Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

Ndusụk owo ẹkesịne ke ubom ẹkop se ẹtịn̄de ke mbono kiet emi ẹkenịmde ke ini ẹketrede utom nnyịn

 INDONESIA

Idụhe Se Idikpande Mmọ

Idụhe Se Idikpande Mmọ

Ke ini nditọete ke ọfis nnyịn ẹkekopde ke ẹtre utom nnyịn, mmọ ẹma ẹsọsọp ẹnam n̄kpọ. Ronald Jacka ọdọhọ ete: “Ima itan̄ kpukpru n̄wed emi ikewetde mme akpan n̄kpọ, mme n̄wed emi ikoyomde ndinọ ẹsọk mme esop, ye okụk esop Abasi ikedịp ke nsio nsio itie ke Jakarta. Ekem ima isio ọfis nnyịn ika ebiet emi mme owo mîdidiọn̄ọke inyụn̄ inyam akani oro.”

Ediwak nditọete ẹma ẹka iso ẹnam n̄kpọ Abasi ikopke ndịk. Idem mbemiso ẹketrede utom nnyịn, ẹma ẹkọkọbọ mmọ, edi mmọ ẹma ẹka iso ẹbuọt idem ke Jehovah. Edi ndusụk nditọete ikeben̄eke idem. Ndịk ama anam mbiowo ifan̄ ẹsịn ubọk ke n̄wed ẹte ke mmimọ idikwọrọke ikọ aba. Ndusụk owo ẹma ẹsiak enyịn̄ nditọete ẹnọ ukara. Ọfis ẹma ẹdọn̄ nditọete emi ẹkenen̄erede ẹsọn̄ idem ẹte ẹkesọn̄ọ mme esop idem ẹnyụn̄ ẹn̄wam mbon oro mîkọsọn̄ọke ida ye esop Abasi. John Booth emi ekedide owo Otu Emi Ẹsede Ẹban̄a Utom Mme Ntiense Jehovah ama ekese nditọete ke Indonesia onyụn̄ ọnọ mmọ item nte ete.

Jehovah ama ọsọn̄ọ ikọt esie idem sia enye isifreke mme erọn̄ esie. (Ezek. 34:15) Mbiowo ẹma ẹsịn idem ke ukwọrọikọ ẹnyụn̄ ẹda usụn̄ ke esop; nditọete ẹma ẹnyụn̄ ẹsio mbufa usụn̄ ndida n̄kwọrọ ikọ ẹdi. (Matt. 10:16) Ediwak mmọ ẹma ẹdep obufa Bible mbon Indonesian Bible Society ẹsida ẹkwọrọ ikọ ẹnọ mbon emi mmọ ẹkụtde ke ẹyema ndikop. Ndusụk mmọ ẹma ẹsiwak page emi edinamde mme owo ẹdiọn̄ọ n̄wed nnyịn ẹfep mbemiso ẹdade ẹkenọ mbon emi ẹdimade ndibọ. Ediwak mme  asiakusụn̄ ẹkesinam se mme asiakusụn̄ emi ẹkedude ke ini ukara mbon Japan ẹkesinamde. Mmọ ẹkesinam nte isan̄a ke ufọk ke ufọk inyam n̄kpọ, edi ke ẹkwọrọ ikọ.

Margarete ye Norbert Häusler

Ke 1977, Itieutom Emi Esede Aban̄a Ido Ukpono ẹma ẹfiak ẹnam nnyịn n̄kpọ—mmọ ikamaha ndinọ Mme Ntiense Jehovah emi ẹkedide isụn̄utom obufa n̄wedisan̄. Emi ama anam ẹnọ ediwak isụn̄utom oro ẹka nsio nsio idụt. * Isụn̄utom emi ekekerede Norbert Häusler, emi enye ye Margarete n̄wan esie ẹkesikwọrọde ikọ ke Manado ke North Sulawesi, ọkọdọhọ ete: “Ata ediwak nditọete ẹma ẹdi itiembehe ubomofụm ndikọm nnyịn unyọn̄. Mbemiso ikodụkde ubomofụm oro, ima ituak ida iwọn̄ọde  ise mmọ. Mmọ ẹma ẹfụn̄ nnyịn ubọk, ima inyụn̄ ikop mmọ ẹdọhọde ẹte: ‘Ẹsọsọn̄ọ-o. Ẹsọsọn̄ọ-o ke ndikedi ndidu ye nnyịn.’ Nnyịn ikatatua idụk ubomofụm oro.”

Ibak Ọtọn̄ọ ke Sumba

Mme owo ẹma ẹkop ke ofụri Indonesia ke ukara ẹtre utom nnyịn, ndien N̄ka Ofụri Ufọkabasi ke Indonesia ẹma ẹdọhọ mbon mmọ ẹte edieke mmọ ẹkụtde nte Ntiense Jehovah ekededi ọkwọrọde ikọ, yak mmọ ẹketịn̄ ẹnọ ukara. Emi ama anam ukara ẹmụm ediwak nditọete nnyịn ẹnyụn̄ ẹbụp mmọ ibak ibak mbụme.

Ke Waingapu ke Sumba, akwa owoekọn̄ do ama ọdọhọ nditọete 23 ete ẹdi itie emi mbonekọn̄ ẹsidụn̄de, onyụn̄ ọdọhọ mmọ ẹsịn ubọk ke n̄wed ẹte ke mmimọ idịghe Mme Ntiense Jehovah aba. Ke ini mmọ mîkamaha ndisịn, enye ama ọdọhọ mbonekọn̄ ẹtịm mmọ onyụn̄ ọdọhọ mmọ ẹfiak ẹdi edem usen. Ndisan̄a nto do nsịm ufọk mfiak ndi ekedi itiat itiaita.

Ke ini nditọete oro ẹkebakde ẹdi edem usen, ẹma ẹkot mmọ owo kiet kiet ẹte ẹdisịn ubọk ke n̄wed oro. Edieke eyenete mîsịnke ubọk, mbonekọn̄ ẹyekama n̄kọketo emi enyenede n̄kukịm ẹtịm enye. Mmọ ẹma ẹtịm nditọete emi idat idat tutu ndusụk ẹsụhọ. Kpa ye oro, ndịk ikanamke nditọete eken. Edi ke akpatre, ekpri akparawa emi ekekerede Mone Kele ama ekewet n̄kpọ ke n̄wed oro. Esịt ama ọduọ nditọete eken, edi se enye ekewetde ama anam esịt ayat akwa owoekọn̄ oro n̄kpa n̄kpa. Enye ekewet ete: “Ami ndidi Ntiense Jehovah ke nsinsi!” Mbonekọn̄ ẹma ẹmia enye ẹbiat idem tutu edi se ẹmende enye ẹka ufọkibọk. Edi mmọ ikekemeke ndinam enye akan̄ Abasi.

Akwa owoekọn̄ oro ama ada ofụri usen 11 odomo ndinam nditọete oro ẹkan̄ Abasi. Enye ama anam mmọ ẹda ke nainai eyo tọn̄ọ usenubọk tutu mbubreyo.  Enye ama anam mmọ ẹnyọni ke ata ediwak hour, ọnọ mmọ akamba mbiomo ete ẹbiom ẹfehe ata anyan usụn̄, onyụn̄ owụk mmọ ikwa ke itọn̄ ete ẹkọm ọfọn̄ etakubom (flag). Edi mmọ ikọkọmke. Emi ama anam enye ọdọhọ ẹfiak ẹtịm mmọ.

Kpukpru usenubọk nditọete oro ẹyemian̄a isan̄ sụn̄sụn̄ ẹkesịm itie oro, ke ẹkere m̀mê nso ke ẹdinyụn̄ ẹnam mmimọ usen oro. Nte mmọ ẹsụk ẹsan̄ade ẹka, mmọ ẹma ẹsibọn̄ akam ẹnyụn̄ ẹsọn̄ọ kiet eken idem ẹte ẹkûkan̄ Abasi. Iyịp ye unan ekesiyọyọhọ mmọ idem ke ini mmọ ẹnyọn̄de ẹdi mbubreyo, edi kpa ye oro mmọ ẹma ẹsikop inemesịt ke mmimọ ikakan̄ke Abasi.

Ke ini nditọete ke ọfis ẹkekopde ẹban̄a ibak emi, mmọ ẹma ẹsọsọp ẹnọ etop ẹsọk akwa owoekọn̄ oro ke Waingapu ye ikpọ mbonekọn̄ ke Timor, Bali, ye Jakarta, ẹnyụn̄ ẹnọ n̄ko ẹsọk ikpọ owo ukara eken. Bụt ama anam akwa owoekọn̄ oro ke ini enye okokụtde ke etop ibak imọ esịm ofụri Indonesia, ndien oro ama anam enye etre ndikọbọ nditọete oro.

“Mme Ntiense Jehovah Ẹtie Nte Okpukwak”

Ke ediwak isua, ẹma ẹsimụm ata ediwak Ntiense ke Indonesia ẹkọbi, ẹbụp mbụme, ẹnyụn̄ ẹnọ ufen. Isụn̄utom kiet emi ekekerede Bill Perrie ọkọdọhọ ete: “Ke obio kiet, ẹma ẹmia ediwak nditọete ẹsio edet ọkpọiso. Ke ini mmọ ẹkụtde eyenete emi osụk enyenede edet ọkpọiso, mmọ ẹma ẹsibụp enye ete: ‘Ndi edi obufa owo? Okûdi ama akan̄ Abasi?’ Kpa ye ofụri ufen emi ẹkenọde nditọete, mmọ ẹkesụk ẹkokop idatesịt ẹnyụn̄ ẹsịn idem ẹnam n̄kpọ Jehovah.”

“N̄kpọkọbi oro ama ekpep mi ndinen̄ede mbuọt idem ye Jehovah, onyụn̄ anam nnen̄ede mma enye”

 Enyene ini emi ẹkemụmde nditọete 93 ẹsịn ke ufọk-n̄kpọkọbi. Ẹma ẹsịn ndusụk ọfiọn̄ iba m̀mê akande oro, edi ndusụk ẹma ẹsịne isua inan̄. Kpukpru ufen emi akakam ananam mmọ ẹtetịm ẹbiere ndika iso nnam n̄kpọ Jehovah. Ẹma ẹkọbi Musa Rade ọfiọn̄ itiaita. Edi ke enye ama ọkọwọrọ edi, enye ama ọkọsọn̄ọ nditọete ke obio mmọ idem ete ẹka iso ẹkwọrọ ikọ. Enye ọkọdọhọ ete: “N̄kpọkọbi oro ama ekpep mi ndinen̄ede mbuọt idem ye Jehovah, onyụn̄ anam nnen̄ede mma enye.” Imokụt ndien se ikanamde ndusụk owo ẹdọhọ ke “Mme Ntiense Jehovah ẹtie nte okpukwak.” Nte ọkọn̄de okpukwak, ntre ke enye etetịm odụk. Ukem ntre, nte amiade Mme Ntiense Jehovah ufen, ntre ke mmọ ẹditetịm ẹsịn idem ẹnam n̄kpọ Abasi mmọ.

Nditọete ẹka ndikwọrọ ikọ ke Ambon ke Maluku

^ ikp. 1 Owo ikọdọhọke isụn̄utom ita ẹnyọn̄. Ẹkeyak Peter Vanderhaegen ye Len Davis ẹtie sia mmọ ẹma ẹbe isua 60, ẹnyụn̄ ẹyak Marian Tambunan (emi ẹkesikerede Marian Stoove) etie sia enye ọkọdọ owo Indonesia. Mmọ ẹma ẹka iso ke utom Abasi, ndien enye ama ọdiọn̄ utom mmọ.