Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

 INDONESIA

Nte Ẹkesikwọrọde Ikọ ke Eset

Nte Ẹkesikwọrọde Ikọ ke Eset

Radio

KE 1933, nditọete ẹma ẹnam ndutịm man itieutom usuanetop ke Jakarta ẹsibre ukwọrọikọ Brọda Rutherford ke Ikọmbakara. Ete kiet emi akamade se Bible ekpepde ama esikot n̄ko nsio nsio ukwọrọikọ nnyịn ke usem Dutch ọnọ mme owo ke radio. Mme owo ẹma ẹnen̄ede ẹma ukwọrọikọ oro, ndien oro ama anam ẹkeme ndinọ mme owo ediwak n̄wed nnyịn.

Ke ini ẹkebrede ukwọrọikọ Brọda Rutherford emi, “Odudu oro Edisana Isua Enyenede ke Emem ye Uforo,” ikpọ owo Catholic ikekemeke ndime aba. * Mmọ ẹma ẹnam mbon mmọ ẹkot Brọda De Schumaker ikpe ẹte ke “ọdọk edidọk, esuene ufọkabasi, onyụn̄ esịn usua ke obio” sia enye ekesimen ukwọrọikọ oro ọkọnọ ẹbre. Brọda oro ama akafan̄a idem ke esop, edi ẹma ẹdọhọ enye ekpe guilder 25 * ye okụk emi mmọ ẹkebiatde ẹkot enye ikpe. Mme ọwọrọetop n̄wedmbụk n̄kpọntịbe ita ẹma ẹwet n̄kpọ ẹban̄a ikpe oro, ndien emi ama anam mme owo ẹnen̄ede ẹkop ikọ Abasi.

 Nsụn̄ikan̄ Emi Ẹkekotde Lightbearer

Mme asiakusụn̄ itiaba emi ẹkemade Abasi ẹma ẹda nsụn̄ikan̄ Watch Tower Society emi ẹkekotde Lightbearer, emi okonyụn̄ edide ikpat 52, ẹto Sydney ke Australia ẹsan̄a ẹkwọrọ ikọ. Mmọ ẹma ẹdibehe ke Jakarta ke July 15, 1935,  ke n̄kpọ nte ọfiọn̄ itiokiet ama ekebe, ẹnyụn̄ ẹbiere ndikwọrọ ikọ ke ofụri Indonesia, Singapore, ye Malaysia.

Ke n̄kpọ nte isua iba ye ubak, mmọ ẹma ẹsiwat ẹka nsio nsio ẹsụk ke Indonesia ẹkenọ mme owo ata ediwak n̄wed ikọ Abasi. Jean Deschamp ọkọdọhọ ete: ‘Ekesidi ẹma ẹsịm ekpri esụk, ẹbre ukwọrọikọ J. F. Rutherford, emi ekedide etieibuot Watch Tower Society ini oro. Iwakke n̄kpọ emi ekesikpade mbon Malay idem nte ndikụt nsụn̄ikan̄ oro awatde edidian ke esụk mmọ, nnyụn̄ n̄kop akamba uyo ọwọrọde ke nsụn̄ikan̄ oro.’

Ama abiak ikpọ owo ufọkabasi ndikụt nte nditọete oro ẹkwọrọde ikọ uko uko tutu mmọ ẹdọhọ ukara ẹkûyak ẹfiak ẹda nsụn̄ikan̄ oro ẹkwọrọ ikọ aba ke ediwak esụk Indonesia. Ke December 1937, ẹma ẹmen nsụn̄ikan̄ oro ẹnyọn̄ Australia, edi mme owo ikefreke nti utom emi mme isụn̄utom oro ẹkenamde ke Indonesia.

Mbon emi ẹkesidade Lightbearer ẹkwọrọ ikọ

^ ikp. 2 Ukwọrọikọ Brọda Rutherford ama ayarade nsu emi Catholic ẹkesikpepde, ayarade mbuka emi mmọ ẹkesinamde ke ukara, ye nte mmọ ẹkesidade enyịn̄ Abasi ẹn̄wana okụk.

^ ikp. 2 N̄kpọ nte ₦59,000 mfịn.