Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

 INDONESIA

Mmọ Ẹkop Inemesịt Ndinam Ẹdiọn̄ọ Enyịn̄ Jehovah

Mmọ Ẹkop Inemesịt Ndinam Ẹdiọn̄ọ Enyịn̄ Jehovah

Ofụri isua oro ẹketrede utom nnyịn ke Indonesia, nditọete ẹma ẹnam item Jesus emi ọdọhọde “ẹnyene mbufiọk nte urụkikọt ẹnyụn̄ ẹnana ndudue nte ibiom.” (Matt. 10:16) Edi ke ẹma ẹkeyak ifiak itọn̄ọ utom, akana ediwak mmọ ẹkpep ndikwọrọ ikọ “uko uko.”—Utom 4:31.

Ke uwụtn̄kpọ, ndusụk nditọete ikesimaha ndikwọrọ ikọ ke ufọk ke ufọk, edi ẹkesima ndifiak n̄kese mbon emi ẹkemade ukwọrọikọ nnyụn̄ n̄kpep mme owo Bible. Ndusụk ikesikwọrọke ikọ inọ mbon Muslim. Ediwak ẹkesima ndidọhọ ke idi mme Christian utu ke ndidọhọ ke idi Mme Ntiense Jehovah. Mmọ ẹkesima ndikama Bible emi mbon Christendom ẹkesiode n̄kwọrọ ikọ utu ke Edikabade Eke Obufa Ererimbot. * Ndusụk ikesimaha ndinọ mme owo n̄wed nnyịn.

Nte ẹkesikwọrọde ikọ ke ini ẹketrede utom nnyịn akanam ndusụk nditọete ẹnam n̄kpọ ntre. Ntak efen ekedi ke mbon Indonesia ẹsinam n̄kpọ ufep ufep, isinyụn̄ imaha ndisio akpanikọ ntịn̄ nnennen nnennen mbak idiyat owo esịt. Ẹkenam didie ẹn̄wam mmọ?

Jehovah akada item nditọete emi ẹsọn̄de idem ke esop an̄wam mmọ. (Eph. 4:11, 12) Ke uwụtn̄kpọ, ke ini Brọda Stephen Lett emi esịnede ke Otu Emi Ẹsede Ẹban̄a Utom Mme Ntiense Jehovah akakade Indonesia ke 2010, enye ama ọdọhọ nditọete ẹsikama Edikabade Eke Obufa Ererimbot ẹkwọrọ ikọ man mme owo ẹdiọn̄ọ enyịn̄ Abasi. Misja Beerens emi edide isụn̄utom ọdọhọ ete: “Ukwọrọikọ Brọda Lett ama enen̄ede odụk ediwak nditọete esịt. Mmọ  ẹma ẹdikụt ke ana inam mme owo ẹdiọn̄ọ ke idi Mme Ntiense Jehovah inyụn̄ ikpep mmọ se isịnede ke Bible.”

Sia ediwak mbon Muslim ke Indonesia ẹsikerede ke nnyịn itie nte mme ufọkabasi eken, ẹma ẹnọ nditọete item emi ke Utom Obio Ubọn̄ usem Indonesian ẹte: “Mbemiso itọn̄ọde ukwọrọikọ, esifọn inam mme owo ẹdiọn̄ọ ke idi Mme Ntiense Jehovah. . . . Nnyịn idi ikọt Jehovah, inyụn̄ iyom mme owo ke efakutom nnyịn ẹdiọn̄ọ enyịn̄ esie ye se enye aduakde ndinam nnọ mme owo!” Shinsuke Kawamoto emi odude ke Bethel ke Indonesia ọdọhọ ete: “Ndinam mme owo ẹdiọn̄ọ ke idi Mme Ntiense Jehovah esinam mmọ ẹyom ndikop se itịn̄de. Ediwak mbon Muslim ẹnen̄ede ẹyom ndidiọn̄ọ nnyịn, ẹnyụn̄ ẹyom ndidiọn̄ọ se inamde nnyịn ikpụhọde ye mme ufọkabasi eken. Emi esinam ikeme ndikwọrọ ikọ nnọ mmọ.”

Ẹma ẹdọhọ nditọete ẹsinọ ediwak owo Enyọn̄-Ukpeme ye Ẹdemede! Lothar Mihank emi edide anam-ndutịm Kọmiti N̄kọk Itieutom do ọdọhọ ete: “Ana mme owo ẹkot magazine nnyịn man mmọ ẹdiọn̄ọ nnyịn. Magazine nnyịn esinam mme owo ẹdiọn̄ọ se ikpepde onyụn̄ anam mmọ ẹma ndikop ukwọrọikọ nnyịn. Edieke inọde ata ediwak owo magazine nnyịn, iyanam ediwak mmọ ẹdidiọn̄ọ Jehovah.”

Ndikwọrọ Ikọ ke Ebiet Emi Mme Owo Ẹwakde An̄wam Mme Owo

Ke 2013, nditọete ke Indonesia ẹma ẹtọn̄ọ ndikwọrọ ikọ ke mbufa usụn̄ iba emi esop Abasi ẹkesiode ẹdi—ndikwọrọ ikọ ke ebiet emi mme owo ẹsiwakde ke ikpọ obio ye ke efakutom esop. Emi anam ata ediwak owo ke Indonesia ẹkop ukwọrọikọ.

Akpa itie emi nditọete ẹkenamde emi ekedi ke akamba itie emi ẹsinyamde TV ye mme n̄kpọ ntre ke West Jakarta. Mme esop n̄ko ẹma ẹtọn̄ọ ndibon n̄wed ke okpokoro  nnyụn̄ ndọn̄ ke ukpatn̄kpọ n̄kwọrọ ikọ ke ebiet emi mme owo ẹwakde ke efakutom mmọ. Ke ufan̄ isua kiet, ẹma ẹda se ibede okpokoro ye ukpatn̄kpọ 400 ẹkwọrọ ikọ ke Indonesia. Emi enen̄ede enyene ufọn.

Ebiowo kiet ke Jakarta emi ekerede Yusak Uniplaita ọdọhọ ete: “Mbemiso ikọtọn̄ọde ndikwọrọ ikọ ntem, esop nnyịn ẹkesitobo magazine 1,200 ke ọfiọn̄. Ke ọfiọn̄ itiokiet ama ekebe, ima itọn̄ọ nditobo 6,000. Idahaemi iditobo 8,000. Ima inọ mme owo ediwak n̄wed ye ndiye n̄kpri n̄wed n̄ko.” Ke Medan ke North Sumatra, mme asiakusụn̄ ifan̄ ẹma ẹdọn̄ n̄wed ke ukpatn̄kpọ ẹnịm ke nsio nsio itie ita. Akpa ọfiọn̄ oro, mmọ ẹkenọ mme owo n̄wed 115 ye magazine 1,800. Ke ọfiọn̄ iba ama ekebe, mme asiakusụn̄ 60 ẹma ẹnọ mme owo n̄wed 1,200 ye magazine 12,400 ke nsio nsio itie itiaba. Isụn̄utom emi ekerede Jesse Clark ọdọhọ ete: “Obufa usụn̄ ukwọrọikọ emi enem nditọete etieti onyụn̄ anam mmọ ẹkụt ke ediwak owo ke Indonesia ẹma Ikọ Abasi. Oro ima ikọtọtọn̄ọ do, imọtọn̄ọ!”

Mme Owo Ẹkop Ikọ Abasi ke Usem Emana Mmọ

Indonesia odu ke ikpehe ererimbot emi usem awakde etieti. * Kpa ye emi ediwak owo ẹsemde Indonesian emi edide akpan usem ke idụt oro, mmọ ẹnyene usem emana mmọ n̄ko.

Mme akabade n̄wed ke usem Batak-Toba ke North Sumatra

Ke 2012, ọfis nnyịn ẹma ẹtọn̄ọ ndise m̀mê ewe ke otu ediwak usem emi ke ẹkpetọn̄ọ ndikabade. Tom Van Leemputten ọdọhọ ete: “Ima itọn̄ọ ndikabade n̄wed nsịn ke usem 12 emi n̄kpọ nte owo miliọn 120 ẹsemde. Ke ini nditọete nnyịn emi ẹsikabarede n̄wed ke usem Javanese ẹkekụtde akpa tract ke usem oro, mmọn̄eyet ama asiaha mmọ ke enyịn. Ikọ Abasi ama odu ndien ke usem mmọ!”

 Edi ediwak esop ẹkesụk ẹnenịm mbono esop ke usem Indonesian idem ke mme ebiet emi ata ediwak owo ẹsemde usem emana mmọ kpọt. Lothar Mihank ọdọhọ ete: “Ke 2013, ami ye Carmen an̄wan mi ima ika Nias Island ke North Sumatra ikodụk mbono usen iba. Ata ediwak ke otu owo 400 emi ẹkedụkde mbono oro ẹkesem Nias, edi ẹkenịm mbono oro ke usem Indonesian. Ke mma n̄kenyene nneme ye mme etịn̄ikọ, ẹma ẹdọhọ otuowo ke ẹdinịm mbono ke usem Nias edem usen. Owo 600 ẹma ẹwọrọ ẹdiyọhọ itie mbono edem usen.” Carmen an̄wan esie ọdọhọ ete: “Mme owo ẹma ẹkpan̄ utọn̄ ọyọhọ usen iba ẹkan akpa usen emi ẹkedide ke usem Indonesian. Ama enem mmọ ndikop ikọ Abasi ke usem mmọ, se mmọ ẹkekopde ama onyụn̄ an̄wan̄a mmọ.”

Ke ẹkwọrọ ikọ ẹnọ inan

 Idahaemi, ẹkpep mme inan ke Indonesia Ikọ Abasi ke usem emi an̄wan̄ade mmọ. Toto ke 2010, mme akabade n̄wed ke Usem Idiọn̄ọ Mbon Indonesia ẹkabade n̄kpri ndiye n̄wed itiaba ye tract itiaita ke usem oro. Ọfis nnyịn ke idụt oro ẹnam ẹnịm ufọkn̄wed usem idiọn̄ọ 24, ẹnyụn̄ ẹkpep se ibede owo 750 usem idiọn̄ọ. Mfịn, mme esop ye otu 23 emi ẹsemde usem idiọn̄ọ ke ẹkpep mme inan Ikọ Abasi ẹnyụn̄ ẹsọn̄ọ mmọ idem. N̄kpọ nte inan miliọn ita ẹdu ke Indonesia.

Idahaemi, nsio nsio otu mme akabade n̄wed 37 ẹdu ke Indonesia. Mme akabade n̄wed 117 ye owo 50 emi ẹnamde utom ke nsio nsio itie ukabade n̄wed 19 ẹdu ke idụt oro.

^ ikp. 2 Ẹkesio Edikabade Eke Obufa Ererimbot ke usem Indonesian ke 1999. Ẹkekabade Bible emi ke ini ẹketrede utom nnyịn, ẹkenyụn̄ ẹda isua itiaba ẹkabade enye. Ke isua ifan̄ ama ekebe, ẹma ẹsio Insight on the Scriptures, eboho mbiba, ye Watchtower Library ke CD ke usem Indonesian. Idịghe ekpri utom ekedi emi!

^ ikp. 2 Ẹsem nsio nsio usem 707 ke Indonesia, ẹnyụn̄ ẹsem 838 ke Papua New Guinea emi ekperede mmọ.