Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

 INDONESIA

Mbono Emi Owo Mîdifreke

Mbono Emi Owo Mîdifreke

KE August 15-18, 1963, Mme Ntiense Jehovah 122 ẹma ẹto nsio nsio idụt ẹditiene Mme Ntiense eken ẹsop idem ke Bandung ke West Java. Mmọ ẹkedi Mbono “Nsinsi Eti Mbụk,” ata akpa mbono ofụri ererimbot ke Indonesia.

Nditọete ẹma ẹbe ediwak idomo man ẹkeme ndinịm mbono oro. Ẹma ẹkpụhọ itie emi ẹkeyomde ndinịm mbono oro utịm ikata sia ẹkeyom ndida mme itie oro nnam usọrọ usen emi Indonesia ẹketọn̄ọde ukaraidem. Ke ini ukara ẹkenamde okụk ukpeusụn̄ ọdọk utịm ikanan̄ akan akpa, ndusụk nditọete ẹma ẹkpụhọ nte mmọ ẹkeyomde ndisan̄a ndi mbono oro. Eyenete kiet akasan̄a usen itiokiet ke ukot edi mbono oro. Owo 70 ke Sulawesi ẹma ẹtiene mme owo ẹfaha ke ekpri nsụn̄ikan̄ ke ofụri usen ition man ẹdidụk mbono oro.

Ama enem Mme Ntiense ke Indonesia ndikụt nditọete mmọ iren ye iban emi ẹketode nsio nsio idụt ẹdi mbono oro nnyụn̄ n̄kụt Frederick Franz ye Grant Suiter, mbon Otu Emi Ẹsede Ẹban̄a Utom Mme Ntiense. Ntiense kiet emi okotode idụt en̄wen ama ọdọhọ ete: “Esịt enem nditọete emi tutu; mmọ ẹsasak kpukpru ini.”

Mme owo ẹma ẹbe 750 ke mbono oro, ndien owo 34 ẹkena baptism. Ronald Jacka ọkọdọhọ ete: “Ọwọrọetop mbono oro ama anam ediwak mbon emi ẹkemade akpanikọ ẹkabade Mme Ntiense Jehovah, onyụn̄ anam nditọete ke Indonesia ẹsịn idem ẹnam utom Abasi.”

Ronald Jacka (ke ubọk nnasia) ke ọnọ utin̄ikọ ke 1963 ke Mbono “Nsinsi Eti Mbụk,” ndien owo ke akabade

Kpep N̄kpọ En̄wen

Ntak Emi Mme Ntiense Jehovah Ẹsidụkde Ikpọ Mbono?

Nnyịn imesidụk akpan mbono ita kpukpru isua. Nso ke akpanam man etiene ọbọ ufọn mbono emi?