Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

Leta Otu Emi Ẹsede Ẹban̄a Utom Mme Ntiense Jehovah

Leta Otu Emi Ẹsede Ẹban̄a Utom Mme Ntiense Jehovah

Ndima Nditọete:

Prọfet Isaiah ọkọdọhọ ke mbon Judah ẹkeforo ke ntak oro Jehovah ọkọdiọn̄de mmọ. Isikot ke Isaiah 26:12 ite: “O Jehovah, . . . afo amanam kpukpru utom nnyịn ọnọ nnyịn.” Kpukpru se iketịbede ke isua utom emi osụk ebede mi anam nnyịn n̄ko itiene itịn̄ ukem ikọ oro. Imokụt ke Jehovah ke anam “mme utịben̄kpọ emi akanam owo mînamke.” (Ex. 34:10) Se ndusụk usụn̄ emi enye ọkọdiọn̄de nnyịn mi.

Ikpehe Intanet nnyịn, jw.org, an̄wam mme owo etieti. Enye odu idahaemi ebe usem 600, ndien ẹdọn̄ mme n̄wed ke se ibede usem 750. Inam didie idiọn̄ọ ke ikpehe Intanet nnyịn emi an̄wam mbon emi ẹmade Abasi ẹdifiọk se Bible enen̄erede ekpep? Se uwụtn̄kpọ kiet mi: Ebe ye n̄wan kiet ikamaha ndika ufọkabasi aba ke ntak mbubịk emi mmọ ẹkekụtde do. Edi nte mmọ ẹsụk ẹyomde mbon emi ẹnamde ata Ikọ Abasi, mmọ ẹma ẹdikụt ikpehe Intanet nnyịn ẹnyụn̄ ẹsika do ke ubọk ke ubọk ẹkese mme vidio ẹnyụn̄ ẹkot se ẹdọn̄de do. Mmọ ẹma ẹsio n̄ko Ẹdụn̄ọde N̄wed Abasi ke Usen ke Usen ẹtọn̄ọ ndisikot ye nditọ mmọ mbiba kpukpru usen. N̄wed emi ke mmọ ẹkesụk ẹkot usenubọk emi Mme Ntiense Jehovah ẹkekade ufọk mmọ. Mmọ ẹma ẹdọhọ Mme Ntiense oro ke se mmimọ ikokotde ke ikpehe Intanet nnyịn ama anam mmimọ inam ediwak  ukpụhọde. Mmọ ẹma ẹsọhi se mmọ ẹkewetde ke idem, ẹduọn̄ọ ndisọi mbiet ye n̄kpanuen utọn̄ emi mmọ ẹketịbide nsio nsio itie ke idem ẹdọn̄, ẹtre utọ usọrọ nte Christmas, ẹnyụn̄ ẹtre ndise ndiọi fim. Mmọ ẹkenam kpukpru emi mbemiso Mme Ntiense Jehovah ẹkekwọrọde ikọ ẹnọ mmọ. Ini ẹsụk ẹwetde mbụk emi, ebe ye n̄wan oro ye adiaha mmọ ẹkedi mme asuanetop emi mînaha baptism, ndien ete ye eka ẹma ẹduak ndina baptism ke mîbịghike.

Ediwak owo ẹtịn̄ n̄ko nte mmimọ imade obufa Edinam TV Mme Ntiense Jehovah (JW Broadcasting). Edinam TV emi odu ke usem 70 idahaemi, ẹyenyụn̄ ẹdian mme usem efen nte ini akade. Ediwak ubon ẹsise edinam TV emi ke mbubreyo Utuakibuot Ubon mmọ. Eyenete kiet ọdọhọ ke “kpa ye emi esop Jehovah okponde etieti, ke imenen̄ede ikpere nditọete nnyịn ke ibuot itieutom idahaemi!”

Ikpọ mbono ẹsinem ikọt Jehovah etieti, ndien eke isua utom 2015 ama enem mmọ n̄ko. Ibat vidio emi ẹkebrede ye ndise emi ẹkesiode ẹkedi 42, ẹma ẹnyụn̄ ẹbre ndinem ikwọ mbemiso ẹtọn̄ọde ikpehe edinam mbitiokiet. Eyenete kiet emi ama akanam n̄kpọ Abasi ke ediwak isua ọdọhọ ke eketie nte mbon emi ẹkedụkde mbono oro ikoyomke ndikpọn̄ itie mmọ ke ini edinam akade iso mbak mmọ iditaba n̄kpọ ndomokiet. Isụn̄utom kiet ama etịn̄ nte mbono isua oko eketiede enye ke idem ete: “Mme vidio oro ẹkebrede ama anam nnen̄ede mma ikọ Abasi nnyụn̄ n̄kụt ke Obio Ubọn̄ enen̄ede ekpere.”

Jehovah ama onyụn̄ ọnọ nnyịn mbufa ikwọ Obio Ubọn̄ isua oko. Usụn̄ en̄wen emi enye ọkọdiọn̄de  nnyịn edi oro. Ebe ye n̄wan kiet ẹkewet ẹte: “Ke ini ikwọde mbufa ikwọ emi, esitie nte Jehovah afat nnyịn adian ke idemesie. Mmọ ẹsinam nnyịn ifre uwa.” Akamba mbono isua oko ama anam nnyịn iti ọkpọsọn̄ utom oro n̄kaikwọ Watchtower ẹsinamde man nnyịn ikop inemesịt inyụn̄ itoro Jehovah!

Mbọk ẹdara mbon oro ẹfiakde ẹnyọn̄ ẹdi ukem nte Jehovah adarade mmọ

Ndi ẹmesikama okpokoro m̀mê ukpatn̄kpọ ẹkwọrọ ikọ ke ebiet emi mme owo ẹwakde ke efakutom mbufo? Utọ ukwọrọikọ emi an̄wam ata ediwak owo emi mîkopke ukwọrọikọ akpa, esịnede mbon oro ẹdụn̄de ke ikpọ ufọk ye efak emi ẹsịnde ọkọ, emi owo mîsisọpke idụk. Enye an̄wam n̄ko mbon emi mîwọrọke an̄wautom aba. Ke January 2015, ete kiet ama asan̄a ebịne Mme Ntiense emi ẹkekamade ukpatn̄kpọ ẹkwọrọ ikọ ke South Korea. Enye ama ọdọhọ mmọ ete ke imọ imekere ndondo emi nte ikpesịnde idem inam n̄kpọ Abasi. Mmọ ẹma ẹtọn̄ọ ndikpep enye Bible. Enye ama ọtọn̄ọ ndidụk mbono esop ke February, etre ndin̄wọn̄ sika ke March, onyụn̄ aka ekese ọfis nnyịn ke South Korea ke April. Enye ke aka iso anam ukpụhọde ke onyụn̄ anam ọfọn. Uwụtn̄kpọ kiet kpọt edi emi ke otu mbon emi ibọde mi ke ibuot itieutom nnyịn.

Iben̄e Jehovah ite anam se idude ke ekpri n̄wed Fiak Tiene Jehovah, emi ẹkesiode ke akamba mbono isua oko an̄wam mbon emi mîdụkke mbono esop aba, man mmọ ẹfiak ẹnyọn̄ ẹbịne enye mbemiso utịt edi! Mbọk ẹdara mbon oro ẹfiakde ẹnyọn̄ ẹdi ukem nte Jehovah adarade mmọ.—Ezek. 34:16.

Jehovah ama ọdiọn̄ ikọt esie ata etieti ke isua utom oro osụk ebede. Nso ke enye edinam inọ nnyịn isua emi? Nnyịn idiọn̄ọke kan̄a, yak ibet ise. Mbọk ẹfiọk ẹte  ke nnyịn mbon Otu Emi Ẹsede Ẹban̄a Utom Mme Ntiense Jehovah imama kpukpru mbufo ata etieti, inyụn̄ ibọn̄ akam kpukpru ini ite n̄kpọ ọfọn mbufo.

Ẹtie sụn̄,

Nditọete mbufo,

Otu Emi Ẹsede Ẹban̄a Utom Mme Ntiense Jehovah