Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2016

 INDONESIA

Mme Bibelkring

Mme Bibelkring

KE N̄KPỌ nte 1940, ẹma ẹsiak otu emi ẹkekotde Bibelkring (ikọ Dutch emi ọwọrọde “otu nditọ ukpepn̄kpọ Bible”) ke mbọhọ Lake Toba ke North Sumatra. Ediwak mme titia emi ẹkekotde mme n̄wed emi asiakusụn̄ kiet ọkọnọde mmọ ẹkediana ẹsiak otu oro. Etie nte Eric Ewins ọkọnọ mmọ, sia enye ama ọkọkwọrọ ikọ do ke 1936. Se mmọ ẹkekotde ke mme n̄wed oro ama anam mmọ ẹkpọn̄ ufọkabasi Batak Protestant, ẹnyụn̄ ẹtọn̄ọ ndisitie ke nsio nsio otu n̄kpep Bible ke ufọk. Mmọ ẹma ẹtọn̄ọ ndiwak ẹnyụn̄ ẹsiak mbufa otu. *

Dame Simbolon emi ekedide owo Bibelkring edi Ntiense Jehovah idahaemi

Mme n̄wed oro ama anam mbon otu oro ẹdidiọn̄ọ ndusụk se Bible ekpepde. Dame Simbolon, owo otu oro, emi akakabarede edi Ntiense Jehovah ke 1972, ọkọdọhọ ete: “Mmọ ikesikọmke ọfọn̄ etakubom (flag), idiaha Christmas, inyụn̄ inamke usọrọ usen emana. Ndusụk mmọ ẹma ẹsikwọrọ ikọ ke ufọk ke ufọk.” Edi sia esop Abasi mîkọdiọn̄ọke mmọ, mmọ ẹma ẹtọn̄ọ ndikpep ekikere idemmọ. Limeria Nadapdap emi ekedide owo otu oro n̄ko, edi emi edide Ntiense Jehovah idahaemi, ọdọhọ ete: “Owo ikesiyakke iban ẹsịn urua ke iso, ẹbana idem, ẹsịne mbufa ọfọn̄ oro ẹsiode ẹdi, m̀mê ẹsịne ikpaukot. Owo ikesinyụn̄ iyakke owo ọbọ kad idụt mmọ (national identity card), ndien emi ama ayat ukara.”

Nte ini akakade, ubahade ama anam mme owo ẹwọrọ ẹkesiak eke mmọ, ndien Bibelkring ama ọtọn̄ọ ndisuana sụn̄sụn̄. Ke ini mme asiakusụn̄ ẹkefiakde ẹka Lake Toba, ediwak owo emi ẹkedide mbon Bibelkring ẹma ẹkabade ẹdi Mme Ntiense Jehovah.

^ ikp. 1 Ndusụk owo ẹdọhọ ke mbon Bibelkring ẹkedidi ke tọsịn ke tọsịn.