Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wedisua Mme Ntiense Jehovah 2017

 GEORGIA

Mmọ Ẹma Ẹti Andibot Mmọ

Mmọ Ẹma Ẹti Andibot Mmọ

Ediwak mbon emi itịn̄de iban̄a ke ibuotikọ emi ẹdi mme uyen emi ‘ẹtide Akwa Andibot mmọ ke ini mmọ ẹdide n̄kparawa.’ (Eccl. 12:⁠1) Ke uwụtn̄kpọ, mme asiakusụn̄ 3,197 ẹdu ke Georgia, edi n̄kpọ nte owo 1,066 ke otu mmọ ẹdi isua 25 m̀mê ẹkpri ẹkan oro. Ntak emi mme uyen emi ẹnen̄erede ẹsịn idem ẹnam n̄kpọ Abasi ntem?

Enyene mme n̄kpọ emi anamde mmọ ẹma n̄kpọ Abasi ntem. Akpa, mme ubon ke Georgia ẹnen̄ede ẹdiana kiet. Konstantine emi an̄wamde nditọ esie ition ẹma Abasi ọdọhọ ete: “N̄kpọ kiet emi akanamde mi mma esop Abasi edi ke Jehovah edi ata eti Ete. Ke ini n̄kenyenede nditọ, mma mbiere ke nyanam nditọ mi ẹnen̄ede ẹkpere mi.”

Malkhazi ye n̄wan esie ẹma ẹbiere ke iyanam nditọ ita emi mmimọ inyenede ẹnen̄ede ẹdiana kiet. Malkhazi  ọdọhọ ete: “Esidi ke ini ke ini, nnyịn idọhọ nditọ nnyịn ẹtie ẹkere se nnyịn ye nditọeka mmọ isinamde emi mmọ ẹmade, inyụn̄ idọhọ mmọ ẹtịn̄ ke ini utuakibuot ubon. Emi esinam mmọ ẹkụt nti n̄kpọ ke idem mbon en̄wen ẹnyụn̄ ẹma se mbon en̄wen ẹnamde.”

“Uwem Enem Mi Etieti Idahaemi!”

Mbiowo n̄ko ẹsitiene ẹn̄wam mme uyen ẹma Abasi. Mmọ ẹsibabak ẹtọn̄ọ ndinọ mme uyen n̄kpọ ẹnam ke esop. Nestori emi akanade baptism ke ini enye ekedide isua 11, ọkọdọhọ ete: “Mbiowo ẹma ẹsinọ mi n̄kpri n̄kpri utom nnam ke esop toto ke ini n̄kedide ata ekpri. Emi ama anam mi n̄kụt ke mmenyene ufọn ke esop nnyịn.”

Adianade ye mbiowo, nditọete emi ẹnịmde nti uwụtn̄kpọ n̄ko ẹsin̄wam mme uyen ẹma Abasi. Koba eyeneka Nestori ọdọhọ ete: “Ini uyen mi iketiehe nte eke nditọeka mi, sia mma nnyene ediwak mfịna. Ebiowo kiet ke esop nnyịn, emi ekedide akparawa ama esidomo ndin̄wam  mi, ikonyụn̄ idaha mi nte idiọk eyen. Enye ama enen̄ede an̄wam mi mfiak nnyọn̄ mbịne Jehovah.”

Idahaemi, Nestori, Koba, ye Mari eyeneka mmọ an̄wan ẹdu ke ebiet emi ẹnen̄erede ẹyom mme ọkwọrọikọ. Koba ọdọhọ ete: “Uwem enem mi etieti idahaemi.”

“Nditọ Mi ke Ẹsasan̄a ke Akpanikọ”

N̄kọk itieutom ẹsitiene ẹn̄wam mme ete ye eka ẹnam nditọ mmọ ẹma Abasi. Mmọ ẹsiyak mme uyen ẹtiene ẹbọp n̄kpọ ẹnọ esop Abasi. Owo Kọmiti N̄kọk Itieutom kiet ọkọdọhọ ete: “Nnyịn imama nditọ nnyịn etieti, ntre imesin̄wam mmọ ẹkeme ndinam se mmọ ẹkebierede ndinam nnọ Abasi.”

Nditọete ke Georgia ẹdiana ye nditọete emi ẹtode nsio nsio idụt ẹbọp Itie Mbono ke Tbilisi

Mme uyen ndinam utom ye nditọete iren ye iban emi ẹsọn̄de idem ke esop esinen̄ede an̄wam mmọ ẹma ndinam n̄kpọ Abasi. Mamuka, ekpri eyenete emi eketienede nditọete emi ẹketode nsio nsio idụt ẹdi ọbọp Itie Mbono mmọ ke Tbilisi ọkọdọhọ ete: “Nditiene nditọete emi ẹtode nsio nsio idụt nnam utọ utom emi anam n̄kpep ediwak n̄kpọ. Mmekpep nsio nsio ubọkutom nnyụn̄ n̄kpep ediwak n̄kpọ ke Ikọ Abasi.”

Ubon emi ẹdianade kiet, mbiowo, ye nditọete emi ẹnịmde nti uwụtn̄kpọ, ẹn̄wam mme uyen ke Georgia ẹnen̄ede ẹma ndinam n̄kpọ Abasi. Esitie mme ete ye eka nditọ emi ke idem nte eketiede apostle John ke ini enye ọkọdọhọde ete: “Nnyeneke ntak eke okponde akan emi ndiwụt esịtekọm, nte ndikop ke nditọ mi ke ẹsasan̄a ke akpanikọ.”​—⁠3 John 4.

Ẹnen̄ede Ẹsịn Idem Ẹkabade N̄wed

Ke 2013, Otu Emi Ẹsede Ẹban̄a Utom Mme Ntiense Jehovah ẹma ẹdọhọ kpukpru n̄kọk itieutom ẹse m̀mê edi  se ẹkabarede mme n̄wed nnyịn ke mme usem en̄wen emi ẹsemde ke idụt mmọ. Ẹkenam emi man ẹkeme ndikwọrọ eti mbụk nnọ ata ediwak owo.

Ntre, n̄kọk itieutom Georgia ẹma ẹbiere ndikabade ndusụk n̄wed nnyịn ke usem Svan ye Mingrelian. Usem iba emi ẹnen̄ede ẹbiet usem Georgian tutu ndusụk owo ẹsidọhọ ke usem iba emi ẹwọrọ ke usem Georgian.

Mme asiakusụn̄ emi ẹdude ke Svaneti ẹdọhọ ẹte: “Mbon Svan ẹma n̄kpọ Abasi ye Bible etieti. Idem mbon emi mîkesimaha ndibọ mme n̄wed nnyịn, ẹma ẹtọn̄ọ ndibọ enye emi ẹkekabarede ke usem Svan.”

Esịt ama enen̄ede enem kpukpru nditọete emi ẹsemde Mingrelian ke ini mmọ ẹketọn̄ọde ndinịm mbono esop ke usem mmọ. Ekpri asiakusụn̄ kiet emi ekerede Giga  ọdọhọ ete: “Idahaemi ndien ke n̄keme ndibọrọ mbụme ke ikọ idem mi. Ntiehe-tie n̄kere aba nte nditịn̄de ibọrọ mi ke usem Georgian.”

Zuri, ebiowo kiet emi odude ke esop usem Mingrelian ke Tkaia ọdọhọ esie ete: “N̄kpọ esitịbe emi anamde n̄kop inemesịt mîdịghe mfụhọ, edi akanam n̄kpọ inamke mmọn̄eyet ọwọrọ mi ke enyịn. Edi akpa ini emi ẹkekwọde ikwọ Obio Ubọn̄ ke mbono esop ke usem nnyịn, idụhe owo emi ẹkekemede ndimụm idem n̄kama, mmọn̄eyet ama ọwọrọ mi ke enyịn n̄ko.”

Mme Akpan N̄kpọ Emi Ẹketịbede ke Georgia

Ata akpan n̄kpọ ama etịbe ke Georgia ke April 6, 2013. Usen emi ke David Splane emi edide owo Otu Emi Ẹsede Ẹban̄a Utom Nnyịn ọkọnọ utịn̄ikọ ediyak n̄kọk itieutom  nnọ. Ẹma ẹfiak ẹtat n̄kọk itieutom oro, ẹnyụn̄ ẹbọp Itie Mbono ye obufa ufọk emi ẹdidade inịm mme ufọkn̄wed esop Abasi. Nditọete ke Georgia ẹma ẹdara owo 338 emi ẹketode idụt 24 ẹdi edinam emi. Mmọ ẹma ẹnyịme nditọete emi ẹdidụn̄ ke ufọk mmimọ ẹdụk edinam emi.

Edem usen, Brọda Splane ama ọnọ utị̇n̄ikọ, ndien owo 15,200 ẹkekop utịn̄ikọ oro. Ẹkeda Intanet ẹnam ediwak nditọete emi ẹketiede ke nsio nsio Ufọkmbono Obio Ubọn̄ ẹkop utịn̄ikọ emi. Idụhe mboho ikọt Abasi ke Georgia emi akanam ẹwakde ntem. Ama enen̄ede enem nditọete ndidu ọtọkiet, ndineme nneme, nnyụn̄ nsọn̄ọ kiet eken idem. Ekpri eyenete kiet ọkọdọhọ ete, “Mmọfiọk ndien nte obufa ererimbot editiede.”

Ini emi ẹkeyakde n̄kọk itieutom ke Tbilisi ẹnọ ke 2013

Ufọkn̄wed Ukpep Bible Eke Mme Christian Oro Ẹdọde Ndọ emi ẹkotde Ufọkn̄wed Mme Ọkwọrọ Obio Ubọn̄ idahaemi enen̄ede an̄wam nditọete nnyịn ke Georgia. Nditọete emi ẹwakde ẹbe 200 ẹbọ ukpep ke ufọkn̄wed emi ọtọn̄ọde ke 2013. Nditọete emi ẹnen̄ede ẹma se mmọ ẹkpepde ke ufọkn̄wed emi ẹnyụn̄ ẹben̄e idem ndika ebiet ekededi emi ẹyomde un̄wam.

‘Ẹnyanade Ẹbịne Mme N̄kpọ Oro Ẹdude ke Iso’

Imenen̄ede ikọm nditọete oro ẹketọn̄ọde ndikwọrọ ikọ ke Georgia, sia mmọ ẹnam eti mbụk ekeme ndisịm kpukpru ebiet ke Georgia. Mmọ ẹkenam emi ke ntak emi mmọ ẹnen̄erede ẹma Jehovah ye mbọhọidụn̄ mmọ. Mmọ ẹma ẹnyene uko ẹnyụn̄ ẹbuọt idem ye Jehovah. Ndien emi ama anam Jehovah ọdiọn̄ mmọ.

Mme Ntiense Jehovah ke Georgia ẹbe 18,000. Mmọ ẹkop inemesịt ndika iso n̄n̄wam mme mbọhọidụn̄ mmọ ẹkụt nte Ikọ Abasi ọfọnde.​—⁠Phil. 3:13; 4:⁠13.

Mbon Kọmiti N̄kọk Itieutom Georgia: Wayne Tomchuk, Levani Kopaliani, Joni Shalamberidze, ye Michael E. Jones