• IDỤT 57

  • IBATOWO 998,254,087

  • MME ASUANETOP 4,154,608

  • UKPEPN̄KPỌ BIBLE 4,353,152

“Iyetie Ntre Ikpep”

Ete kiet ke Mexico, emi ekerede Ismael ama ọdọhọ idemesie ke imọn̄ ikot Bible tọn̄ọ ke ntọn̄ọ isịm utịt. Ke ufan̄ isua kiet enye ama okot Bible ama ikaba, edi nte ini akakade enye ama akabade nnan. Ke isua ifan̄ ama ekebe, Ntiense Jehovah emi ekerede Ángel ama ọkwọrọ ikọ ọnọ enye onyụn̄ etịn̄ se Abasi ọn̄wọn̄ọde  ndinam. Ama enen̄ede ọdọn̄ enye ndidiọn̄ọ mme n̄kpọ efen emi Bible etịn̄de, edi enye ama ọdọhọ ke imọ idikemeke ndikot Bible sia imọ ikwe usụn̄ aba.

Ángel ama ọdọhọ enye ete, “Kûfịna, nyekpep fi ndikot n̄wed mme nnan.”

Ismael ama obụp enye ete, “Ọmọdiọn̄ọ ndikot n̄wed mme nnan?”

Ángel ama ọdọhọ ete, “Ndiọn̄ọke, edi iyetie ntre ikpep.” Idem ama akpa Ismael ndikop ke Ángel oyom ndikpep ndikot n̄wed mme nnan man an̄wam imọ. Ángel ama ọnyọn̄ ọkọtọn̄ọ ndikpep ndikot n̄wed mme nnan, onyụn̄ ada nsọsọn̄ ikọn̄n̄wed anam n̄wed mme nnan. Enye ama ọtọn̄ọ ekpep Ismael ndikot n̄wed mme nnan. Ikebịghike, Ismael ama ọdiọn̄ọ ndikot abisi mme nnan, esidụk mbono esop, onyụn̄ esikot n̄wed Ikọ Abasi emi ẹnamde ẹnọ mme nnan. Ángel ke ekpep nnan inan̄ Bible idahaemi. Mmọ ẹsima nditịn̄ mban̄a Paradise emi Abasi edinamde mmọ ẹfiak ẹkụt usụn̄.

Enye Ikọdiọn̄ọke Titia Mmọ Aba

Ekpri eyenan̄wan isua 14 emi ekerede Viannei ke United States ekewet ete: “Titia emi esidide ndusụk ini edikpep nnyịn social studies ke ufọkn̄wed, ama ọtọn̄ọ nditịn̄ n̄kpọ mban̄a ufọkabasi. Enye ama ọdọhọ isiak enyịn̄ nsio nsio ufọkabasi; mma nsiak Mme Ntiense Jehovah. Nditọ klas nnyịn ẹma ẹsak ẹte ke nnyịn isibiat  mmimọ ini, ke nnyịn inyeneke ubọkutom, ke mmimọ isitotop n̄wed nnyịn iduọk. Titia oro ama etiene abiat nnyịn.

“Mma mbọn̄ akam nnọ Jehovah nte ọnọ mi uko n̄kwọrọ ikọ. Mma ndọhọ mmọ ke nnyịn isikaha ufọk mme owo ndibiat mmọ ini, ke isika sia Jehovah ọdọhọ ida se idude ke Bible ikan̄wam mmọ. Mma ndọhọ mmọ ẹkûsutop n̄wed nnyịn uduọk, ke mme n̄wed oro ẹkeme ndin̄wam mmọ onyụn̄ anyan̄a mmọ. Titia nnyịn ama  ọdọhọ mi n̄kûyat esịt, ke imọ iyesikpan̄ utọn̄ Mme Ntiense Jehovah ẹma ẹdi ukwọrọikọ ke ufọk imọ, ke iyesikot n̄wed nnyịn n̄ko. N̄kekere ke enye onyụn̄ etetịn̄, ke idinamke.

“Ke ọfiọn̄ inan̄ ama ekebe, mma mfiak n̄kụt enye; idem ama akpa mi ndifiọk ke enye ke ekpep Bible. Ke ọfiọn̄ itiokiet en̄wen ama ekebe, enye ama asan̄a oyom mi ke ufọkn̄wed man ọkọm mi ke ukwọrọikọ oro n̄kọkwọrọde nnọ enye. N̄kọdiọn̄ọke enye aba sia enye ama afat idet onyụn̄  akwat ntan̄ebek. Idahaemi enye ọtọn̄ọ ndisitiene n̄kwọrọ ikọ, edi inaha baptism kan̄a.”

Ẹkwọrọ Ikọ ke Amazon

Isua oko, ikọt Jehovah ẹma ẹbiere ndinen̄ede n̄kwọrọ ikọ ke Amazon ke Brazil. Ata ediwak owo do ikokopke eti mbụk akpa. Oro akanam Otu Emi Ẹsede Ẹban̄a Utom Mme Ntiense Jehovah ẹdọhọ yak ẹda isua kiet ẹka san̄asan̄a ukwọrọikọ man ẹkekwọrọ ikọ ẹnọ ata ediwak owo emi ẹdụn̄de ke ndusụk obio ke ata esịt esịt Amazon.

Brazil: Ke ẹkwọrọ ikọ ke Amazon

Ọfis Mme Ntiense Jehovah ẹma ẹmek obio 53 emi ẹdikade ikọkwọrọ ikọ ke Amazon. Ẹsiwat ke mmọn̄ ẹka kpukpru obio oro. Ke ufan̄ ọfiọn̄ inan̄ kpọt, mme asuanetop emi ẹkedọhọde ke iyetiene ika ẹma ẹbe 6,500.

Owo duop ẹma ẹda usen 11 ẹkwọrọ ikọ ke obio Anamã emi Ntiense Jehovah ndomokiet mîdụhe. Mmọ ẹma ẹnọ mme owo n̄wed ikọ Abasi 12,500, ẹnyụn̄ ẹtọn̄ọ ndikpep owo 200 Bible. Idahaemi mmọ ẹsida fon ẹkpep mme owo oro n̄kpọ. Mmọ ẹma ẹsinịm mbono esop ini mmọ ẹkedude do. Esịt ama enem mmọ etieti ndikụt owo 90 ke akpatre mbono esop emi mmọ ẹkenịmde. Owo idiọn̄ọke adan̄a owo emi ukwọrọikọ oro edin̄wamde kan̄a.

Ẹdọhọ Enye Aka jw.org

Jehizel ye Mariana emi ẹdụn̄de ke Venezuela ẹkeka n̄wed ntre ke ofụri isua itiokiet. Mariana ama esinọ Jehizel inua ke ntak emi Jehizel edide Ntiense Jehovah. Enye ekekere ke Jehizel edi owo esịt ikọt. Usen kiet, ke enye ama ọkọnọ Jehizel inua ama, n̄kpọ ama odụk Jehizel ibuot. Enye ama ọdọhọ Mariana ete yak enye aka jw.org, enye ama esịm do, yak enye efịk ebiet emi ẹwetde “Mme Vidio Bible” onyụn̄ efịk “Mme Uyen.”

 Uwemeyo oro Mariana ama okot Jehizel ke fon ọdọhọ ete, “Mmọdiọn̄ọ se isinamde fi odu uwem ntre.”

Jehizel ekekere ke enye onyụn̄ oyom ndinọ imọ inua. Enye ama ọdọhọ ete, “Oyom ndifiak nnọ mi inua?”

Mariana ama ọdọhọ ke imọ idinọhọ enye inua aba, onyụn̄ ọdọhọ ete, “Mbọk sọsọn̄ọ etieti. Mmedikụt ke mme n̄kpọ oro nsidade do nte ‘udia uwem’ ẹdi ntak mfịna mi.” Ẹma ẹnam ndutịm man ẹsikpep Mariana Bible; enye esidụk kpukpru mbono esop n̄ko.

Mbụme Emi Ẹkebụpde Pastọ

Gérole emi odụn̄de ke Haiti ekesidi ewetn̄wed ufọkabasi mmọ. Ama enem enye tutu ke ini Mme Ntiense  Jehovah ẹkedade Bible ẹbọrọ kpukpru mbụme esie. Enye ye eyen esie an̄wan ẹma ẹdọhọ ẹsikpep mmimọ Bible. Se mmọ ẹkekpepde ama enem mmọ tutu mmọ ẹdọhọ ẹsikpep mmimọ n̄kpọ ikaba ke urua.

Ke ẹma ẹkekpep mmọ Bible ọfiọn̄ ita, Gérole ama aka ebịne pastọ okobụp enye mbụme inan̄ emi: “Isua ewe ke ẹkenam Jesus Edidem? Nti owo ẹdika m̀mọ̀n̄ mmọ ẹma ẹkpa? M̀mọ̀n̄ ke ndiọi owo ẹdika mmọ ẹma ẹkpa? Ndi ẹkekọn̄ Jesus ke cross m̀mê ẹkekọn̄ ke anyan eto?” Pastọ oro ama ọdọhọ ke imekeme ndibọrọ ọyọhọ mbụme iba ye ita kpọt. Enye ama ọdọhọ Gérole ete: “Mme Ntiense Jehovah ẹsidọhọ ke owo 144,000 ẹdika heaven. Edi ami ndọhọ ke kpukpru owo emi ẹnamde uduak Abasi ẹdika heaven. Ama edi ndiọi owo, mbon oro ẹditak ke ikan̄ hell.” Ke ini ẹkebụpde m̀mê ewe itie N̄wed Abasi ọsọn̄ọ se enye etịn̄de oro, pastọ oro ikekemeke ndisiak ndomokiet. Ikenemke Gérole nte pastọ ọkọbọrọde enye ntre, edi oro ama anam enye ebiere ndika iso n̄kpep Bible. Gérole ama esịn n̄wed ọkpọn̄ ufọkabasi onyụn̄ ọdọhọ ke imekpep ediwak n̄kpọ ke ufan̄ ọfiọn̄ ita emi ikpepde Bible ye Mme Ntiense ikan ofụri isua 30 emi ikakade ufọkabasi. Gérole ye eyen esie ẹna baptism ndondo emi. Idahaemi mmọ ke ẹkpep owo 23 ke obio mmọ Bible.

Haiti: Gérole ye eyen esie ẹnyene ediwak owo emi mmọ ẹsikpepde Bible