinam mi nti ke mmenyene nditọeka ke ofụri ererimbot onyụn̄ ọsọn̄ọ mi ye nditọ mi idem. Ata edidiọn̄ Abasi edi emi.”—Britain.

  • “Imama Edinam TV Mme Ntiense Jehovah tutu! Abasi ama ọbọrọ akam nnyịn onyụn̄ anam ẹsikabade enye ke nsio nsio usem. Ke ini isikụtde adan̄a nte mbufo ẹmade n̄kpọ Abasi ẹnyụn̄ ẹkopde inemesịt, emi esisọn̄ọ nnyịn idem. Tọn̄ọ ẹketọn̄ọ edinam emi, imenen̄ede ikụt ke idu ke esop Jehovah emi mînyeneke mbiet.”—Czech Republic.

  •  “Ndisikop nte mbon Otu Emi Ẹsede Ẹban̄a Utom Mme Ntiense Jehovah ẹkwọrọde ikọ ke usem nnyịn esinam nnen̄ede mma Jehovah.”—Brazil.

  • “Mmanam n̄kpọ Jehovah isua 16 idahaemi, edi n̄kukụre usen emi esịt ekenemde mi ntem ekedi usen emi n̄kanade baptism. Mbọk ẹmenam tutu ndisisio edinam emi nnọ nnyịn.”—Brazil.

Imenịm ke Jehovah ayanam edinam TV emi aka iso an̄wam nditọete nnyịn ke ofụri ererimbot onyụn̄ anam ẹnen̄ede ẹtoro enye.

^ ikp. 1 Edinam TV Mme Ntiense Jehovah odu ke tv.jw.org.