Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

Ẹkesida ndọ ẹnịm mbono

 INDONESIA

Mmọ Iketreke Ndisop Idem Ọtọkiet

Mmọ Iketreke Ndisop Idem Ọtọkiet

Ke ẹma ẹketre utom nnyịn, ediwak esop ẹkesinịm mbono esop ke ufọk mme owo. Ndusụk esop ikesikwọhọ ikwọ mbak mme owo ididiọn̄ọ ke mmọ ẹnịm mbono esop. Ukara ẹma ẹsika ndusụk itie emi ẹnịmde mbono esop ẹkesịn ntịme edi nditọete ikesiyakke oro afịna mmọ.

Ẹkesiwak ndinịm mbono ke ini mme ubon ẹnamde usọrọ m̀mê ke usen emi nditọete ẹnamde ndọ. Tagor Hutasoit ọkọdọhọ ete: “Mbon emi ẹkeyomde ndinam ndọ ẹma ẹsibem iso ẹsịn ndọ mmọ ke n̄wed ukara, ekem ẹkekụt bodisi ẹbọ n̄wed man ẹkeme ndinam usọrọ ndọ mmọ. Ke ini usọrọ oro, ebendọ, n̄wanndọ, ete ye eka n̄wanndọ, ye mme ufan n̄wanndọ ẹyetie ke mbot utịn̄ikọ ke ini nsio nsio nditọete ẹnọde utịn̄ikọ.”

Ke ini ẹkesụk ẹnịmde mbono kiet, bodisi ama edikot Tagor obụp mbụme.

Bodisi oro ọkọdọhọ ete: “Ndọ esiwak ndidi hour iba m̀mê ita. Eke mbufo esinam didie edi tọn̄ọ usenubọk esịm mbubreyo?”

Tagor ama ọdọhọ enye ete: “Ndusụk mbufa ebe ye n̄wan ẹsinyene nsio nsio mfịna, ntre ana ẹnen̄ede ẹda Ikọ Abasi ẹnọ mmọ item.”

 Bodisi oro ama ọdọhọ ete: “Ata akpanikọ ke afo etịn̄ oro.”

Ke 1983, ediwak nditọete ẹma ẹnam ndọ mmọ ke ukem usen ke akamba an̄wambre ke Jakarta, ndien ẹma ẹda ifet oro ẹnọ ndusụk utịn̄ikọ Mbono District “Edidianakiet Obio Ubọn̄.” Nditọete emi ẹkedụkde mbono oro ẹma ẹkpere ndisịm 4,000, ẹma ẹnyụn̄ ẹnịm owo 125 baptism ndịbe ndịbe mbemiso ẹtọn̄ọde. Nte ini akakade, ukara ikenen̄ekede ifịna Mme Ntiense aba, ntre ẹma ẹnịm akamba mbono emi mme owo ẹkebede 15,000.

 Ẹbọp Ọfis ke Ini Ẹketrede Utom Nnyịn

Tọn̄ọ ke 1980 tutu ekpere ndisịm isua 2000, ọfis nnyịn ẹma ẹsiwet leta ẹdọhọ ukara ẹyak Mme Ntiense Jehovah ẹnam utom mmọ. Nditọete ke idụt efen n̄ko ẹma ẹwet ukara Indonesia ye mme isụn̄utom ukara Indonesia ẹbụp ntak emi mmọ ẹtrede utom Mme Ntiense Jehovah. Ediwak ikpọ owo ukara ẹma ẹnyịme ẹfiak ẹyak nnyịn inam utom nnyịn edi Itieutom Emi Ẹsede Ẹban̄a Utom Mme Christian ikenyịmeke.

Ke 1990, nditọete ẹma ẹbiere ndibọp ọfis nnyịn ke ebiet emi mme owo mîdisọpke idiọn̄ọ. Isua oro, Otu Emi Ẹsede Ẹban̄a Utom Mme Ntiense Jehovah ẹma ẹnyịme ẹdep isọn̄ ke ebiet emi ekperede ekpri obio emi ẹkotde Bogor. To ke Jakarta sịm do ekedi n̄kpọ nte itiat 25. Ibat ibat nditọete ke Indonesia ẹkediọn̄ọ utom ubọpufọk. Ẹma ẹkere m̀mê ẹdinanam didie ibọp obufa ọfis emi.

Nditọete ke nsio nsio itie ke ererimbot ẹma ẹn̄wam. Itieutom ubọpufọk emi okodude ke Brooklyn ye ke Australia ẹma ẹ-drọ nte ọfis oro editiede. N̄kpọ nte nditọete 100 emi ẹsikade nsio nsio idụt ẹkebọp n̄kpọ ke ibio ini ẹma ẹdu ke Indonesia isua iba ẹbọp ọfis oro.

Eyen Indonesia kiet emi ekekerede Hosea Mansur ekesika okokụt nsio nsio ikpọ owo ukara ke n̄kpọ ubọpufọk oro. Enye ọdọhọ ete: “Ke ini ikpọ owo ukara emi ẹkedide mbon Muslim ẹkekụtde H.M. ke itam utom mi, mmọ ẹkekere ke H oro ada ọnọ ‘Hājjī,’ enyịn̄ ukpono emi ẹsikotde mbon emi ẹkade Mecca. Ntre mmọ ẹma ẹsikpono mi etieti. Ndudue emi ama anam emem nnyịn utom ndinyene ndusụk n̄kpọ nnam utom oro.”

Ọfis emi ẹkebọpde ke ini ẹketrede utom nnyịn

Ẹma ẹyak obufa ọfis oro ẹnọ Abasi ke July 19, 1996. John Barr emi ekedide owo Otu Emi Ẹsede Ẹban̄a Utom Mme Ntiense Jehovah ọkọnọ utịn̄ikọ ediyak nnọ.  Owo 285 emi ẹkedụkde edinam oro ẹma ẹsịne owo 118 emi ẹketode Bethel ke idụt en̄wen ẹdi, mme akpan asiakusụn̄, mbufa ye n̄kani isụn̄utom, ye owo 59 emi ẹkedude ke Bethel ke Indonesia. Kpa ke utịturua oro ẹkeyakde ọfis oro ẹnọ, owo 8,793 emi ẹketode nsio nsio idụt ẹma ẹdụk Mbono District “Mme Isụn̄utom Emem Abasi” ke Jakarta.

Jehovah Anyan̄a Ikọt Esie

Ke 1998, Soeharto (Suharto) emi akakarade Indonesia ke ata ediwak isua ama ọkpọn̄ ukara, obufa ukara onyụn̄ ọtọn̄ọ. Nditọete ẹma ẹda ifet oro ẹdomo ndinam ẹfiak ẹyak nnyịn inam utom nnyịn.

 Ke 2001, akwaowo ukara Indonesia emi ekekerede Djohan Effendi ama aka New York. Enye ama ada ifet oro ekese Bethel ke Brooklyn onyụn̄ enyene nneme ye owo ita ke Otu Emi Ẹsede Ẹban̄a Utom Mme Ntiense Jehovah. Ete emi ama enen̄ede ama se enye okokụtde, onyụn̄ okụt ke ediwak idụt inyeneke mfịna ye Mme Ntiense Jehovah. Ete oro ama ama ẹfiak ẹyak nnyịn inam utom nnyịn ke Indonesia, edi enye ọkọdọhọ ke n̄kukụre owo emi enyenede unen ndidọhọ inam ntre edi etubom ọbọpmbet Indonesia emi ekekerede Marzuki Darusman.

Etubom ọbọpmbet oro ama ama ndinam nnyịn ifiak itọn̄ọ utom nnyịn, edi ikpọ owo emi ẹkenamde utom ye enye ikamaha, ntre mmọ ẹma ẹdomo ndibiat ini sia mmọ ẹkediọn̄ọde ke ẹyesọp ẹkpụhọ enye. Edi ke June 1, 2001, ẹma ẹdọhọ Tagor Hutasoit edi ọfis etubom ọbọpmbet oro. Tagor ọkọdọhọ ete: “Isua 25 ko ke edem, kpa ọfis oro ke ẹkenọ mi n̄wed ẹdọhọ ke ẹtre utom Mme Ntiense Jehovah. Edi usen oro, etubom ọbọpmbet ama ọnọ mi n̄wed ete ke ẹfiak ẹyak Mme Ntiense Jehovah ẹnam utom mmọ. Akpatre usen esie ekedi oro ke ọfis oro.”

Ke March 22, 2002, Itieutom Ukara Emi Esede Aban̄a Ido Ukpono ẹma ẹsịn enyịn̄ Mme Ntiense Jehovah ke n̄wed. Akwaowo emi ekesede aban̄a itieutom oro ọkọdọhọ ete: “Idịghe n̄wed emi inọde mbufo mi anam mbufo ẹkeme ndinam n̄kpọ Abasi mbufo. Edi Abasi anam. N̄wed emi ọdọhọ ke ukara ẹnyịme mbufo ẹdu ke Indonesia. Ẹmenyene unen ndinam n̄kpọ Abasi mbufo ukem nte mme ufọkabasi eken, ndien ukara ẹben̄e idem ndin̄wam mbufo.”