KPA ye edide ererimbot Satan ẹwọrọ ke mfịna kiet ẹdụk en̄wen, ata ikọt Jehovah ke ẹsịn idem ẹnam n̄kpọ Jehovah Abasi. (1 Cor. 15:58) Se edikụtde mi owụt nte Mme Ntiense Jehovah ke ofụri ererimbot ẹwụtde ke mmimọ ibuọt idem ye Jehovah, inam se ifọnde, inyụn̄ idi mbon akpanikọ.​—⁠Ps. 37:⁠3.

Ẹsio Ibuot Itieutom ye N̄kọk Itieutom Mme Ntiense Jehovah Ẹka Itie En̄wen

Ke February 1, 2016, ẹma ẹkụre utom ke mbufa ufọk ye ke mme itie eken ke ọfis nnyịn ke Wallkill, New York. Kọmiti N̄kọk Itieutom ye Itieutom Utịmutom ye mme itieutom eken ke ọfis nnyịn ke United States ẹma ẹwọrọ ẹka do. Ẹma ẹnam ata ediwak n̄kpọ ẹma ke Warwick, ntre mbon Bethel Brooklyn ẹma ẹtọn̄ọ nditan̄  n̄kpọ n̄wọrọ ke Brooklyn ke New York City n̄ka Warwick emi uyom mînen̄ekede ikpon.

Ọtọn̄ọde ke Monday, April 3, 2017, ẹyeyak mme owo ẹdụk ẹse ibuot itieutom nnyịn ke Warwick. Enyene itie ita emi mme owo ẹdikemede ndisan̄a ikpọn̄ ke idemmọ nse, ye itie ifan̄ emi ẹdimende-men mme owo isan̄a iwụt.

  1. “The Bible and the Divine Name” Ke itie emi, oyokụt ata n̄kani Bible eset emi ẹwụtde ke akpana enyịn̄ Abasi esịne ke N̄wed Abasi.

  2. “A People for Jehovah’s Name” Ndise ye vidio ke itie emi aban̄a mbụk Mme Ntiense Jehovah toto ke eset, emi owụtde nte Jehovah akade iso ada ikọt esie usụn̄, ekpepde mmọ n̄kpọ, onyụn̄ an̄wamde mmọ ẹka iso ẹnam uduak esie.

  3. “World Headquarters​—⁠Faith in Action” Mme vidio emi ẹdude ke itie emi ẹnam ikụt nte mme kọmiti Otu Emi Ẹsede Ẹban̄a Utom Mme Ntiense Jehovah ẹn̄wamde mmọ ẹsop idem ọtọkiet ẹkpono Abasi, ẹka iso ẹkwọrọ ikọ, ẹkpep Ikọ Abasi, ẹnyụn̄ ẹwụt nditọete mmọ ata ima.

Mme owo ẹkeme ndisan̄a ikpọn̄ ke idemmọ nse mme n̄kpọ emi tọn̄ọde ke Monday esịm Friday, n̄kanika itiaita usenubọk esịm n̄kanika inan̄ mbubreyo. Ẹyemen mme owo ẹsan̄a ke minit 20 ẹwụt ndusụk itie ke an̄wa Bethel ye ke Ọfis ye Ufọk Utịmutom. Ẹdisimen mme owo isan̄a iwụt mme itie emi tọn̄ọde ke n̄kanika itiaita esịm duopekiet usenubọk, ndien ke uwemeyo ẹtọn̄ọ ke n̄kanika kiet ẹsịm inan̄.

Mbemiso edide ndise obufa ibuot itieutom emi, ka kese se idude ke jw.org, ABAN̄A NNYỊN > DI DISE MME ỌFIS NNYỊN > United States.