Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

 INDONESIA

Ata Eyen Sarah

Titi Koetin

Ata Eyen Sarah
  • AKAMANA KE 1928

  • ANA BAPTISM KE 1957

  • N̄wan emi akan̄wamde ebe esie emi ekesibiọn̄ọde enye edifiọk akpanikọ. —Mario Koetin eyen esie ọnọ mbụk emi.

EKA mi ama ọfọn uwem etieti, ama mme owo, onyụn̄ ama Ikọ Abasi. Ke ini Gertrud Ott emi ekedide isụn̄utom ke Manado ke North Sulawesi ọkọkwọrọde ikọ ọnọ enye, enye ama enyịme ndikpep Bible onyụn̄ akabade Ntiense Jehovah. Edi ete mi Erwin, emi akanamde utom ke ban̄k ekem edidi etieibuot okpokoro ke Jakarta Stock Exchange, ikenyịmeke enye edi Ntiense.

Usen kiet enye ama asiak n̄kpọ iba ete eka mi emek kiet.

Enye ama ofiori ete: “Mek kiet—ufọkabasi fo m̀mê ebe fo!”

Eka mi ama odop etie ekere, ekem ọbọrọ sụn̄sụn̄ ete, “Nyom mbiba—ebe mi ye Jehovah.”

Uyo ama odụk ete mi idịbi, esịt onyụn̄ osụhọde enye.

Nte ini akade ete mi ikafịnake eka mi aba sia enye ama ama eka mi tutu, onyụn̄ esima nti ekikere esie.

Edi eka mi okoyom ete mi etiene edikpono ata Abasi. Ke enye ama ọkọbọn̄ akam aban̄a n̄kpọ emi, enye ama eti  ke ete mi esima ndikpep nsio nsio usem. Ntre enye ama osion̄o n̄kpọ ke Bible ewet ke Ikọmbakara adian ke ediwak itie ke ufọk, onyụn̄ ọdọhọ ete mi ke iyom ndinen̄ede ndiọn̄ọ Ikọmbakara. Ete mi ama esima owo ọdiọn̄ọ ndida ke iso mme owo ntịn̄ ikọ, ntre eka mi ama ọdọhọ enye an̄wam imọ ese nte ikpepde se iditịn̄de ke Ufọkn̄wed Utom Ukara Abasi. Enye ama enyịme. Eka mi ama ọdọhọ enye m̀mê imekeme ndidọhọ esenyịn circuit edidu ke ufọk nnyịn sia enye ama ọdiọn̄ọ ke ete mi esima ndikama isenowo. Enye ikafan̄ake. Ete mi ama ama nnyịn etieti, ntre eka mi ama ọdọhọ enye esitiene nnyịn edi akamba mbono, enye onyụn̄ enyịme.

Eka mi ama enyene ime onyụn̄ ada ifiọk anam ete mi ọtọn̄ọ ndima Mme Ntiense Jehovah sụn̄sụn̄. Ekem, ke ini ikọwọrọde ikodụn̄ ke England, ete mi ama esidụk mbono esop onyụn̄ edi ufan John Barr, emi ekedide owo Otu Emi Ẹsede Ẹban̄a Utom Mme Ntiense Jehovah nte ini akade. Ete mi ama ana baptism isua oro. Idụhe se ikenemde eka mi ntre. Toto ke ini oro, ete mi ama ama eka mi akan nte ekesimade.

Eka mi ekedi ata eti an̄wan, ama esikpono mme owo, enen̄ede ama Abasi, onyụn̄ ọfọn ido ye kpukpru owo

Ndusụk ufan nnyịn ẹsidọhọ ke eka mi eketie nte Christian kiet ke eyo mme apostle, emi ekekerede Lydia. Mma oro ama esifọn ido etieti. (Utom 16:14, 15) Edi ami n̄kere ke eka mi eketie nte Sarah, emi ekesisụkde ibuot ọnọ Abraham ebe esie. (1 Pet. 3:4-6) Eka mi ekedi ata eti an̄wan, ama esikpono mme owo, enen̄ede ama Abasi, onyụn̄ ọfọn ido ye kpukpru owo. Eti uwem esie akanam ete mi edidi Ntiense Jehovah. N̄kada eka emi nte ata eyen Sarah.